Hebreos 2

Nimalaj ri favor ri x-an chike chi xojcolotaj

1 Y roma ronojel re xka'ij yan ka, nic'atzin chi más nikaya' kaxiquin riq'uin ri ch'abel kac'axan, richin quiri' man xa c'ate nikana', juc'an chic nkuje'el-vi[~1~] riq'uin ri kac'aslen. 2 Roma ri ley ri xuquiya-ka ri ángeles[~2~] choch'ulef can xtzakon na vi ri nu'ij, y xa achique na k'ajon tzij y man niman ta tzij x-an chuvech ri ley ri', can xuc'ul na vi rajil[~3~] ri achel utz chi nuc'ul. 3 Y romari', ¿achel c'a xtikacol-ki' chuvech rajil, si nkumestaj pa ruvi' ri nimalaj favor ri x-an chike chi xojcolotaj?[~4~] Ri favor re' ja ri Ajaf Jesús na'ey xyo'on rutzijol, y ri xe'ac'axan ruchojmil riq'uin rija', xquik'asaj rutzijol chike.[~5~] 4 Y ri Dios xuc'ut chi can kitzij vi ri xquitzijoj. Roma xuc'ut nimalaj retal ri ruchuk'a', xu'on chi xebanataj ri man jun bey etz'eton, xu'on jalajoj tak milagros, y xu'on chi roma ri Lok'olaj Espíritu, xjachalo'x uchuk'a' chique ri quiniman rija' richin xequibanala' jalajoj ruvech samaj,[~6~] achel xrojo' rija'.

Ri Jesucristo xujak bey chiquivech ri yecolotaj

5 Quiri' nin-ij chive, roma ri Dios man chuxe' ta quitzij ángeles xuya-vi ri jun chic roch'ulef ri petenak más chikavech-apu,[~7~] ri nkutajin chubixic chive, 6 pero chupan ruch'abel ri Dios, c'o jun quire' rutz'iban can:

Ri vinak man jun ruk'ij chi rat nac'uxlaj-pe,

Nis-ta man jun rakale'n chi quiri' nuka chi'ac'u'x.[~8~]

7 Pero xa'an che chi juba' ma nril quik'ij ri ángeles,

Chi can c'o rakale'n y c'o ruk'ij.

Xacusaj can ajaf pa ruvi' ronojel ri abanon riq'uin ri ak'a',

8 Abanon che chi c'o ruk'a' che ronojel.[~9~]

Quiri' nu'ij chupan ri tz'iban can.

Tok ri tz'iban can re' nu'ij chi ri Dios rucusan can ri vinak chi ajaf pa ruvi' ronojel, nu'ij tzij chi ri vinak, man jun achique ri man ta c'o ruk'a'[~10~] che. Pero man jani tikatz'et chi ronojel c'o ruk'a' che. 9 Pero nikatz'et ri Jun ri x-an che chi más juba' oc ruk'ij que chiquivech ri ángeles, y ri' ja ri Jesús ri x-an che vacami chi c'o rakale'n y nimalaj ruk'ij,[~11~] roma xuk'asaj k'axomal ri xc'amo-e pa camic.[~12~] Y roma ru-favor ri Dios tok xk'ax pa camic koma konojel.

10 Roma ri Dios ri achok richin ronojel ri c'o y achok roma banon ronojel,[~13~] rija' xu'on ri achel utz chi nibanataj. Roma rija' richin yeruq'uen-pe eq'uiy ralc'ua'l chupan ri nimalaj ruk'ij, xu'on chi chupan k'axomal[~14~] xtz'akat-vi ruc'aslen ri jakoy quibey ri yecolotaj. 11 Roma ri nich'ajch'ojrisan y ri ni'an ch'ajch'oj chique,[~15~] xaxe riq'uin Jun epetenak-vi. Romari' ri Jesús man niq'uix ta nu'ij ruchak'[~16~] chique. 12 Roma ri Jesucristo quire' ru'in:

Ajaf Dios, yin xtinya' atzijol rat chique ri junan roj avalc'ua'l quiq'uin.

Xtinbixaj ri abi' junan quiq'uin ri niquimol-qui' richin niquiya' ak'ij.[~17~]

13 Y juc'an chic che ruch'abel ri Dios, quire' xu'ij:

Yin can xticuke' nuc'u'x riq'uin ri Dios.[~18~]

Y ja chic jun re' ri xu'ij:

Vave' yinc'o-vi, junan quiq'uin ralc'ua'l ri Dios ri eruyo'on pa nuk'a'.[~19~]

Quiri' xu'ij ri Jesucristo.

14 Romari' achel ri eralc'ua'l ri Dios c'o qui-cuerpo y quiquiq'uel, ja jun ri Jesucristo xc'uje' ru-cuerpo y ruquiq'uel,[~20~] richin quiri' riq'uin ri rucamic ri ru-cuerpo, xuq'uis ruchuk'a' ri rajaval ri camic,[~21~] y ri' ja ri itzel.[~22~] 15 Quiri' xu'on richin xeruquir conojel ri chi ronojel quic'aslen eximil pa ruk'a' ri (ximbiri'il, ximbiri'y)[~23~] roma niquixi'ij-qui' chuvech ri camic.[~24~] 16 Roma can k'alaj chi man xpe ta chiquito'ic ángeles, xa chiquito'ic riy-rumam can ri Abraham. 17 Romari' xc'atzin chi rija' achel-achel ri ch'aka' chic ralc'ua'l ri Dios ri e'ocunak ruchak', richin quiri' xtiquer xoc Nimalaj Sacerdote[~25~] ri nipokonan y nu'on-apu ronojel ri nic'atzin richin chi ri Dios nu'on perdonar quimac ri tinamit. 18 Y roma rija' mismo xuna' k'axomal tok ri itzel xutij ruk'ij richin can ta xrojo' xutakchi'ij pa mac,[~26~] romari' c'o ruchuk'a' richin yeruto' ri yetakchi'ix chi can ta niqui'en mac.

<- Hebreos 1 Hebreos 3 ->