John Ooba Ts'et Hahónkat-un 5

'Udustl'us ook'une'úsguz-i, 'i Yak'usda be 'usbaiyaz yílhchoot

1 Njan 'et whunus'en, mbe la kw'uts'uzda cho dizti'-i yuk'usda-un, 'en nailhni ts'unguz dula be 'udustl'us lhch'az ts'e ook'une'úsguz-i, 'ink'ez 'udustl'us lhyúnduniduz. 'Ink'ez lhtank'ant'it-un, 'et bune'dilhze.

2 'Et 'ilhoghun lizas soo ulhtus-un tís'en. 'Ink'ez tube cho njan dutni, “Mbe soo 'uldzoo'-un, 'en ndi 'udustl'us yadáha' dutilhch'ulh 'ink'ez lhehaíduntidus?”

3 Ndo yak'uz, k'us yun k'ut, k'us yun t'ah cha, 'aw 'ilhoghun soo lhé'ildzoo'-un hooloh ndi 'udustl'us yadáha' dutilhch'ulh k'us yuntilh'elh huba.

4 'Ink'ez 'aw 'ilhoghun soo lhe'ildzoo' ndi 'udustl'us yadáha' dutilhch'ulh, 'ink'ez yuk'uyatilhduk k'us yuntilh'elh. 'Aw nahuyólhtelh ait'oh, 'et huwa tube huwose.

5 'Et 'ilhoghun 'utso whudilhdzulh-un, 'en 'usúlhni, “Intso iloh! Nilh'en Judah bulh didowhne bubukhuna-i cho, lion huyúlhni, mbe la lerwe David ts'u haínzut-un, 'en 'uja ts'iyantsuk whuch'a' nilhde. 'En za soo 'úldzoo' ndi 'udustl'us yadáha' dutilhch'ulh, 'ink'ez ndi lhtak'ant'i be lhúnedilhze-i yadáha' dutilhch'ulh.”

6 'Et ndet la whutís'en tube sba hooncha. Ndi kw'uts'uzda cho dizti'-i 'ink'ez ndi dunghi hoonliyaz 'usjiz-i, 'ink'ez 'utso whudilhdzulhne butoh cha, 'et 'usbaiyaz 'ilho hizilhghi-i doút'en 'et usyin. Oode lhtak'ant'i 'ink'ez lhtak'ant'i 'una cha unli. 'I oona 'i 'unt'oh Yak'usda ooch'e' unli lhtak'ant'i nududeh-i. 'I ndi yun k'ut ndulcho whe whél'a'.

7 'Et ndi 'usbaiyaz mbe la kw'uts'uzda cho dizti'-i k'usda-un, 'en nailhni ts'ungus 'udustl'us yoontun-i, 'i yula k'éhayan'ai.

Yak'usda be' 'usbaiyaz 'aw 'en za soo 'uldzoo'

8 'Et ndi 'udustl'us yílhchoot ibulh, ndi dunghi hoonliyaz 'usjiz-i, 'ink'ez nat whúnizyane 'on 'at dine tso whudilhdzulhne cha, ndi 'usbaiyaz hibut nacháhunildil. 'Ilhoghun hinli ts'iyawh nela be, be ts'ujun-i nuhúle, 'ink'ez tsets'ai gold unli-i, 'i ndi dizk'un-i sooltsun-i bet whúdizbun. 'I ndi 'i 'unt'oh mbene la Yak'usda ooch'e'ne butenadudli 'unt'oh.

9 'Ink'ez 'andidi shun 'i hiyé whenijun whe nja duhutni,

“Ndi 'udustl'us itálhchulh

'ink'ez oodáha' datalhch'ulh 'et huba soo 'íldzoo'.

Dune nyozilhghi 'ink'ez 'uyoonne ts'iyanne didohne,

'ink'ez lhelhts'un un'a yalhdukne cha,

'ink'ez 'uyoonne dune,

'ink'ez lhelhdun keyoh whut'enne cha,

nyuzkai' be Yak'usda ba naneonket, 'et huwa.

10 'Ink'ez neYak'usda ba lerwene

'ink'ez lubretne nezilhtsi.

'Ink'ez ndi yun k'ut k'úne' ts'otil'elh ha uzdutálts'ilh.”

11 'Et njan whutís'en 'ink'ez whudásts'o ndi kw'uts'uzda cho dizti'-i, 'ink'ez hoonli usjiz-i cha, 'ink'ez 'utso whudilhdzulhne, 'enne cha, 'enne bunat lhane lizasne, 'enne whuz huldlai k'et 'aw buts'olhto ait'oh,

12 'enne tube cho njan duhútni,

“Ye ulhtus-i, hiye hoonzoo 'unt'oh-i,

be whútnih-i,

'ink'ez nut'i cha, be uzdizti'-i,

'ink'ez be hóot'en-i,

'ink'ez ts'uhoont'i' te bé ne'ts'ul'en-i,

'usbaiyaz hizilhghi-i,

'en 'unt'oh ndowhi ts'iyawh huba soo 'úldzoo' whe whuz un'a uzdólhti'.”

13 'Ink'ez ndai la usjiz ndo yak'uz 'unt'oh-i, ndi yun k'ut cha, 'ink'ez ndi yun oot'ah ts'e cha, 'ink'ez dai la ya too k'ut hoonli-i, 'enne ts'iyawh njan duhútni whe ubudusts'o,

“Ts'uhóont'i' te bé ne'ts'ul'en-i,

be uzdizti'-i, be hóot'en-i,

'ink'ez ts'iyantsuk ook'une' whut'en-i cha,

mbe la kw'uts'uzda cho dizti'-i k'usda-un cha,

'ink'ez 'usbaiyaz hizilhghi-i cha,

'ilhiz 'ink'ez 'ilhiz wheni buch'e' yole'.”

14 'Et ndi dunghi usjiz-i, 'i 'utni, “'Et ndo honeh!” ni. 'Ink'ez nat whunizyat 'on 'at dine 'utso whudilhdzulhne, oobut nacháhunildil 'ink'ez ndun 'ilhiz wheni khuna-un hits'u teni' nalhdzin.

<- John Ooba Ts'et Hahónkat-un 4 John Ooba Ts'et Hahónkat-un 6 ->