1 Ikkei ekewe mwich seni ekewe mwirimwirin Aaron. Nöün Aaron kewe mwän: Natap, Apihu, Eleasar me Itamar. 2 Iwe, Natap me Apihu ra mäla mwen semer we, nge esap wor nöür. Iei mine Eleasar me Itamar ra wiseni ewe wisen souasor. [~1~] 3 Tafit a kinietiu ekewe mwirimwirin Aaron lon eu me eu mwich lon ükükün ar kewe angang, nge Satok eman mwirimwirin Eleasar pwal Ahimelek eman mwirimwirin Itamar ra alisi. 4 Iwe, a pwä pwe mi wor chomong mwänirelan ekewe famili lein ekewe mwirimwirin Eleasar lap seni lein ekewe mwirimwirin Itamar. Iei mine ra kinietiu ekewe mwirimwirin Eleasar lon engol me wonu mwich, nge ekewe mwirimwirin Itamar ra kinietiu lon walu mwich. 5 Pokiten mi wor meilapen ewe leni mi pin, pwal nöün Kot kewe chon angang mi lap lein ekewe mwirimwirin Eleasar, pwal lein ekewe mwirimwirin Itamar, iei mine ra awisa ngeni eu me eu mwich an angang fän üttüt. 6 Iwe, ekewe mwirimwirin Eleasar me ekewe mwirimwirin Itamar ra akasiwil le üttüt. Ewe soumak Semaia nöün Netanel we mwän seni ewe ainangen Lefi, a makeetiu iter me fän mesen ewe king me nöün kewe nöüwis, Satok ewe souasor me Ahimelek nöün Apiatar we mwän, pwal fän mesen ekewe mwänirelan än ekewe souasor famili me mwänirelan än chon ewe ainangen Lefi famili.

7 Iei pwüngülan ar we üttüt: Ewe aeuin Jehoiarip a ütti, ewe aruuan Jetaia, 8 ewe aülüngatin Harim, ewe arüanün Seorim, 9 ewe alimuan Malkia, ewe awonuan Miamin, 10 ewe afisuan Hakos, ewe awaluan Apia, 11 ewe atiuan Jesua, ewe aengolun Sekania, 12 ewe engol me euin Eliasip, ewe engol me ruuan Jakim, 13 ewe engol me ülüngatin Hupa, ewe engol me me rüanün Jesepeap, 14 ewe engol me limuan Pilka, ewe engol me wonuan Imer, 15 ewe engol me fisuan Hesir, ewe engol me waluan Hapises, 16 ewe engol me tiuan Petaia, ewe arüeen Jeskel, 17 ewe rüe me euin Jakin, ewe rüe me ruuan Kamul, 18 ewe rüe me ülüngatin Telaia, ewe rüe me rüanün Masia. 19 Ikkei ir ekewe mwän mi kefilitä lon tettelin ar kewe angang, lupwen repwe feito lon imwenfelin ewe Samol mi Lapalap, pwe repwe föri pwüngün ar angang won mine a fen pwüngüla me ren Aaron ar we lewo, usun mine ewe Samol mi Lapalap ewe Koten Israel a allük ngeni.

20 Iwe, ikkei ir ekewe lusun mwänirelan mwirimwirin Lefi: Seni ekewe mwirimwirin Amram: Sepuel, nge seni ekewe mwirimwirin Sepuel: Jeteia. 21 Seni ekewe mwirimwirin Rehapia: Isia ewe samol. 22 Seni ekewe mwirimwirin Isar: Selomit, nge seni ekewe mwirimwirin Selomit: Jahat. 23 Nge nöün Hepron kewe mwän: Jeria ewe mwänichi, Amaria ewe aruomanün, Jahasiel ewe aülümanün, Jekameam ewe afömanün. 24 Iwe, seni ekewe mwirimwirin Usiel: Mika, nge seni ekewe mwirimwirin Mika: Samir. 25 Pwin Mika: Isia, nge seni nöün Isia kewe mwän Sekaria. 26 Iwe, nöün Merari kewe mwän: Mali me Musi pwal Jasia. 27 Nge ekewe mwirimwirin Merari seni Jasia: Peno, Soham, Sakur me Ipri. 28 Iwe, nöün Mali kewe mwän: Eleasar me Kis, nge esap wor nöün Eleasar. 29 Nöün Kis we mwän Jeramel. 30 Iwe, nöün Musi kewe mwän: Mali, Eter me Jerimot. Ikkei ir ekewe mwirimwirin Lefi lon tettelin ar kewe famili. 31 Iwe, iteiten eman me eman mwänirelan en me an famili pwal eman me eman pwin kükün ra üttüt, usun chök märärir kewe ekewe mwirimwirin Aaron. Ra üttüt fän mesen ewe king Tafit, Satok me Ahimelek, pwal fän mesen ekewe mwänirelan än ekewe souasor famili me mwänirelan än chon ewe ainangen Lefi famili, pwe epwe fat en me an angang.

<- 1.KRONIKA 231.KRONIKA 25 ->