2.KING 24

1 Iwe, lon fansoun än Jehoiakim nemenem, Nepukatnesar ewe kingen Papilon a tolong lon Juta. Jehoiakim a fangatä o nom fän nemeneman lon ükükün ülüngat ier. Mürin, Jehoiakim a ü ngeni Nepukatnesar. [~1~] 2 Iwe, ewe Samol mi Lapalap a tinala mwichen sounfiu seni Papilon, Siria, Moap me Amon, pwe repwe maun ngeni Jehoiakim o ataela ewe fanü Juta, usun nöün kewe chon angang ekewe soufos ra fen apasa fän alon. 3 Ellet, ei feiengau a fis ngeni chon Juta fän än ewe Samol mi Lapalap allük, pwe epwe atorowu seni fän mesan pokiten ekewe tipis meinisin ewe king Manasa a föri, 4 pwal pokiten än Manasa niela chomong aramas esap wor ar tipis, pwe Jerusalem a kula ren char. Iwe, ewe Samol mi Lapalap esap amusala an tipis. 5 Nge lusun pworausen än Jehoiakim föför meinisin a mak lon puken uruwon ekewe kingen Juta. 6 Iwe Jehoiakim a mäla, nge Jehoiachin nöün we mwän a siwili lon wisan wisen king. 7 Nge ewe kingen Isip esap tösefäliwu seni fanüan, pun ewe kingen Papilon a liapeni meinisin mine a nom fän nemenien ewe kingen Isip me mwan seni ewe öüwön Isip tori ewe chanpupu Oifrat.

Jehoiachin me ekewe samol ra oola Papilon

24.8-17

(2.Kron 36.9-10)

8 Iwe, Jehoiachin a ierini engol me walu, lupwen a tolong lon wisan wisen king. A nom lon Jerusalem o nemeni Juta lon ükükün ülüngat maram. Iten inan Nehusta nöün Elnatan we fefin seni Jerusalem. 9 Nge Jehoiachin a föri mine a ngau me fän mesen ewe Samol mi Lapalap, usun chök mine saman we a föri.

10 Lon ena fansoun nöün Nepukatnesar ewe kingen Papilon kewe meilap fiti nöür sounfiu ra feito Jerusalem o pwelifeili fän pisekin maun. 11 Nepukatnesar ewe kingen Papilon a pwal feito Jerusalem, lupwen nöün kewe sounfiu ra pwelifeili ei telinimw fän pisekin maun. 12 Iwe, Jehoiachin ewe kingen Juta a fangatä ren ewe kingen Papilon, i me inan, nöün chon angang me ekewe aramas tekia, pwal nöün kewe nöüwis meinisin. Lon awaluen ierin mwün, Nepukatnesar a fötekini Jehoiachin, [~2~] 13 o uwala ekewe pisek aüchea meinisin seni lon imwen ewe Samol mi Lapalap, pwal seni lon imwen ewe king. A ettätiu ekewe kolt meinisin seni pisekin lon imwen ewe Samol mi Lapalap, Salomon ewe kingen Israel a föriir, pun iei usun ewe Samol mi Lapalap a fen apasa. 14 Iwe, ewe kingen Papilon a uwala ekewe chon oola meinisin seni Jerusalem, ekewe meilap me ekewe sounfiu mi pöchökül o pwora, irfengen meinisin engol ngeröü. A pwal uwala ekewe souangang me ekewe chon üsümächä. Esap chüen wor eman a nonom, chilon chök aramasen ewe fanü mi fokun mwelele. 15 Nepukatnesar a uwala Jehoiachin seni Jerusalem tori Papilon, fiti inen ewe king me pwülüan kewe, nöün kewe nöüwis me ekewe souakomwen ewe fanü. [~3~] 16 A pwal uwala Papilon ükükün fisu ngeröü mwän mi pöchökül o pwora, pwal engeröü souangang me chon üsümächä, ir meinisin ra pöchökül o tufich ngeni maun. 17 Iwe, Nepukatnesar a seikätä Matania pwin semen Jehoiachin, pwe epwe siwili Jehoiachin lon wisan wisen king, nge a siwili itan ngeni Setekia. [~4~]

Usun än Setekia nemenem

24.18-20

(2.Kron 36.11-12; Jer 52.1-3)

18 Iwe, Setekia a ierini rüe me eu, lupwen a tolong lon wisan wisen king. A nom lon Jerusalem o nemeni Juta lon ükükün engol me eu ier. Iten inan Hamutal nöün Jeremaia we fefin seni Lipna. [~5~] 19 Nge Setekia a föri mine a ngau me fän mesen ewe Samol mi Lapalap usun chök mine Jehoiakim a föri. 20 Iwe, pokiten ewe Samol mi Lapalap a song ngeni ekewe chon Jerusalem me chon Juta, a asürela seni fän mesan. Nge Setekia a ü ngeni ewe kingen Papilon. [~6~]

<- 2.KING 23 2.KING 25 ->