Jeremiyasa 52

Kurakaa Sedekiyasarineetsi putarangana anoo kamankiya

1 Ashiriya, Sedekiyas 21 masachirini taachu, anush Irusarinash kurakaam kínayaru, onsi masach taarangiya. Wanir Libnashchimuncha tputsi, sur Jamutalamuna, Jeremiyasarini wipa. 2 Sedekiyas Jowakim tamarangpari ashiritam nda Apanllee kuk payumaam zandku, mantsir taarangiya. 3 Ashirucha, Apanllsha kizpur Irusarinshuchee, misha Utaáchcheetstam tsiyantarangu, nda pakchiyam istamaam zandku. Watsta, tárangiya.

Sedekiyas Babiloniyashchipa kurak kapungtam tsiyantarangu, kurakaa kuk kapeetarangiya. 4 Sedekiyas kurakaam kinaru taaru, diesash zar, chungash tsup, nuevish masach, anush zar kurak Nabukodonosor wasundurarpa Irusarinshuchee pachamaam naataranganaya. Anush kuseersin, yaktaa ashchiri kátiripeersin, Irusarinash yakat pshtuyaruni, watandpunumun káreeruni, tputsee tpachingayani, atusin, káringashee tínaranganaya. 5 Ashiri yaktaa katiriparusin, yuw Sedekiyas kurakaam kínarangu, an onsi masachsha tatsamoochu, 6 tsup ipunpunarsha, zar nuevish, Irusarinash katungats nduneerangu, ¿Mashta katungeechinllina? 7 Psaan Babiloniyshuchsha sundar tandapunuzee zpeeyarusin, Irusarinash pshtututanana, anoo Sedekiyassha ichingaru wasundurupa arangeemari suwaranganaya. Wapshtu tsimbun tawazindaru tandapunarangana, yuwanung kurak mazaree taarangu, tipuranllizeemsha wayarangana annung suwaranganaya. Suwayarusin, Ortagap kung tit ashiranganaya. 8 Itaru, Kaldewshuchsha sundar kurakangaz Sedekiyasangaz tachitarangsin, Jericoyanung yakat kamatarangsin, putaranganaya. Sedekiyassha wasundurur ichingarusin urkaree kasayarusin, suwaranganaya. 9 Ashirangsin, kurakaa Sedekiyasa, misha tsipasawaatstam kurak putarangusin, Babiloniyashchipsha kurak Nabukodonosorup machtaranganaya. An kurak Hamatash watsapun, Riblash yakat taaru, anush yushindayarusin, kurak Nabukodonosor Sedekiyasaa wanimaam wasundururee kamachtarangiya. 10 Ichtaru, Sedekiyas waana paru, wipaatsima wayarpunoo ktsuparanganaya. Mishat, Utaáshuch tputs kizpureew taarana anootstam wayarpunoo ktsupamaam kamachtarangitamta. 11 Sheeru, anumunsha amuyaatsirisha Sedekiyasa kateenpa kamuriyarusin, wachootssha yuxeersin, Babiloniyap macheersin, tumaneersin, anushurisha tsiparangiya.

Ashiriya, na kamaneena yuwaa Babiloniyashuch tputs kurakaa Sedekiyasarini putayarusin, kiyung yacharangana anootsi.

Apanllish pang' maachtawaa yarangusin, sumaspa muchirangana anoo kamankiya

12 Nabukodonosor Babiloniyash kurakaam kínaru, masach 19, tsupsha zameetpa, zarsha dies taachu, anush guardiya urkar Nabusaradan sur Irusarinush kusarangu, 13 Apanllee pang', misha kurakaatstam pang' kizpur wanasiri, ichingaru Irusarinash pangus taaru, misha kurak tsipasawaa pangu ichingaru tiroorangiya. 14 Babiloniyshuchsha sundar Irusarinaa watandpun tunupeeru kapeetarangitamta. 15 Sheersin, anumunsha Nabusaradan, Irusarinshuchee tputs ichingaru putayarusin, Babiloniyap machtaranganaya. Ashpatam tputs Nabukodonosoraa chinarangitaatssin, anootstaa putarangusin, misha tputsee maachtaa tínamapaneewa putayaritamsin, Babiloniyapsha machtaranganaya. 16 Ashirangsin, yuwaatsimarisha tputs pukir kiyung kachiykusin taakana, anootsimsha mázaree puyaksin, kizarun kanungamaam, atusin, kasaranganaya.

17 Kaldewshuch Apanllish pang' maachee tínamaw taarangu, ngusamb chumbeepimashi anoo, misha tsimbun kshurangam uxinashpatari taarangu, misha kungoom wayarangana maachi kapungu anpatari pátangaranganaya. Sheersin, ichingaru ngusamb chumbeepimashi Babiloniyapsha yátaranganaya. 18 Masunll kapeetamapaneetstam, paalaatstam, mbarin tzatamapanee, misha mangawaatstam, kucharunatam kapungumashi, ichingaru ngusamb chumbeepimashee Apanlleem ungirtamaam payukana anoo yaranganaya. 19 Anumunsha, guardiysha urkar oroo chumbeepimashee, mishat urutam mburshimashee, mangawaatstam pakchimashi, mangawaatstam masunllpani, mangawaatstam kapungumashi, mbarinaatstam uxinash, misha kucharunaatstam kapungumashi, misha mangawaatstam yuwash vinoo Apanlleem muchkana anootstam, 20 mishat yuwaatstam Apanllish pang' tsimbun shurangaru, ngusamb chumbeepimash wayarangana, wakaraam upapchireem ngusamb chumbeepimashpa 12 tínanarangusin, anumunsha ush wayamaam kungoom kapung ksheewamaam kayatarangana, anootstam, misha kurak Salomon Apanlleem pang' tínamaam kamachtarangu, kizpur kayakamuna nda kiloo táchimaam waritaru taarangu. 21 Minamtawari shurangam íwaririni uchu metoro kánuru taaratarangu, anootssha kshurangama 5 metro anumun chawap taturpiru wantsush kurimunaz taarangu, an ngusamb chumbeepimash 7 sentimetru tuwapirini taarangiya. 22 Tsimbunari kshurangam ashimanandari taarangiya. Kshurangamun iwaz ngusamb chumbeepish iripcheew kapunguw minamtawmunari pshkum wayaw wayaw ashirangana. An iripich íwaririni tsimbuna metor kánurangiya. Anumunsha ktam ashchiri iturpiru ngusamb munlliy tamapari ashiru kurakurtaru wanasir taarangiya. 23 Pshkurutaru anumun ktam iturpirangitamta. Minumtawmunari pshkum 96 munlliy tamapari ashiru taarangiya. Anumunsha iwaz 100 munlliy tamapari ashiru taarangtamta. Anpatari ashpiri yaranganaya.

Ashiriya, kamaneena yuwaa Apanllish pang' maachtawaa yarangusin, sumaspa muchirangana anootsi.

Utaáshchee Babiloniyap machtarangana anoo kamankiya

24 Guardiy urkar, Nabusaradan Irusarinshuchee tputs zapan putarangiya. Apanllpanee urkar, Serayasaa putarangiya. Sofoniyasaatstam, apanllpanee urkar istampanee putarangitamta. Mishat, Apanllee pang' ksutamapaneetstam tuchip tputsee putarangitamta. 25 Sheeru anumunsha, yaktashurisha sundaru urkar, misha 7 tputs kurakaa mang' p'tsimpan taarangana anootstam, misha sundarootstam putampanee sheeru, arangeem 60 tputs putarangiya. 26-27 Sheeranllu, Nabusaradan, kurakap Nabukodonosorap, Hamatap tsap, yakat Riblap ashpari machtarangiya. Anush kurak Nabukodonosor pachamaam wasundururee kamachtarangiya. Amb ashirangsin, Utaáchich watsapun kurimunaz taarangiya. Tputs ichingarusin shitungaranganaya.

28 Utaáchchee putayarusin, yusursha putata, putata ashirangsin, zapan putaranganaya. Nabukodonosor kurakaam kinaru, 7 masach taachu, anush Utaáshchee tputs 3,023 putayaru waanpee watsapun machtarangiya. 29 18 masachsha taachu, anushsha 832 Irusarinshucheetssha putayaru machtarangitamta. 30 23 masach taachu, anushsha guardiysha urkar, Nabusaradan 745 tputsee putayaru, washunand Utaáshuchpa 4,600 tputs kurak Nabukodonosor Babiloniyap machtarangiya.

Ashiriya, kamaneena yuwaa Utaáshchee Babiloniyap machtarangana anootsi.

Ashiriya, na kamanchintspa yuwaa kurakaa Jowakima tumanamash tashitungarangana anootsi

31 Utaáchich urkar Jowakim Babiloniyash tsap tumanimash 37 masach taachu, tsupsha 12, zarsha 25 anush minsha tputs Evil-merodak sur Babiloniyshucheem kurak kinarangiya. Ansha Jowakimaa kizpur chinarangu, tumanshishish ishitungarangiya. 32 Ashirangu, Jowakimpa wanasir tsiyatarangsin, kapung chinaranganaya. Anush Babiloniyash kurak putamaw zapantaa taarangsin, itaru Jowakimaatsimari kapung chinarangu, wanasir naparangiya. 33 Amb kurak ashirangu, Jowakimsha anush kissha taarangiya. Tumanamash kamartarangu, anoo yusheeru, nllitarisha wanasir kamartarangu, kurakpasha washunand kuxineersin, katungaranganaya. Amb ashirangu kissha anush taarangiya. 34 Anumun arangeem kurak Babiloniyashuch Jowakimaam watungasheem ichingaru zar katungamaam wayarangiya. Ashirangu, kissha taaku, wachinayaru, anshurisha Babiloniyash tsiparangiya.

Ashiriya, na kamaneena yuwaa kurak Jowakim Babiloniyash tsap tsiparangu anootsi.

[Watamari nuw Jeremiyasi kuki.]