1 TESALONICENSES 5

1 Hermanos, man nic'atzin-ta nimbij chiva re anchique tiempo y anchique k'ij xtipa re Jesucristo. 2 Roma yex jabal itaman chic che re k'ij tak xtipa re Ajaf, man jun atamayon.[~1~] Roma reja' tak xtipa, xtuban ancha'l nuban jun elek'om[~2~] tak ndoc pa jun jay chak'a'. 3 Y jac'a tak re nic'aj chic vinak xtiquibij che vocame camas jabal kabanon roma manak ayoval, can otz yojc'o, xa jare' tak xte'ka re castigo pa quive'. Xa xtiquic'alvachij ancha'l re nuc'alvachij jun ixok tak ba' chic man talan. Tak ne'c'ulun re k'axomal re', man jun xtitiquir xtiyi'o rutzijol cha. Y quire' xtiquic'alvachij re vinak re', man xque'tiquir-ta xtiquicol-qui'. 4 Pero yex hermanos, man xtic'alvachij-ta quire'. Roma yex can iyaben re k'ij tak xtipa chic re Jesucristo. Y mare' tak xte'ka reja' iviq'uin, man xte'ka-ta ancha'l nuban jun elek'om, roma can iyaben-apo, y man yixc'o-ta chic pa k'oko'm.[~3~] 5 Roma konojel re kaniman re Jesucristo man yoj richin-ta chic re k'oko'm, xa yoj richin chic re sakil.[~4~] 6 Mare' man takaban ancha'l niquiban re nic'aj chic vinak re man jec'o-ta pa sakil. Roma reje' can man niquina-ta re andex ye'quibanala'. Xa ancha'l ye'var. Pero yoj can kojc'ase' y can takana' re andex ye'kabanala'.[~5~] Man c'a takaban ancha'l niquiban re jec'o pa k'oko'm. 7 Roma re k'oko'm xa chin varan, y chin chuka' re k'abaric.[~6~] 8 Pero yoj re c'o chic re sakil kaq'uin, roma kaniman re Jesucristo, can takana' re andex ye'kabanala'. Can takabana' confiar-ki' riq'uin re Jesucristo, y man itzel takatz'at-ki', xa takajo-ki', chin man nakaya-ta k'ij cha re itzel chin yojruch'ac. Ancha'l nuban jun soldado, nuya' jun ch'ich' chuc'o'x chin nucol-ri' chach re enemigo. Y can nojel tiempo takayabej re k'ij chin tak xkojcolotaj-a jumul chach re mac, chin man nakaya-ta k'ij cha re itzel chin che yojruch'ac. Yoj xa takabana' ancha'l nuban re soldado cha re rujalom chin man niquiu-ta roma re enemigo.[~7~] 9 Takachajij-ki', man takaya' k'ij cha re itzel chin yojruch'ac, roma re Dios man nrajo-ta che nipa re castigo pa kave'.[~8~] Reja' can nrajo' che nakanimaj re Kajaf Jesucristo chin yojcolotaj jumul chach re mac, 10 roma itaman che re Jesucristo xcom koma yoj. Reja' xcom chin xuya' kac'aslen. Chin quire' vo xa c'a yoj c'as vova' chach re ruch'ulef, nakac'ul re c'ac'a kac'aslen riq'uin reja'. Y vo xa yoj quiminak chic-a, xtuya' chuka' re c'ac'a kac'aslen riq'uin reja'. 11 Mare' ticukuba' ic'o'x chivach-ka yex. Y chuka' titola-ivi' chin che yixq'uiy riq'uin re ic'aslen, can ancha'l re ibanom-pa.

Re nuchalabej re Pablo chique re hermanos re jec'o pa Tesalónica

12 Hermanos, nakac'utuj utzil chiva che tiyala' quik'ij re achi'a' re ye'samaj chi'icojol pa rusamaj re Dios. Tiyala' quik'ij roma ja reje' re je'ac'ayon ivichin. Jare' re samaj yi'on chique roma re Ajaf Dios. Y chuka' chin yixquipaxabaj. 13 Mare' tiyala' quik'ij y camas que'ijo', roma re samaj re niquiban. Y chuka' otz tic'uaj-ivi' y manak-ta ayoval chi'icojol.[~9~]

14 Hermanos, chuka' nakabij chiva che que'ipaxabaj re hermanos re man niquijo-ta ye'samaj. Tibij chique che que'samaj. Y re hermanos re xa ca'e' cánma rubanon, can que'ito' chin che niquiban confiar-qui'. Y re c'amaje-na kas tic'ue' quichuk'a' chupan re quic'aslen riq'uin re Jesucristo,[~10~] man que'iya' can. Xa que'itola'. Y chuka' que'icoch'ola' conojel.[~11~]

15 Y vo xa c'o re xque'bano itzel tak cosas chiva, man tiban ruq'uixel chique,[~12~] xa titija' ik'ij niban re otz chique. Titija' ik'ij niban re otz chique conojel re vinak re quiniman chic re Jesucristo,[~13~] y chuka' chique re vinak re man quiniman-ta.

16 Nojel tiempo tiqui'cot re ivánma.[~14~] 17 Nojel tiempo tibana' orar.[~15~] 18 Nojel tiempo titioxij[~16~] cha re Dios. Titioxij tak otz yixc'o, y titioxij chuka' tak yixc'o pa tijoj-pokonal. Roma quire' nrajo' re Dios che niban yex re iniman chic re Cristo Jesús.

19 Man tik'at re rusamaj re Espíritu Santo.[~17~] 20 Y tak c'o jun hermano nubij che c'o cosas re nusekresaj re Dios chach,[~18~] man itzel titz'at. 21 Xa tic'axaj re nubij, chin quire' yex ninabej vo xa katzij o man katzij-ta.[~19~] Y vo xa katzij, titzekelbej. 22 Ronojel re man katzij-ta, man titzekelbej.

23 Yex itaman che ja re Dios re nibano cha re ivánma che otz nuna'.[~20~] Y ninjo' che reja' xtuban-ta chiva che can-ta nojel tiempo nic'uaj jun c'aslen ch'ajch'oj chach reja'. Chuka' ninjo' che xtuchajij-ta re i-espíritu, re ivánma y re i-cuerpo, chin quire' man jun itzel cosa nilitaj chivij tak xtipa chic jun bey re Kajaf Jesucristo.[~21~] 24 Y re Dios can xtuban-va chiva ancha'l re ninrayij yen. Roma reja' man jun bey xquixruya-ta can.[~22~] Y chuka' roma ja reja' re xvayon ivichin chin xixrucol chupan re imac.

Ja ruq'uisibal tak ch'abal cha re carta re'

25 Hermanos, tibana' orar chakij.[~23~]

26 Y tiya' ruxnokil-quivach conojel re hermanos, y que'ik'etela',[~24~] che nik'alajin che camas ye'jo'.

27 Y pa rube' re Ajaf nimbij chiva, che tibana' leer re carta re' chiquivach conojel re hermanos.

28 Can-ta q'uiy utzil xtic'ul chiyixnojel riq'uin re Kajaf Jesucristo. Amén.

✡5:2 Mt 25.13.

✡5:2 Lc 12.39; Ap 3.3; 16.15, 16.

✡5:4 Ro 13.12, 13.

✡5:5 Ef 5.8.

✡5:6 1 P 5.8.

✡5:7 Ro 13.13.

✡5:8 Is 59.17; Ef 6.17.

✡5:9 Ro 9.22.

✡5:13 Mr 9.50.

✡5:14 Ro 15.1.

✡5:14 1 Co 13.4; Ga 5.22.

✡5:15 Lv 19.18; Pr 20.22.

✡5:15 Ga 6.10.

✡5:16 Ro 12.12; Fil 3.1.

✡5:17 Lc 18.1.

✡5:18 Ef 5.20; Col 4.2.

✡5:19 Ef 4.30.

✡5:20 1 Co 14.1.

✡5:21 1 Jn 4.1.

✡5:23 Fil 4.9.

✡5:23 1 Co 1.8.

✡5:24 1 Co 10.13.

✡5:25 2 Ts 3.1.

✡5:26 Ro 16.16.