Eclesiastés 4

Dulemar-mesagwar-imakledimalad

1 An dakdebalid, we-napneggine, dule-mesagwar-imakledimalad yaisulid. Dule-mesagwar-gudimaladi bodidii an daksad, dule-gadi-gadi-e-gwage-imakedi sate gudimalad. Dule-mesagwar-gudimaladi, dule-gadi-gadi-e-gwage-imakedi sate gudimalad. Dule-wemar-mesagwar-imakdimaladi, gangued nikamalad.

2 Degidbali an binsaded, dule-burgwismaladi, dula-gudimaladba bur weligwar gumalad. 3 Ar degi-inigwele, amba yoo-gwalulemaladdi, bur bule wemarba weligwar gumalad. Ar ade, we-napneggi ibmar-isgana-imaklemalad amba yoo dakmalad.

4 An daksabalid, arbaed-dummad-imakedi, degi, ibmar-imakedba-nasgumaiguedi, nobed uked.

Wedi binsarsunna imaklebalid, gwage-nunmaked ukbalid.

5 Dule-binsaedsulid, gwen arbasuli

ukudmaad burgwidoed.

6 Sikwas-obunnolegedi, doggus-obicha-arbaedba bur nuedid.

Ar doggus-arbaedi, gwage-nunmaked uked.

Bulakwaa-arbaed gargangued uked

7 We-napneggi, ibmar-binsarsunna-imakleged-baid an dakdebalid:

8 Dule-wargwenad mimmigansuli gudiid, degi, gwenadgansuli gudibalid, bipisaar arbaed indakdisulid. Bato-ibmar-nikadi amba yeer-itosulid, bur bule ibmar nikubied. Gwen binsasurbalid, doaga ede alamaknai. Gwen werguedgi binsasurbalid.

Wedi binsarsunna imaklebalid, arbaed-dummad gued.

9 Dule-ebogwad, dule-wargwenadba bur nuedid.

Ar na e-arbadiidgi bur bule ibmar-nuegan nikumalad.

10 Ar gwensak aimukudele, baid ogwichoed.

Ar dule walagwen-gudiiddi, aimukudele, dummad-wilegoed,

ar dule-baid-e-ogwisgued sateoed.

11 Ar dule-ebogwad na walikaa megmalale, na muchub-muchub uee imakmaloed.

Ar dule walagwen-megerdi, ¿igi na uee itogoe?

12 Dule walagwenale, sunna dule-baidse galakued.

Ar ebogwardina, sunna dule-baid-abin ganna gwisgumalad.

Dub-giapaa-bipirmakaledi, irgwensuli itirsulid.

Sapingwa-gued, binsaed-nikagued

13 Sapingwa-wilesakwagwad binsaed-ibed-gudiid, bur nuedid, rey-sered binsaedsuli-gudiidba.

Ar we-reyde, dule-ega-binsaed-uked bar abesulid.

14 Ar we-sapingwa, esgaryagi-mellesii gusdibe, e-yargine wilesakwaa gwalulesdibe, 15 degi-inigwele, we-napneggine an daksad, we-sapingwa rey-sorba reyga-megnonikile, dulemala eba nanai damalad.

16 Ar amba dule-bukidar we-sapingwa-gebe-reyga-megidedgi eba nagusdamar-inigwele, degite, dule-danimarmogoedi amba we-rey gwen yeer dakosurmarmogad.

Amba we-ibmala binsarsunna imaklebalid, gwage-nunmaked ukbalid.

<- Eclesiastés 3 Eclesiastés 5 ->