Pa rube' re Jesucristo xc'achojsas jun ache cojo tak xalax

1 Re Pedro y re Juan quic'uan-a-qui' je'binak-a pa rachoch re Dios. Las tres re tak'ak'ij jare' tak je'binak-a roma ja hora re' chin oración.[~1~] 2 Y chire' pa rachoch re Dios c'o jun ruchi-jay re nibex La Hermosa cha, y ronojel k'ij c'o ye'beyi'o can jun ache c'utuy-limosna[~2~] chire'. Re jun ache re' cojo tak xalax. Mare' reja' nuc'utuj limosna chique re vinak re ye'oc-apo pa rachoch re Dios. 3 Y tak re Pedro y re Juan ye'oc-yan-apo pa rachoch re Dios, re ache c'utuy-limosna nuc'utuj chuka' chique reje'. 4 Pero re Pedro xutzu-xutzu' re ache, y quire' chuka' xuban re Juan, y c'are' re Pedro xubij: Kojatzu-pa, xcha' cha.

5 Y re ache can xe'rutzu', y ruyaben vo xa c'o jun cosa re xtiquisipaj can cha. 6 Jare' tak re Pedro xubij cha: Yen manak k'anapuak y ni xe-ta sakapuak[~3~] viq'uin[~4~] chin che ninya-ta chava. Xa can xe c'a re yi'on chua roma re Dios, jare' xtinya'[~5~] chava.[~6~] Y can jare' tak re Pedro xubij: Pa rube'[~7~] re Jesucristo aj-Nazaret[~8~] cayacataj y cabiyin, xcha' cha re ache.

7 Y re Pedro xutz'am re rajquik'a' re ache chin xupoba'. Y can jare' xchojmer. Re rakan xe'c'ue-a quichuk'a' y quire' chuka' re rukul tak rakan. 8 Y tak quire' xban cha re ache re', xa jutzoc' xuya' y xbiyin-a. Y junan chic xoc-apo quiq'uin re Pedro y re Juan chire' pa rachoch re Dios.[~9~] Niropin[~10~] c'a binak y nuya' chuka' ruk'ij re Dios. 9 Y camas vinak re xe'tz'eto richin, che nibiyin y nuya' ruk'ij re Dios.[~11~] 10 Re vinak can quitaman che ja ache re' re c'utuy-limosna, re nic'ue' chire' pa ruchi-jay chin re rachoch re Dios re nibex La Hermosa cha. Mare' re vinak re' xsatz quic'o'x chij y quixibin-qui' roma re xbanataj chire' pa rachoch re Dios.

Tak re Pedro xtzijon chiquivach re vinak chire' pa rachoch re Dios

11 Y re ache xc'achojsas man c'a ye'rosk'opij-ta re Pedro[~12~] y re Juan. Y camas vinak re xe'bapon chiquitz'etic chire' pa jun corredor, re banon can roma re Salomón.[~13~] Cha'nin xquimol-apo-qui' re vinak re' roma man jun bey quitz'eton che quire-ta nibanataj. 12 Y tak re Pedro xe'rutz'at re vinak, xubij chique: Nuvinak israelitas, ¿anchique roma tak nisatz ic'o'x roma re xbanataj? ¿Y anchique roma tak ja yoj re yojitzu'? Roma re ache re' xbiyin-a, pero mana-ta re ka-poder yoj re xbano,[~14~] y chuka' mana-ta re otz re nakaban chach re Dios re xbano. 13 Tic'axaj re xtimbij chiva: Re Ajaf Dios re c'o chila' chicaj, re qui-Dios chuka' re kavinak xe'c'ue' ajuer can,[~15~] ancha'l re Abraham, re Isaac, re Jacob. Re Dios can xuban c'a cha re Jesús re Ruc'ajol che c'o ruk'ij.[~16~] Pero yex man xijo-ta xinimaj che ja reja' re Ruc'ajol re Dios. Xa xiya' pa ruk'a' re jun ache nibano gobernar rubini'an Pilato. Y tak re Pilato can rubin chic che nulisaj-a libre, yex can man xijo-ta che xlisas-a libre. 14 Xa ja re jun quimisanel xibij che tilisas-a, y re jun lok'olaj[~17~] ache y chuka' choj ruc'aslen, jare' re xiya' can pa ruq'uixel.[~18~] 15 Y can xiban cha che xquimisas re Jesús re niyi'o c'aslen. Pero re Dios xuban cha che xc'astaj-pa[~19~] re ru-cuerpo chiquicojol re anama'i'. Nakabij c'a quire' chiva roma yoj can xkatz'at tak xc'astaj-pa. 16 Y re jun ache re nitz'at-pa yex re c'o vova' y itaman chuka' rach, xc'achoj roma pa rube' re Jesús[~20~] xkac'utuj-va. Y re ache can xc'achoj-va roma can xuban chuka' confiar-ri'[~21~] riq'uin re Jesús.

17 Yex nuvinak y re je principal re jec'o chi'icojol, tak yex xiban cha che xquimisas re Jesús, xinojij che reja' xa choj jun ache y man xitz'at-ta che can ja reja' re Cristo.[~22~] 18 Can xbanataj-va ancha'l runojim-pa re Dios. Y quire' re tz'iban can coma conojel re rusamajela' re Dios re xe'c'ue' ajuer can, re xbex profetas chique. Reje' quitz'iban can che re Cristo tiene que nuk'asaj q'uiy tijoj-pokonal.[~23~] 19 Mare' vocame titzolaj-pa ivánma riq'uin re Ajaf Dios[~24~] y tijalataj re ic'aslen chach, chin quire' nicuyutaj re imac. Y xque'pa tiempo chin uxlanen tak re Ajaf Dios can c'o chic iviq'uin. 20 Y re Ajaf Dios can xtutak-pa re Jesucristo pa ruca'n bey,[~25~] re Jesucristo re can yi'om-pa rutzijol chiva roma re Ajaf Dios. 21 Jac'a vocame, nic'ue-na chila' chicaj,[~26~] can c'a xtapon-na re k'ij tak xtiban utzil ronojel cosas. Quire' nubij re Dios chupan re quitz'iban can re rusamajela' re Dios re xe'c'ue' ajuer can, re xbex profetas chique. 22 Y re Moisés xubij chique re kavinak xe'c'ue' ajuer can: Re Kajaf Dios xtuyac-pa jun rusamajel re nibex profeta cha, can ancha'l rubanon viq'uin yen.[~27~] Reja' can kavinak-va y tic'axaj ronojel re xtubij chiva. 23 Y anchique re man xtiniman-ta, can xtiquimisas[~28~] y xtilisas-a chiquicojol re rutenemit chic re Dios, nicha' re rutz'iban can re Moisés.

24 Y re Pedro xubij chuka' chique re vinak: Conojel re rusamajela' re Dios re xe'c'ue' ajuer can, re xbex profetas chique, ancha'l re Samuel y re nic'aj chic, xe'ch'o can chij re tiempo re yojc'o-va. 25 Y can ivichin c'a yex[~29~] re je'rusujun can re Dios chupan re je'tz'iban can coma re profetas. Y can ivichin chuka' yex re xusuj tak xuban re jun trato quiq'uin re kavinak xe'c'ue' ajuer can, tak xubij cha re Abraham che re vinak[~30~] re jec'o chach re ruch'ulef xtiquic'ul re bendición roma re rey-rumam reja', re xtalax. 26 Y tak re Dios xuban cha re Jesús re Ruc'ajol che xc'astaj-pa chiquicojol re anama'i', chi'icojol c'a yex xutak-va nabey. Reja' xrajo' xuya' can re bendición chi'icojol yex, chin quire' che cada jun chiva yex xuya-ta can re rumac.

<- HECHOS 2HECHOS 4 ->