Ri na'ey carta ri xutz'ibaj ri apóstol San Juan

Ri Jun achok riq'uin niketemaj-vi ri c'o pa ránima ri Dios, can nuya-vi c'aslen

1 Ri vuj re nintz'ibaj-e chive, nich'o pa ruvi' ri Jun ri can c'o-vi-pe.[~1~] Roj riq'uin kaxiquin kac'axan rija', riq'uin kavech katz'eton, katz'eton rakale'n ri ruc'aslen, y xkak'etej riq'uin kak'a'.[~2~] Ja rija' ri Jun ri niyo'on c'aslen ri achok riq'uin niketemaj-vi ri c'o pa ránima ri Dios.[~3~] 2 Ri niyo'on c'aslen[~4~] xuk'alajin chikacojol, roj xkatz'et riq'uin kavech, y nikatzijoj chi can kitzij vi ri xkatz'et, y nikatzijoj chive ri c'aslen ri richin jumul ri xk'alajrises chikavech y can c'o-vi-pe riq'uin ri Katata' Dios.[~5~] 3 Roj ja ri katz'eton y kac'axan, jari' ri nikatzijoj chive,[~6~] richin quiri' rix junan ivánima ni'en kiq'uin roj ri xa jun kánima kabanon riq'uin ri Katata' Dios[~7~] y riq'uin ri Jesucristo ri Ruc'ajol. 4 Nikatz'ibaj c'a ronojel re' chive,[~8~] richin chi tz'akat niquicot ri kánima ivoma.[~9~]

Ri Dios jari' ri sakil

5 Ri kac'axan can riq'uin ri Jesucristo, jari' ri nikatzijoj chive, chi ri Dios can sakil vi,[~10~] y man jun k'eku'n nilitaj riq'uin. 6 Si nika'ij chi xa jun kánima kabanon riq'uin ri Dios, y xa c'o k'eku'n nilitaj pa kac'aslen,[~11~] xa roj tz'ucuy tzij, y man kac'uan ta kac'aslen chupan ri kitzij.[~12~] 7 Pero si kac'uan kac'aslen chupan ri sakil, achel ri Dios pa sakil c'o-vi,[~13~] ri' nu'on chike chi junan kánima nika'an chikavech, y ri ruquiq'uel ri Jesucristo ri Ruc'ajol nkuruch'aj chuvech ronojel kamac.[~14~]

8 Si nika'ij chi manak kamac,[~15~] kayon nikasetz-ka kano'oj, chiri' nik'alajin-vi chi man roj uc'uan ta roma ri kitzij. 9 Si nikak'alajrisaj ri kamac,[~16~] ri Dios can nu'on-vi ri nu'ij, y pa ruchojmil nu'on chi nu'on perdonar ri kamac y nkuruch'ajch'ojij chuvech ronojel ruvech itzel tak no'oj kabanalo'n. 10 Si nika'ij chi manak mac[~17~] kabanon, nika'an che ri Dios chi xa jun tz'ucuy tzij,[~18~] y man roj uc'uan ta roma ri ruch'abel.

1 Juan 2 ->