Apocalipsis 5

Ri boton vuj y ri Alaj Oveja

1 Jac'ari' yin xintz'et chi pa ruk'a' derecha ri Jun ri tz'uyul pa nimalaj tz'uyubel, c'o jun boton vuj[a] ri tz'iban rij-ruvech, y tz'apin riq'uin vuku'[~2~] tz'apibel.[~3~] 2 Y xintz'et jun ángel ri c'o uchuk'a' pa ruk'a' ri cof nich'o chubixic: ¿Achique ta jun nuc'ul chi nujak ri vuj re' y nuch'ol-e ri achok che tz'apin-vi? xcha'. 3 Pero nis-ta chicaj, nis-ta choch'ulef, o chuxe' ka ri roch'ulef c'o ta jun ri c'o ruk'a' richin nujak ri vuj, masque xaxe richin nutz'et ruvech. 4 Y yin jani na yinok', roma man jun xilitaj ri nuc'ul chi nujak-ka ri vuj richin nu'on leer, o richin nutz'et ruvech. 5 Jac'ari' jun chique ri nima'k quijuna' achi'a' quire' xu'ij-pe chuve: Man chic catok', tatz'eta' na pe', c'o jun ruxiquin can ri Judá[~4~] y riy-rumam ri David ri can achel jun León[~5~] ri xtiquer yan chirij ruchuk'a' ri itzel, y romari' nuc'ul chi nujak ruvech ri vuj y nuch'ol-e ri vuku' tz'apibel richin.

6 Jac'ari' xitzu'un-apu y xintz'et chi pa quinic'ajal ri (caji', quiji') c'o quic'aslen, ri nimalaj tz'uyubel, y pa quinic'ajal ri nima'k quijuna' achi'a', c'o jun Alaj Oveja pa'el, ri can k'alaj chi xk'ax yan pa camic,[~6~] roma c'a k'alaj na quetal ri socotajic chirij. Xintz'et chi c'o vuku' ruc'a', y vuku' runak' tak ruvech;[~7~] y ri' ja ri vuku' espíritu[~8~] richin ri Dios ri etakon pa ruvi' ronojel ri roch'ulef.[~9~] 7 Xjel c'a apu ri Alaj Oveja, xuq'uen-apu ri boton vuj pa ruk'a' derecha ri Jun ri tz'uyul pa nimalaj tz'uyubel. 8 Y tok ri Alaj Oveja ruc'uan chic ri boton vuj pa ruk'a', ri (caji', quiji') c'o quic'aslen y ri veinticuatro nima'k quijuna' achi'a', xexuque-ka chuvech. Chiquijununal rije' quic'ualo'n jujun arpa[~10~] y jujun lak ri ebanon riq'uin oro ri c'o pon chupan. Y ri pon ri' ja ri qui-oraciones[~11~] ri erichin ri lok'olaj rutinamit ri Dios. 9 Ri xentz'et, niquibixaj jun c'ac'ac' bix[~12~] ri quire' nu'ij:

Rat can nuc'ul-vi[~13~] chi (ac'uan, avuc'a'n) ri vuj pan ak'a',

Y chi ye'ach'ol-e ri achok che tz'apin-vi.

Roma xacamises,

Y richin xojoc richin ri Dios, xojalok' riq'uin ri aquiq'uel[~14~]

Chiquicojol conojel quivech tak vinak ri man junan ta cati't-quimama', quich'abel, y quitinamit.

10 Abanon chike chi junan nika'an gobernar aviq'uin y chi roj ocunak sacerdotes[~15~] richin ri ka-Dios,

Y xtika'an gobernar pa ruvi' ri roch'ulef.

Quiri' nu'ij ri bix ri niquibixaj.

11 Tok xitzu'un chic apu jun bey, xinvac'axaj quikul q'uiy ángeles, y pa quinic'ajal ri ángeles ri' c'o-vi ri nimalaj tz'uyubel, ec'o ri (caji', quiji') c'o quic'aslen y ec'o ri nima'k quijuna' achi'a'. Chi millones ri ángeles[~16~] 12 ri riq'uin cuchuk'a' niqui'ij:

Ri Alaj Oveja ri xcamises,

Can nuc'ul-vi chi ja rija' ri nitakchi'in pa ruvi' ronojel,

Chi c'o nimalaj rubeyomal, chi c'o nimalaj runo'oj,

Chi c'o nimalaj ruchuk'a', chi can nimalaj vi rija',

Chi c'o ruk'ij y chi can nuc'ul-vi chi ninimirises rubi',[~17~]

xecha'.

13 Ronojel c'a ri rubanon ri Dios chicaj, re choch'ulef, chuxe' ka re roch'ulef, y chupan ri mar; xinvac'axaj c'a chi quire' niqui'ij:

Ri Jun ri tz'uyul chupan ri nimalaj tz'uyubel y ri Alaj Oveja,

Utz chi jumul-jumul nibixex quibi',

Chi niyo'ox quik'ij, chi ninimirises quibi'

Y chi c'o uchuk'a' pa quik'a',[~18~] pa ruvi' ronojel,

xecha'.

14 Y ri (ecaji', yaquiji') c'o quic'aslen, Amén, yecha-apu. Y ri veinticuatro nima'k quijuna' achi'a' jac'ari' xexuque-ka, xquiya-ka nic'aj quivech pan ulef y xquiya' ruk'ij[~19~] ri can c'o ruc'aslen jumul-jumul.

<- Apocalipsis 4 Apocalipsis 6 ->