Link to home pageLanguagesLink to all Bible versions on this site
3
Bab-Jehová Samuelʼse gochad

1 Machi-bipi-Samuel, Elí-sogedba Bab-Jehováʼga ibmar-imakdiid. A-ibagangi, Bab-Jehová dogdar bar dulemarbogwa sunmakdisulid, deginbali, negburgan-dakleged dogdar bar dakledisurbalid.

2 Ibagwengi, Elí bato dala galakgumaidba geg bar nue atakgusadgi e-gabedneggi obunnomaid. 3 Bab-Dummadse-goled-neggi gwallumar amba yoo ginneunni, Samuelʼdi Bab-Dummadse-goled-neggi gabmaid. A-neggi Bab-Dummad-Israel-Dulemarbo-Igar-Mesisad-Ulu siid. 4 Degidgine, Bab-Jehová, Samuelʼse gollalid:

—¡Samuel!
Geb Samuel abin-sogded:
—¡Degite!

5 Agine, Samuel, Elí-maidse yog-abarmakded. Geb Elíʼga sogded:

—Naa, ¿ibiga be anse gole?
Elí abin-sogded:
—An bese gochasuli. Gannar be megnae.
Geb Samuel gannar megnaded.

6 Degine, Bab-Jehová gannar Samuelʼse gornonikid:

—¡Samuel!
Geb Samuel gwichibinne-imaksad, Elí-maidse abarmakded. Ega sogdapid:
—Naa, ¿ibiga be anse gole?
Elí abin-sogded:
—Machi, an bese gochasuli. Gannar be megnae.

7 Ar ade, Samuel amba Bab-Jehová akudaked, deginbali, amba yoo Bab-Jehová-e-gayaburba ega magarolebalid.

8 Bab-Jehová gannar Samuelʼse gollarbalid:

—¡Samuel!
Geb Samuel gannar gwichibin-imaksad, Elí-maidse abarmakded.
Elíʼga sogdapbalid:
—Naa, ¿ibiga be anse gole?
Geb Elí magar-itononikid, Bab-Jehová, Samuelʼse gornaid.

9 Elí ega sogded:

—Gannar be megnae. Dule gannar bese gollalile, ega be sogo: ‘Dummad, soge, an be-itomai.’
Geb degine, Samuel gannar megnadsunnad. 10 Geb Bab-Jehová, Samuelʼse gannar gornonikid:
—¡Samuel! ¡Samuel!
Samuel abin-imakded:
—Dummad, soge, an be-itomai.

11 Geb Bab-Jehová ega sogded:

—Nue itogo. An Israel-yargi ibmar-imaksokalid dulemar wisgualile, bela-bela gwakidmaloed. 12 A-ibagine, an Elíʼgi sabsur-ibmar-sogsagusadi bela an imakoed. An Elí-e-gwenadgan sabsur-odurdakoye-sogsabalid bela an imakbaloed. 13 Deunni, an Elíʼga sogsa gusad, be-machimala-e-isgusad-ulale, degisadegu an be-gwenadgan sabsur-odurdakdii guedseye. Ar Elí, e-machimala-angi-dododimalad nue-wisinad, degite, ese gwen-ulussulid.

14 ”Degisoggu, Elí-gwenadgangi an ise-sogar-sogsunnad: ‘Bipisaar anga-ibdurgan-oburgwileged, degi, anga-ibmar-ukleged, Elí-e-gwenadgan-e-isgued osulogosulid.’ ”

15 Geb a-sorbali, Samuel gabided. Oibosadgine, Samuel, Bab-Dummadse-goled-neg-yawagak egasad. Degi, Elíʼga negburgan-daksad dobe-soge gualid. 16 Geb Elíʼdi, Samuelʼse gochasunnad:

—¡Machi, Samuel!
Samuel abin-sogded:
—Soge.

17 Geb Elí ese egichialid:

—¿Ibu Bab-Jehová bega sogsa? Bab-Jehová-bega-ibmar-sogsad bela be anga sogo, mer be angi ibmar-odukuo. Ar ibmar-soggwen be angi odukusale, Bab-Dummadse be sabsur-odurdaklegoed.

18 Samuel, Elíʼga bela ibmar-sogsad, gwen bipisaale egi ibmar odukussulid. Geb Elí sogded:

—Edi Bab-Jehováʼsoggu, na e-dakedba bur ibmar-nued imakodo.

19 Samuel dungumaidba, Bab-Jehová eba gudii gusad. Bab-Jehová, Samuelʼga-ibmar-sogsa-gusad, bela sogedba ega imaksad. 20 Bela Israel-dulemar Dan-yar-akale, Beersebaʼse wisgusmalad, Bab-Jehová e-gayaburba-barsogega Samuel-susye.

21 Deginbali, Bab-Jehová Silo-neggweburgi Samuelʼse gornonidaed, adi, e-gayaburba ega sogegar. Samuel, Bab-Jehová-ega-ibmar-soged, bela Israel-dulemarga sogdaed.

<- 1 Samuel 21 Samuel 4 ->