Ashaen'cho 33

Jacob, Esaúi'ccu ñoquicco'fa'cho

1 Jacobja Esaú cuatrociento a'i'ccu jiña'choma attepa tise du'shuma attufaen tise'pa mamandeccui'ccu, nane Lea, Raquel, toya'caen tsa dos sema'su pushesundeccui'ccu. 2 O'tie tsu dos sema'su pushesundeccuma tise'pa dushundeccui'ccu ccutsian. Tsendeccumbe sepaccofanga Leama tise dushundeccui'ccu ccutsian. Tsutopani Raquelmajan tise du'shu Joséi'ccu ccutsian. 3 Tsa'caen tsomba tsendeccumbe otufanga japa siete se andenga puntssa'ñacca tise antianga catseye jayi. 4 Tsa'ma Esaúja Jacobma attepa buttoin jipa munsin ancamba mocha. Tsa'caen tsomba poiyi'cco fae'ngae i'na'fa. 5 I'na pasapa Esaúja pushesundeccu, dushundeccuma'qque attepa iñajampaña:

—Vandeccuja, ¿ma'candeqquia tsu?

Tsonsi Jacobja su:

—Chiga quema shondo'suma ñotsse in'jamba afe'cho dushundeccu tsu.

6 Tsonsi dos sema'su pushesundeccuja tise'pa dushundeccui'ccu catsepa andenga puntssan'fa. 7 Omboe Leaja tise dushundeccui'ccu catsepa tsa'caeñi puntssan'fa. Tsambe omboe José, tise mama Raqueli'ccu catsepa tsa'caeñi tson'fa. 8 Tse'faei'ccuyi Esaúja iñajampaña:

—¿Ma'caen tsoñe qui in'jan tsa tsain'bitssi naccuve ña jiñamba atte'choma?

Tsa'caen iñajampañasi Jacobja su:

—Tsata tsu que ñama ñotsse tsoñe afe'je'cho.

9 Tsa'ma Esaúja su:

—Me'in, ña antian, nanitsse gi ña'qque an'bian. Quembema queyi an'bianjan.

10 Tsa'ma Jacobja ccase su:

—Me'in, que ñama ñotsse in'jan'da, chigáne tsa afe'choma isuja. Nane que tayo ñama ñotsse chigambiamba in'jansi gi avujatsse Chigama atteqquia'caen quema atte. 11 Tsa'cansi gi iñajan quenga afeye i'choma isuja. Nane Chiga tsu ñama ricove tsonsi gi osha'choma shacambitsse an'bian.

Tsain'bitsse tsa'caen iñajansi Esaúja tsa afe'choma in'jamba isu. 12 Isupa su:

—Ñotssi tsu. Jinge va'ttie jaye. Ñajan quema o'tie gi jaya.

13 Tsa'ma Jacobja su:

—In'jan'cho antian, que'qque qui atesu du'shuja oshaya'bi. Toya'caen oveja suri, vaura surimanda tsu in'jaña'cho. Nane quian'me anga'nijan junde tsu quimbipa fae a'tayi poiyi'cco oveja paya. 14 Bove ñotssi tsu queja injanga quema shondo'suma o'tie jaye. Tsonsi ñajan vasia've ma'caen ñama o'tie jayi'cho aiña'cho, toya'caen dushundeccu oshaqquia'caen jipa quema Seirni cachuiya.

15 Tsonsi Esaúja su:

—Ñotssi tsu. Tsa'ma antteja ñai'ccu ji'cho aindeccu'suma quenga catiye cuintsu quema fuite'faye.

Tsa'ma Jacobja su:

—Me'in, quema noñangiañe in'jambi gi.

16 Tsequi a'tayi Esaúja toequi Seirni ja. 17 Tsa'ma Jacobja Sucotni ja. Tse'ttinga tisumbe tsao'ñamba aiña'cho ttuccuve'qque ñoña. Tsa'cansi tsu tse'ttima inisian Sucot.

18 Jacobja Padan-aramne sombopa quinsetssi mingae dambe'yi Canaán andeni nepipa Siquem canqque pporotsse tise carpama ccutsian. 19 Nane cien corifin'di'ccu Hamor dutssiyendeccuma andeve chava tseni tise carpama ccutsiañe. Siquem'qque tsu Hamor dutssi'ye. 20 Can'jemba tsu Chiganga afe'jeya'chove ñoñamba inisian El-Elohe-Israel.

<- Ashaen'cho 32 Ashaen'cho 34 ->