49
Ashikian Jacobnën aín bakë bëchikëkama ká bana
1 Usa 'ain ka Jacobnën kamabi aín bëchikëkama anua unun kixun kamiakëxa: “Kamikëxa anu rikuatsinkë ka 'ë 'urama kamina ukanti 'ain kixun kakëxa, bërí kana usaími 'ëx ñukëbë 'ikanti bana mitsu ñuixunti 'ain:
2 'Ën bëbu bakë bëchikëkama ësokin mitsu kamainun kuati kamina 'ë urama ukanti 'ain,
'ën mitsu kamainun ka kuakan, 'ëx kana mitsun papa Jacob 'ikëbia Nukën 'Ibu Diosan Israel kakinribi anëa 'ain.
3 Rubén, mix kamina 'ën bakë bëchikë apan 'ain,
usa 'aish kamina a irapain 'ëx kushi 'ixun bëchia 'ain,
mix kamina kushi 'ianan raíri kamasamaira 'inuxun 'ain.
4 'Aínbi kamina mix 'ën rëkuë́n bakë bëchikë 'itima 'ain,
mix kamina achúshi baka shërë́ uínbi bëaraisama usaribi 'ain:
mix kamina anu 'ëx 'uxtinu 'ë
'atimaoi an 'ë ñu mëëxunkë 'ën xanubë 'iakën.
5 Simeón 'imainun Leví mix kamina xukë́n rabë́bi 'ain;
usa 'ixun kamina min manë xëtokën 'akin anun bënë́kinshi uni këñuakën.
6 Uinsaranbi kana anumi mitsux timë́kë anu 'ëx 'isamatanin.
Usa 'ixun kamina min chirabakë 'atima okankë anun nishkiani kuanxun unikama 'akën,
usakin 'anan kamina vaca,
aín bënë aín ipukunu 'ikë aín punu tëakësaribi okin 'akën.
7 ¡Usa 'ain kamina mitsux nishi 'atimaira sinánñubu 'ain!
Usa 'aish kamina mitsux ñuina raëkëma 'ikësaribiti sinani nishin.
Usa 'ain kana 'ën mi rabë́ asérabi bëtsi bëtsi menu kuanimi Israel ëmakanuax 'urai
mi amanu amanu kuanun 'imiti 'ain.
8 Judá min xukë́n apankama 'imainun 'anáka kamanribi ka mi rabinuxun 'aia.
Usakin mi rabi ka min xukë́nkamax mi bëmánon nirakëti ñanati tëtúbuti 'ikën,
kamina axa mimi nishkë unikama abë 'akanankin mi kupitanuma 'anuxun 'ain.
9 Judá mix kamina 'ën bakë bëchikë 'ain.
Usa 'aish kamina achúshi 'inuánën tuá bërí kanikënëan 'ain piti ñuina bixun bënë́kinshi tëtúbuxun pitankëx menu rakábukë usaribi 'ain,
usai 'i kamina 'inuán aín titaxa 'ikësaribiti 'iti 'ain
¿Uin kara usaími 'ia mi ubioti kuëënti 'ik?
10 Uínbi ka aín kushi Judá bikuantima 'ikën,
'imainun ka aín manë tsati 'apun tuinkë 'ikëa tuinkë a bikuantima 'ikën,
a manë tsatin 'ibuka unuxun 'aia
usa 'ain ka kamabi menu 'ikë unikaman ax kikësabiokin 'anuxun 'aia.
11 An ka uvas 'apákë kamami bërí kanikë aín burro tëkërë kati 'ikën,
'anan ka aín chupa kamabi uvas baka
vino 'akë anun chukati 'ikën.
12 Aín bërux ka uvas baka vino 'akë aín chëxësamaira 'ikën;
'imainun ka aín xëtakamaxribi vaca xuma uxubëtan sënë́maira uxuira uxu 'ikën.
13 Zabulónën rëbúnkin kamax ka parúmpapa kuëbí tsónuxun 'aia,
anua 'aisamaira manë nunti këñuruti butun a urama kamina 'inuxun 'ain.
Usa 'ain ka min me anua Sidón kakë ëma anu sënë́nbi 'unántiokë 'iti 'ikën.
14 Isacar mix kamina an ñu papikë ñuinanëxa anuxun
pimiti aín xubunu tantikësa 'inuxun 'ain.
15 Uínsaran kara a me upí isanan, anu tantitisa 'ikë isia,
anuax ka aín kaxunu ñu purunux katúbuti 'ikën,
usai 'ikin ka kana 'aima kima tëmëramikin ñu mëëmikë 'iti 'ain.
16 Dannën rëbúnkinën ka aín aintsi 'ibukaman 'apu 'ixun 'akinti 'ikën, ax ka achúshi
uni Jacobnën rëbúnkisa 'iti 'ikën.
17 Dannën rëbúnkinëx ka achúshi runu bai rapasu tsókësa 'iti 'ikën,
usa 'ain ka aín taë tsiputunua aín caballo natëxkëbë anu 'ikë uni pakëti 'ikën,
ësaribi okin kamina axa mitsumi nishkë unikaman 'akëxunbi mikaman 'amitima 'ain,
kixun ka Jacobnën aín bakë bëchikëkama kakëxa.
18 ¡Nukën 'Ibu minmi 'ë ië́miti kana kuëënin! ësokin ka Nukën 'Ibu Dios ñukákin Jacobnën kakëxa.
19 Gad min rëbúnkikamaribi ka suntárunën abë 'akanankin 'anuxun 'aia.
'Aínbi ka ainra abámikin 'anuxun 'aia.
20 Aser min piti ñukama ax ka nëishirabu 'iti 'ikën, usa 'ain ka min piti ñu axribi
'apukaman písa upíbu 'iti 'ikën.
21 Neftalí, ax ka achúshi chaxu uínbi ubíokëma nikë,
aín tuakëxa upíira 'ikë usaribi 'iti 'ikën.
22 José min rëbúnki kamaxribi ka achúshi i baka kuëbí nikë,
axa 'itsaira 'inun bimikësa usaribi 'ianan, pëñanakëkin anun xubu bëarakë me mapubuinkë usarabi 'iti 'ikën.
Usaribiti ka min rëbúnki kamax mekama tsitsirui bukunuxun 'aia.
23 Usa 'ikë ka axa pian 'akanankë unikaman istisama tankin timakin,
aín pia ami pukin ënkinma ubionuxun 'aia;
24 'aínbi ka Josénën rëbúnki kaman aín pëñan kushi uni 'ixun ainra
an 'akatsikixun 'akëxunbi aín pëñan bërëkinma 'ati 'ikën;
usa 'ain kana mi asabika kixun kain. 'Ën 'Ibu Dios a 'ën rabikë kushiira kushi,
¡An ka an ñuina bërúankë unisa 'ixun Israel unibu bërúanti 'ikë!,
25 ¡asábi ka Nukën 'Ibu Dios a 'ën rabikë, an ka mi 'akinuxun 'aia;
Nukën 'Ibu Dios kamabi kushiñuira an ka mi upiokin 'akinti 'ikën!
¡Naíkamë 'ëo manámixunbi ka 'uí 'ibútanun mi upíokin sinánxunti 'ikën!
¡An ka parúmpapa 'ukëmëu 'ikë me anuaxbia 'umpax utanun mi upíokin sinánxunti 'ikën!
¡An ka min ñuinakama tuaia 'anan xanu bakënti aribi upíokin sinánxunti 'ikën!
26 Min papan ka upiokin mi sinánxunkin
aín papan 'asaribiokin mi upíokin sinánxuanxa.
Ax ka bashikama këñúkëbëbi këñutima 'ikën,
upíokin sinánxunkë ax ka Josénën maxkánubi 'iti 'ikën,
akana aín xukë́nkama 'akima 'ën kaísan.
27 Benjamín, min rëbúnki kamaxribi ka tsira 'inu,
në́kënëan pëkarakuantsinkëma 'ain ishi aín piti ninua ñuina bixun,
pitankëxun bari xupibukëbëtan aín tëxëkë a 'ain raíribëtan pikësa usa 'iti 'ain.
Usaribi okin kamina axa mimi nishkin këñukatsikixun 'akëxunbi minra axa mimi nishkë unikama 'ati 'ain.”
28 Ënëkamax ka mapai rabë́ 'imainun rabë́ ñaká Jacobnën bakë bëchikëkama 'iakëxa, usa 'ikë ka aín papan achúshi achúshi upíokin sinánxunkin kakëxa.
Jacob ñua ñuikë bana
29 Achúshi nëtën ka Jacobnën aín bakë bëchikëkama ësokin kakëxa: “Ënuax 'itsama nëtë 'ikëbë kana ñuti 'ain. Usa 'ain kamina 'ë ñuia ënu mainkima anua 'ën chaitiokëkama maían kini anubi 'ë maínti 'ain, ax ka Efrón kakë hitita uni aín me 'ikën, 30 usa 'aish ka Canaán me anu 'ikën; ax ka Macpelá kakë me anu 'ikë kini 'ikën, ax ka Mamré bëmánau 'ikëa Abrahamnën Efrónnën me këñunbi anu aín aintsikama ñuia maínti marua 'iakëxa. 31 Anu ka aín bëchikë kaman Abraham 'imainun aín xanu Sara maíankëxa, 'imainun ka Isaackëñun aín xanu Rebeca aribi maíankëxa, maínña 'aínbi kana 'ënribi anu 'ën xanu Lía maíankën. 32 Anu 'ikë me 'imainun kini ax ka 'ën xutan hitita unikamanua marua 'ikën.” 33 Ësokin pain aín banakamaira kama aín bakë bëchikë ñuixunkin sënë́ontankëx rakabutëkënibi ka Jacob aín bana ñomëtishi ñuakëxa.
<- Génesis 48Génesis 50 ->