1 Entonces conda cꞌapa numuy e día tuaꞌ e jiriar y conda sacojpa tama otronteꞌ día xeꞌ jax e día domingo, e María xeꞌ tuaꞌ e chinam Magdala ixin taca e incojt María tuaꞌ uwirobꞌ umujr e Jesús. 2 Y wacchetaca checta inteꞌ nuxi yujcbꞌar tama e lugar era. Y ecmay tari inteꞌ ángel tuaꞌ Cawinquirar Dios tut e qꞌuin y cꞌotoy tuyejtzꞌer e mujr y ulocse e nuxi tun xeꞌ macar ani utiꞌ e chꞌen. Y nacpat era e ángel turuan tujor e tun. 3 Y galan ejpray ut e ángel xeꞌ bꞌan uwirnar cocha conda war eijbꞌi ut e qꞌuin. Y sacsac ubꞌujc bꞌan cocha e tocar. 4 Y e ajtzꞌojyirobꞌ conda uwirobꞌ tunor era bꞌactobꞌ meyra este que chinchobꞌ y quetpobꞌ bꞌan cocha cora chamenobꞌ. 5 Entonces ojron e ángel taca e ixictac y che:
—Ira ixbꞌacta. Nen innata que war isajca e Jesús xeꞌ chamesna tut inteꞌ cruz. 6 Machi chꞌar tara porque sutpa bꞌixcꞌa tujam e chamenobꞌ bꞌan cocha cay uyareox. Laric chꞌujcunic iwira tiaꞌ chꞌar ani tama umujr. 7 Y de allí quiquic wacchetaca tuaꞌ iware uyajcanuarobꞌ que sutpa bꞌixcꞌa e Jesús tujam e chamenobꞌ, y que ixix era esto tama e departamento Galilea, y que yajaꞌ tuaꞌ uwirobꞌ ut. Jax era lo que quetpa tuaꞌ inwareox, che e ángel.
8 Entonces e ixictac locꞌoyobꞌ wacchetaca tama e mujr, war abꞌactobꞌ y war atzayobꞌ meyra, y ixiobꞌ ajner tuaꞌ uyareobꞌ uyajcanuarobꞌ e Jesús tama tunor lo que numuy. 9 Y warto axiobꞌ tor e bꞌir conda checta e Jesús tutobꞌ. Entonces ojron jaxir y che:
—¿Cocha turox? ¿Tucꞌa war inumse ibꞌa? che e Jesús.
Entonces tzayobꞌ meyra e ixictac uwirobꞌ e Jesús este que ixin cotuanobꞌ tut y cay umeqꞌuiobꞌ uyoc e Jesús, y uyujtzꞌiobꞌ ut. 10 Y che e Jesús:
—Ira ixbꞌacta. Quiquic arenic niwermanuobꞌ que ucꞌani tuaꞌ alocꞌoy axiobꞌ esto tama e departamento Galilea tiaꞌ tuaꞌ uwirenobꞌ, che e Jesús.
Lo que arobꞌnobꞌ e ajtzꞌojyirobꞌ tuaꞌ uyareobꞌ e inmojr
11 Pues conda wartocto alocꞌoy e ixictac, locꞌoyobꞌ cora ajtzꞌojyirobꞌ xeꞌ war ucojcobꞌ e mujr tuaꞌ axiobꞌ tut uwinquirobꞌ e inmojr sacerdotiobꞌ. Y conda cꞌotoyobꞌ cay uchecsu tutobꞌ tunor lo que numuy. 12 Entonces uwinquirobꞌ e inmojr sacerdotiobꞌ umorojse ubꞌobꞌ taca e nuquir winicobꞌ y cay ojronobꞌ este que quetpobꞌ tama intera bꞌijnusiaj tuaꞌ uyajcꞌuobꞌ meyra tumin e ajtzꞌojyirobꞌ. 13 Entonces uyareobꞌ e ajtzꞌojyirobꞌ y chenobꞌ:
—Arenic nox cocha era que conda war ixwayan tama e acbꞌar cꞌotoyobꞌ uyajcanuarobꞌ e Jesús tuaꞌ uxujchꞌiobꞌ ucuerpo y uqꞌuechiobꞌ ixin. 14 Pero jay acꞌotoy unata e gobernador tama tunor era, non tuaꞌ caxin cacorpesox tuaꞌ machi ixjajtzꞌa, che e nuquir winicobꞌ.
15 Entonces e ajtzꞌojyirobꞌ uchꞌamiobꞌ e tumin y ixin uchiobꞌ bꞌan taca cocha arobꞌnobꞌ. Y bꞌan arobꞌna tujam e gente tuaꞌ e Israel esto coner.
Conda e Jesús uchecsu ubꞌa tut uyajcanuarobꞌ
Marcos 16:14-18; Lucas 24:36-49; Juan 20:19-23
16 Entonces e once uyajcanuarobꞌ e Jesús ixiobꞌ tama e departamento Galilea esto tor inteꞌ witzir xeꞌ arobꞌnobꞌ umen e Jesús tiaꞌ tuaꞌ utajwi ubꞌobꞌ. 17 Y conda uwirobꞌ ut e Jesús cay uyujtzꞌiobꞌ ut. Pero ayan tin e machi ucꞌubꞌsiobꞌ jay jax era e Jesús xeꞌ sutpa bꞌixcꞌa tujam e chamenobꞌ. 18 Entonces cꞌotoy e Jesús tuyejtzꞌerobꞌ y che:
—Nen ajcꞌubꞌiren tunor e cꞌotorer lo que ayan tut e qꞌuin y lo que ayan tara tor e rum ubꞌan. 19 Y tamar era inwareox que quiquic tut tunor e gente tama tunor or e rum y cansenicobꞌ tuaꞌ aquetpobꞌ niwajcanuarobꞌ, y chꞌuyicobꞌ tunorobꞌ tama ucꞌabꞌa Nitata Dios, y tama nicꞌabꞌa nen xeꞌ Uyunenen e Dios, y tama ucꞌabꞌa Unawalir e Dios. 20 Y cansenicobꞌ tunorobꞌ tuaꞌ oꞌbꞌianobꞌ tut tunor lo que cay incansiox. Y cꞌajpesic y natanic que nen turen tacarox iraj iraj este que acꞌapa tunor or e rum era, che e Jesús. Tara acꞌapa tunor niwojroner, che e Mateo.
<- San Mateo 27
