SAN MARCOS 7

'E un'lɨ́ɨi'³ tsá² tyani Dios

1 Joon galicaain²¹ tsá² tya' coon²¹ poo²¹² sii²¹ fariseos coon'¹³ 'inlɨ́ɨi¹³ tɨfo'² tya' ley lɨ siin'¹² Jesús. 'In tɨfo'² do jalíin² Jerusalén. 2 Joon 'in tsá² lo gacón² cwáain¹ 'e 'in tsá² tya' Jesús néei¹ gø'¹ø joon 'lɨɨ'² cwoo²¹o. 'øøi'²¹‑tsi tsá² 'e jo mo jngɨ́ɨ² cwoo²¹ la tɨɨsi'², 'wii'¹³ joon gafaa'²¹a 'láai². 3 Jileei'²¹ fariseos coon'¹³ tsá² seein²¹ Israel jmoo¹o la lɨ́² gajmaa¹a 'lɨɨ²¹² tsacøøi'¹³. Jo dø'¹ tsá wana jo jngɨ́ɨ² cwoo²¹ la tɨɨsi'² mo jéei¹. 4 Mo jalíin² 'moo'¹³ jo dø'¹ø wana jo mo run'²un cwoo²¹ la tɨɨsi'². Joongɨ lɨ́ɨ¹ 'láai² jilaa'²¹ tɨɨsi'² 'e sá² calɨɨ jmoo¹o. Jmoo¹o tsá² la tɨɨsi'² run'²un tasa 'un'²un jmɨɨ²¹ joon tsʉʉ² coon'¹³ jilaa'²¹ nii² 'e jmaai'²¹ to² mo gø'²ø. 5 Joon 'in fariseos do coon'¹³ tɨfo'² tya' ley do gaunngɨɨ¹ɨ Jesús jin'²in:

―¿'Ee lɨ' jo jmoo¹o tsá² tyi'i la lɨ' gajmaa¹a 'lɨɨ²¹² tsacøøi'¹³ tyi'? Gø'²ø pe jo mo run'¹un cwoo²¹o la tɨɨsi'².

6 Joon gañii¹i Jesús:

―Calɨɨ 'in gafaa'²¹a júu³ tya' Dios sii²¹ Isaías gajmaa¹a coon²¹ jí². Joon tsi jí² do gafaa'²¹o xiiala lɨ́ɨ²naa' tsá² 'in jo tiin'¹³ 'e 'e'²e tsá² xeei'²¹. Gajin'²in ni jí² do:

'In tsá² lo untyúi¹ Dios jiin'¹³ coon'¹³ 'e faa'²¹a pe jo tɨ́²‑tsi jiin'¹³ la to² tyʉ'² Dios.

7 Jo 'e to² 'íi³ 'e un'goo²¹o jna. Jilaa'²¹a 'e 'e'²e tsá² jiin'¹³ lɨ' to² tyʉ'² tsá², jin'² Isaías.

8 Faa'²¹gɨ Jesús jin'²in:

―Ga'íin²mo‑'oo' jilaa'²¹ to² tyʉ'² Dios, pe coon'²¹ tún² jmoo²oo' la tɨɨsi'² 'e jmoo¹o tsá² la mo jéei¹ la rúun¹³uun' tsʉʉ² joongɨ tasa 'uun'²¹un jmɨɨ²¹. Joongɨ 'láa²mo 'e lɨ la lɨ 'elo jmoo²oo' la jmoo¹o tsá².

9 La joongɨ gajin'² Jesús:

―'Iin²¹² 'naa' núu³gɨɨ' la to² tyʉ'² 'lɨɨ²¹² tsacøøi'¹³ jon'gɨ la to² tyʉ'² Dios la no. 10 La lɨ gajin'² Moisés calɨɨ mo gacwo'¹o tsá² ley: “Un'gøø'²¹mo'o ñʉ'²'ʉ coon'¹³ saa²'a.” Joon gajin'²in: “'In sɨɨ'²¹ júu³ 'laa'²¹ jmii²¹ sɨ sáa³a 'ee 'ná¹ jnga'²mo tsá² 'ii.” 11 Pe joon, 'naa'gɨɨ', jo cwoo²oo' júu³ 'e uncoon'¹³ tsá² jmii²¹ sɨ sáa³a 'ee wana gajin'²: “Jilaa'²¹ 'e sá² tyiia 'e lí² uncoon'¹³ jna 'nʉ lɨ́ Corbán.” ('øøi'²¹‑tsi tsá² jin'²in: nigacwo'³oo Dios.) 12 Wa'a jin'² tsá² la no, joon 'naa'gɨɨ' jo cwoo²oo' wa'a uncoon'¹³on sáa³ jmii²¹. 13 Mo jmoo² 'naa' la joon tʉ¹oo' júu³ tya' Dios lawa'a jo 'e tyiin²mo. 'Iin²¹²gɨɨ' jmoo²oo' tɨɨsi'² 'e gacwo'¹ tsá² 'naa' lagɨ júu³ tya' Dios. Joongɨ lɨ́ɨ¹ 'láai² tɨɨsi'² 'e jmoo²oo' la lɨ́¹ 'elo ―jin'² Jesús sɨɨ'²¹ɨ 'in tsá² fariseos coon'¹³ tɨfo'² tya' ley.

14 Joon gatø'¹ Jesús 'in tsá² fúui¹ taain²¹² do joon gajin'²in:

―Nʉʉ²duu' jilaa'²¹ 'e fo'²oo lo. Joon cwo'øøi'²¹‑'oo'. 15 Jilaa'²¹ 'e gø'² tsá² jo lí² un'lɨɨi'³ 'ii la joon. Jiin'¹³ 'e 'woo²¹ tsi tsá² 'e jmoo¹o 'e faa'²¹ tsá² 'e joon un'lɨɨi'³ tsá². 16 Wana sá² loocwoo¹oo' nʉ́ʉ²duu'.

17 Mo gatíui² Jesús tsá² joon ga'í² coon²¹ inʉʉ joon gaunngɨɨ¹ tsá² tya'a 'ee 'e júu³ gatyaa¹ do. 18 Joon gajin'² Jesús sɨɨ'²¹ɨ 'ii:

―¿Tɨ jon'gɨ 'naa' 'øøi'²¹‑'oo'? Ní²‑i 'naa' 'e jilaa'²¹ 'e gø'² tsá² jo tsatoo'¹³ tsi alma tya' tsá² pe jiin'¹³ tu'²o. 19 Joon mi yuui'¹³ joon 'woo²¹o fu caluu tún¹. 'Wii'¹² joon jo lí² un'lɨɨi'³ tsá² tyani Dios.

'Wii'¹³ jiin'¹³ coon'¹³ júu³ la joon jin'² Jesús 'e lí²‑i dø'¹ tsá² doñi'ee. 20 Jin'²o jon Jesús:

―'E 'woo²¹ lɨ tsi alma tya' tsá² 'e joon un'lɨɨi'³ tsá² tyani Dios. 21 Tsʉ lɨ tsi alma tya' tsá² 'øøi'²¹‑tsi 'e 'øøi'²¹‑tsi tsá². Lɨ' alma tya' tsá² 'woo²¹ jilaa'²¹ 'e gó² 'e 'ɨ¹‑tsi tsá². Do‑o 'ɨ¹‑tsi 'e lɨ́² feei'² tsamɨ́² tsá² xeei'²¹ sɨ doñi'ee 'e gó² 'ɨ¹‑tsi tsá² cwáain¹ tya' tsamɨ́² sɨ tsañʉʉ'¹ 'ee. Do‑o 'ɨ¹‑tsi tsá² wa'a jngaa'¹²i tsá² 22 sɨ jmoo¹o 'uun²¹ 'ee. Tsi alma tya'a gali'iin²¹²in tsá² jilaa'²¹ 'e sá² tya' tsá² xeei'²¹; 'aa'¹a tsii²¹² wúu¹i; jmoo¹o júu³ 'atsaa²¹; 'ɨ¹‑tsi jiin'¹³ tya' 'ña'a. Jo li'³i 'e jmáa¹a. 23 'Wii'¹³ 'ɨ¹‑tsi tsá² jilaa'²¹ 'elo, 'wii'¹³ joon 'in 'lɨɨ'³mo 'ii tyani Dios.

Jaain²¹ 'yiia²¹² tsá² coon²¹ fuu²¹ 'in jo'¹ galɨ́ɨi² júu³ tya' Jesús

24 Joon gangó¹ Jesús fu coon²¹ fuu²¹ sii²¹ Tiro coon'¹³ Sidón. Joon ga'í² coon²¹ inʉʉ. Joon jo 'iin²¹²in wa'a liñi¹ tsá² coonti pe jo galɨ'²ɨ jiin'¹³ la gali'iin²¹²in. 25 Joon tsifu galiñi¹ jaain²¹ tsamɨ́². Joon 'in xuui²¹² tya' 'in tsamɨ́² lo 'yuui² 'in 'lɨɨi'³ alma tya'a. Joon gajó² 'in tsamɨ́² do gasii'²¹i 'wojníi¹i wii²¹² tɨɨ² Jesús. 26 'In tsamɨ́² lo galiseein²¹ Sirofenicia, jon' tsagoo¹ tsá² seein²¹ Israel. Pe gajó² jamɨɨ¹ɨ tyani Jesús wa'a tyii²in 'ido 'in 'lɨɨi'³ 'yuui alma tya' jóon¹on. 27 Pe Jesús gasɨɨ'²¹ɨ 'ii:

―Cwo²du'u jéei¹ wa'a dø'¹ xuui²¹² lagɨ tsii²¹ tsʉ jo tseein²¹ tyii²¹i' 'no'³ gø'² xuui²¹² joon cwóo¹³o' tsii²¹.

28 Pe joon gañii¹i 'in tsamɨ́² do jin'²in:

―Jo'¹o, pe cagɨ tsii²¹ 'in tee'¹² nʉ' mesa gø'²o 'no'³ xʉʉ'²¹ mo gø'² xuui²¹².

29 Joon gajin'² Jesús sɨɨ'²¹ɨ 'in tsamɨ́² do:

―Tyʉ́²‑ʉ la gafa'²'a. Lí²‑i cwoo'²mo'o no nicwo'ɨ́ɨ¹ɨ 'in 'lɨɨi'³ 'yuui² alma tya' xuui²¹² tyi'i.

30 Joon mo gatyee'¹²i tya'a gatsee'²¹i xuui²¹² tya'a raain¹ ni coo'mó². Nicwo'ɨ́ɨ¹ɨ 'in 'lɨɨi'³ 'yuui² alma tya' 'ido.

Un'láai² Jesús jaain²¹ tsá² cwuui²¹² jo faa'²¹

31 Gacwo'ɨ́ɨ¹ Jesús co' fuu²¹ Tiro gangɨ́ɨ¹i Sidón joon ngɨ́ɨ¹i fu lɨ' co' Decápolis, joon gatyía¹ tɨ' jmɨɨ²¹ tyíia¹ Galilea. 32 Joon mo gatyía¹ do joon gangajée¹i tsá² jaain²¹ tsá² cwuui²¹² 'yʉcaai²¹² jo faa'²¹. Joon gamɨɨ¹ wa'a taan¹ Jesús cwoo²¹o tya' 'ido. 33 Joon gangajéei¹ Jesús 'ii coon²¹ lɨ jo 'in tsá² jǿø². Joon gafoo'²¹ Jesús uniicwoo²¹o tsi loocwoo²¹ 'ido. Joon ga'ñíi¹i joongɨ galii'²¹i uniisɨɨ'¹³ 'ido. 34 Joon gajǿø² lɨ' ñʉ'fú² gasaai²¹‑tsi joon gajin'²in:

―¡'Efata! ('øøi'²¹‑tsi jin'²in: ¡Néei² 'wo'o!)

35 La joon ganó¹ loocwóo¹o. Sɨɨ'¹³ɨ galɨ́² tyʉ́²‑ʉ joon galɨ́²‑ɨ faa'²¹a røø²¹. 36 Joon gajin'² Jesús sɨɨ'²¹ɨ 'in tsá² 'in gajée¹i 'in jo faa'²¹ do:

―Jo 'in fuu²uu' ce jiin'¹³ jaain²¹.

Pe lɨ' tyʉ'²gɨ to² 'e sɨɨ'²¹o tsá². 37 Lɨ́ɨ¹ tsa'goo²¹‑tsi tsá², joon jin'²in:

―Jilaa'²¹ 'e jmoo¹o 'ino 'e tyʉ́² tsʉ ca 'in cwuu²¹² jmoo¹‑o núu²un joongɨ 'in jo faa'²¹a jmoo¹‑o 'e faa'²¹ 'ido.

<- SAN MARCOS 6 SAN MARCOS 8 ->