Re nabey carta re xutz'ibaj can re apóstol San Juan
1 Nintz'ibaj-a chiva chij re Jun re can c'o-va.[~1~] Re Jun re can c'o-va tak c'amaje-na tic'ue' re ruch'ulef. Pero yoj can xkac'axaj re ruch'abal. Y can xkatz'at[~2~] chuka', roma xkatzu' riq'uin re kanak'avach, y can xkatz'am riq'uin kak'a'. Y re' ja re Jesucristo re nibex Ch'abal[~3~] cha re niyi'o c'aslen. 2 Re niyi'o c'aslen[~4~] xc'ue' vova' chuch'ulef, y yoj xkatz'at. Y mare' nakatzijoj chiva re xkatz'at.[~5~] Nakatzijoj chiva re Jun re can c'o-va[~6~] riq'uin re Karta' Dios, y xpa vova' chuch'ulef y xc'ue' chakacojol. 3 Yoj can nakatzijoj chiva re xkatz'at y re xkac'axaj, chin che quixoc ancha'l yoj, roma yoj junan kavach[~7~] riq'uin re Karta' Dios y riq'uin re Jesucristo re Ruc'ajol. 4 Y nakatz'ibaj-a ronojel re' chiva roma can nakajo-va che can-ta jabal yixqui'cot pa tak ivánma.[~8~]
5 Y vocame nakatzijoj chiva re xubij can re Jesucristo chaka yoj, che re Dios jare' re sakil,[~9~] y man jun k'oko'm c'o riq'uin. 6 Y vo xa nakabij che junan chic kavach riq'uin re Dios, y xa kac'uan jun c'aslen chin re k'oko'm,[~10~] man katzij-ta[~11~] nakabij che junan kavach riq'uin re Dios, roma xa mana-ta re' re yojtajin chubanic. 7 Re Dios can c'o-va pa sakil, y vo xa yoj chupan re kac'aslen yojbiyin pa sakil, can junan kavach quiq'uin re quiniman chic re Jesucristo re Ruc'ajol re Dios. Y chuka' re ruq'uiq'uel[~12~] re Jesucristo nulisaj ronojel re kamac.
8 Y vo xa nakabij che man jun kamac,[~13~] kayon yoj nakak'ol-ki'. Roma re nakabij man katzij-ta. 9 Y vo xa nakasekresaj re kamac[~14~] chin che yojcuy, re Dios can nucuy-va re kamac y nuch'ojersaj re kánma y nulisaj ronojel re kabanabal re man otz-ta je'kabanalon. Roma reja' camas otz y can choj-va y man nujal-ta re ruch'abal. 10 Y jac'a vo xa nakabij che man jun mac nakaban, can nakaban che man katzij-ta nubij re Dios,[~15~] y re ruch'abal man c'o-ta pa tak kánma.
1 JUAN 2 ->