Rat Timoteo nojel tiempo tatzijoj re ruch'abal re Dios

1-2 Y chach re Dios[~1~] y re Ajaf Jesucristo nimbij chava rat Timoteo che tatzijoj re ruch'abal re Dios nojel tiempo, chique re niquijo' niquic'axaj y chuka' chique re man niquijo-ta. Tabij chique[~2~] re vinak re quitzekelben jun enseñanza re man katzij-ta, che tiquiya' can. Tabij chique re quic'uan jun itzel c'aslen, che tiquijala' quic'aslen. Y chique conojel tabij che nojel tiempo tiquibana' re otz. Y riq'uin ronojel avánma ca'tijoj conojel, y re avánma camas ticoch'on. Y ronojel re' nimbij chava roma re Jesucristo xtipa chic jun bey, y can xtik'alajin che reja' can Rey-va, y xto'rbana' juzgar pa quive' re c'a je c'as y pa quive' chuka' re je quiminak chic-a. 3 Roma xte'ka re k'ij tak re vinak man chic xtiquijo-ta xtiquic'axaj re otz tak enseñanzas.[~3~] Xa can xtiba cánma chij re enseñanzas re man je katzij-ta, y xque'quicanola' re anchique ye'tijon quichin cha re enseñanzas re ye'quirayij reje'. 4 Xa man chic xtiquic'axaj-ta re ruch'abal re Dios, xe chic re enseñanzas re xa man jun quijkalen[~4~] xque'quic'axala'. 5 Jac'a rat tanojij jabal ronojel re naban. Tacoch'o' re tijoj-pokonal re nipa chavij. Man catane' chutzijosic re utzulaj ch'abal chin re Dios[~5~] re nibex evangelio cha. Tabana' ronojel re samaj re yi'on chava roma re Dios.

6 Roma yen xa can xe chic nyaben re k'ij che yinquimisas,[~6~] re k'ij chin yimba[~7~] y ninya' can re ruch'ulef. Xa can napon-yan re k'ij chin yinquimisas. 7 Camas ntijon nuk'ij chubanic re nurayij re Dios, y nbanon ronojel re samaj re yi'on chua roma re Dios.[~8~] Man nyi'on-ta can re otz ch'abal re kaniman.[~9~] 8 Y c'o jun premio[~10~] re xtiquic'ul conojel re quic'uan jun c'aslen choj. Y ntaman che yen chuka' xtinc'ul re jun premio re'. Ja re Ajaf re utzulaj ka-Juez re xtiyi'o re premio re' chupan re k'ij tak xtipa chic jun bey. Y man xe-ta chua yen xtuya-va re premio re'. Xa can xtuya' chuka' chique conojel re binak cánma chuyabexic[~11~] re k'ij tak xtipa chic jun bey reja'.

Re nurayij re Pablo

9 Rat Timoteo, can tatija' ak'ij yapa viq'uin cha'nin, chin yinatz'eta'. 10 Roma re Demas[~12~] xa xba pa tenemit Tesalónica. Xa xinrumalij can, roma reja' xa xba ránma[~13~] chij re nusuj re ruch'ulef. Re hermano Crescente binak pa tak tenemit re jec'o pa Galacia. Y re hermano Tito chuka' binak pa tak tenemit re jec'o pa Dalmacia. 11 Vocame xa can xe re hermano Lucas re c'o can viq'uin. Tac'ama-pa re hermano Marcos[~14~] tak xcapa, roma reja' ndoc chua chin yinruto'. 12 Re hermano Tíquico[~15~] xintak-a pa tenemit Efeso. 13 Tak xcapa, tac'ama-pa re nuk'u' re xinya' can riq'uin re hermano Carpo pa tenemit Troas. Y ca'c'ama-pa re nu-libros. Pero re más ninjo' che nac'am-pa ja re je'banon riq'uin tz'um.

14 Re Alejandro[~16~] re herrero, q'uiy c'a etzelal[~17~] je'rubanalon chua. Y jac'a re Ajaf xtiyi'o rajal[~18~] cha, can ancha'l re rubanabal. 15 Mare' rat, can tachajij-avi' chach, roma reja' camas nutzelaj re ruch'abal re Dios re nakatzijoj yoj.

16 Tak xinc'uax chiquivach re autoridades nabey, man jun xta'o vichin. Pero man ninjo-ta[~19~] che re Dios xtuya-ta ruq'uixel chique re man xinquito-ta y xinquiya' can nayon. 17 Pero re Ajaf xa can xinruto-va.[~20~] Xuya' vuchuk'a' y xinrucol-pa chach re camic. Y mare' xintiquir xinq'uis ronojel re samaj re yi'on chua roma re Dios. Samaj chin nitzijos re ruch'abal re Dios chique conojel vinak re man je israelitas-ta. 18 Y yen ntaman che re Ajaf xticola vichin chupan ronojel etzelal. Ntaman che xquinruchajij[~21~] chin xquinruc'uaj chila' chicaj anche' nuban-va gobernar. Reja' can-ta xtuc'ul ruk'ij chin nojel tiempo. Amén.

Ja ruq'uisibal tak ch'abal cha re carta re'

19 Taya' ruxnokil-quivach re hermanos Prisca y Aquila,[~22~] y chuka' conojel re jec'o pa rachoch re hermano Onesíforo.[~23~] 20 Re hermano Erasto[~24~] xc'ue' can pa tenemit Corinto, y re hermano Trófimo[~25~] xinya' can pa tenemit Mileto roma niyavaj. 21 Y rat Timoteo,[~26~] can tatija' ak'ij che yapa viq'uin tak c'amaje-na tapon re tiempo chin tef. Re hermano Eubulo nutak-a ruxnokil-avach. Y chuka' re hermanos Pudente, re Lino, re Claudia, y conojel re hermanos jec'o vova' niquitak-a ruxnokil-avach.

22 Y can ja-ta re Ajaf Jesucristo re xtic'ue' pan avánma rat. Y can-ta q'uiy utzil xtic'ul chiyixnojel[~27~] riq'uin re Dios. Amén.