HEBREOS 4

1 Mai, Dios cʉ̃ yapaʉ yerijõrõ caãnopʉre marĩ cajããmasĩpeere cʉ̃ caĩcũrĩqũẽ caãno ũnoa maijʉ̃goya mʉjãã yeri ape wãme roro mʉjãã catʉ̃goñarĩjẽrẽ. Baipʉa, ni jĩcãʉ̃ ũcʉ̃ mʉjãã mena macããcʉ̃ jããetibujioʉmi, tiere cʉ̃ camaijʉ̃goeticõãta. 2 Marĩ ñicʉ̃jãã ãnanarẽ Dios cʉ̃ caquetibʉjʉriquerea bairo marĩ cʉ̃ã marĩ tʉ̃gowʉ cʉ̃ yaye queti marĩrẽ cʉ̃ canetõõgariquere. Na pʉame tie quetire catʉ̃goricarã na caãnimiatacʉ̃ãrẽ, tie narẽ wapa mañupã, na majũ jĩcãrõ tʉ̃ni Dios yaye quetire na catʉ̃goʉsaetaje jʉ̃gori. Dios mena tʉ̃goñatutuagaesupa. 3 Marĩ pʉame roque Dios yaye quetibʉjʉriquere cariape catʉ̃goricarã ãnirĩ marĩ jããetagarã Dios yapaʉ cayerijõrĩpaʉpʉ. Baipʉa, marĩ ñicʉ̃jããrẽ na asiari, atore bairo na ĩñupĩ Dios:

“Caãnorẽ bairo mʉjããrẽ ñiña: Yʉ mena caroaro cayerijõrõpʉ di rʉ̃mʉ ũno mʉjãã etaetigarã topʉre,” na ĩñupĩ.

Cabaimiatacʉ̃ãrẽ, Dios pʉame ati ʉmʉrecóore cʉ̃ caqũẽñorĩcãrõ beropʉa merẽ na cayerijãpapaʉre qũẽnoyaparo peticõãmiñupĩ. 4 Jĩcãpaʉ Dios ya tutipʉ atore bairo ĩ quetibʉjʉya ati ʉmʉrecóore cʉ̃ caátiyaparorica rʉ̃mʉ bero macãã rʉ̃mʉrẽ:

“Dios yerijãñupĩ cʉ̃ paariquere yaparori bero pʉgaa pẽnirõ cãnacã rʉ̃mʉ caáto majũ.”

5 Tunu aperopʉ cʉ̃ãrẽ marĩ ñicʉ̃jããrẽ na ĩñupã Dios ya tutipʉ:

“Di rʉ̃mʉ ũno mʉjãã etaetigarã yʉ yapaʉ caroaro yerijõrõ caãnopʉre,”

na ĩñupĩ Dios.

6 Dios yaye quetire catʉ̃gojʉ̃gomirĩcãrã Dios yapaʉ caroaro cayerijõrõpʉre jããẽtĩgarãma, Diore na cabaibotiorique jʉ̃gori. Na bero Dios yaye quetire catʉ̃goricarã pʉame roque jããrã baiyama. 7 Bairi Dios pʉame ape yʉtea cawãma yʉtea cũnemoñupĩ tunu camasã na canetõmasĩpa yʉtea ũnorẽ. Marĩ ñicʉ̃jãã ãnana Diore cabaibotioyaricarã beropʉ David ape tuti bero macããcʉ̃pʉ tunu atore bairo ĩ woaquetibʉjʉyayupi Dios ya tutipʉ mʉjãã yʉ caĩquetibʉjʉatajere:

“Ãmerẽ Dios mʉjããrẽ cʉ̃ caquetibʉjʉgarijere tʉ̃gorã, tiere cateerãrẽ bairo baieticõãña,”

ĩñupĩ David.

8 Josué, Moisés berore marĩ ñicʉ̃jãã israelita majãrẽ cajʉ̃goricʉ pʉame jĩcãpaʉa caroapaʉ cayerijõrõpʉ na cajʉ̃goátácʉ cʉ̃ caãmata, ape rʉ̃mʉ camasã na canetõõmasĩpa rʉ̃mʉ ũnorẽ quetibʉjʉ cũnemoẽtĩbujioricʉmi Dios. 9 Bairi mai, Dios yapaʉ caroaro cayerijõrĩpaʉ cʉ̃ ya poa macããna na caãniparo nicõãña. 10 Dios cʉ̃ paariquere átiyaparori bero, cʉ̃ cayerijãrĩcãrõrẽã bairo ni jĩcãʉ̃ ũcʉ̃ Dios yapaʉ caroaro cayerijõrĩpaʉ caetaʉ pʉame cʉ̃ paariquere jãnarĩ cʉ̃ cʉ̃ã yerijãgʉmi. 11 Torena, marĩ cʉ̃ã tutuaro mena marĩ tʉ̃goñatutuanemorotiya, topʉre etagarã, “Marĩ ñicʉ̃jãã catʉ̃goʉsaetana na cabaiyaricarore bairo marĩ baire,” ĩrã.

12 Dios bʉsʉrique pʉame marĩrẽ cacatirã marĩ ãnio joroque marĩ átiya. Ñosẽricapãĩ pʉga nʉgõã caoripãĩ marĩ yeripʉ caetarore bairo niña Dios bʉsʉrique. Tipãĩ netõrõ etamasĩña Dios bʉsʉrique marĩ yeripʉ, marĩ catʉ̃goñarĩjẽ nipetiro macããjẽpʉ. Bairi tiere tʉ̃gorã yua, marĩ pupeapʉ marĩ catʉ̃goñarĩjẽrẽ, “Caroa niña,” o “Carorije niña tie,” marĩ ĩ tʉ̃goña besemasĩña. 13 Marĩã, Dios cʉ̃ caátana marĩ ãniña. Bairi ni jĩcãʉ̃ ũcʉ̃ marĩ mena macããcʉ̃ yasioropʉ cʉ̃ caátiere átimasĩẽtĩñami Dios cʉ̃ caĩñajoro. Nipetirije marĩ caátiere masĩpeti majũcõãñami Dios, marĩrẽ caĩñabesepaʉ ãnirĩ.

Jesús es el gran sumo sacerdote

14 Jesús, Dios macʉ̃ pʉame marĩ sumo sacerdote majũrẽ bairo caãcʉ̃ etayupi ʉmʉrecóopʉre. Bairi marĩ pʉame Jesucristo mena marĩ catʉ̃goñatutuacõã ninucũrĩjẽrẽ áticõã ninucũrotiya. 15 Jesús, marĩ sumo sacerdote pʉame marĩ cayeri wẽpʉ̃ẽtĩẽrẽ masĩcõãñami. Bairi marĩrẽ bopacooro majũ marĩ ĩñanemomasĩñami, merẽ cʉ̃ cʉ̃ã bopacooro bairique ũnierẽ marĩrẽã bairo catãmʉoñarĩcʉ̃ ãnirĩ. Bairo cabairicʉ nimicʉ̃ã, cʉ̃ pʉame jĩcã ni ũno roro ápeyupi. Jĩcã ni ũno wãtĩ cʉ̃ caĩrĩjẽrẽ yʉesupi. 16 Bairi uwiricaro mano Diore cʉ̃ marĩ jẽnigarã nocãrõ marĩrẽ camaimajũʉ̃rẽ. Marĩ roro marĩ cabairijere cʉ̃ cabopaca ĩñaparore bairo ĩrã, tʉ̃goñatutuarique mena cʉ̃ marĩ jẽnigarã. Bairo marĩ caápata, marĩrẽ jʉátinemogʉmi popiye marĩ cabairi rʉ̃mʉrẽ, nocãrõ cañuʉ majũ ãnirĩ.

<- HEBREOS 3 HEBREOS 5 ->