—¿Tucꞌa tuaꞌ que war isicbꞌa tin e bꞌixir tujam e chamenobꞌ? 6 Machix turu tara, sino que sutpa bꞌixcꞌa tujam e chamenobꞌ. Cꞌajric imener lo que uyareox conda turuan tacarox tama e departamento Galilea. 7 Porque yajaꞌ cay uyareox que Uyunen e winic cꞌani aꞌjcꞌuna tama ucꞌabꞌ e ajmabꞌambꞌanirobꞌ tuaꞌ achamesna, y tama e uxteꞌ día cꞌani asutpa abꞌixcꞌa tujam e chamenobꞌ, che e winicobꞌ era.

8 Y tamar era cꞌajpa umen e ixictac tamar lo que arobꞌnobꞌ umen e Jesús. 9 Y conda locꞌoyobꞌ tama e mujr, ixiobꞌ y cay uyareobꞌ e once apostolobꞌ y e inmojr xeꞌ turobꞌ yajaꞌ tunor lo que numuy tacarobꞌ. 10 Y xeꞌ uqꞌueche ixin e ojroner era tut e apostolobꞌ jax e María xeꞌ tuaꞌ e chinam Magdala y e Juana y e María xeꞌ jax utuꞌ e Santiago y e inmojr ixictac. 11 Pero e apostolobꞌ machi ucꞌubꞌsiobꞌ lo que arobꞌnobꞌ umen e ixictac, sino que uchebꞌiobꞌ que wayac taca cay uchiobꞌ e ixictac era.

12 Pero e Pedro ixin ajner esto tama umujr e Jesús y ochoy uwira e chꞌen, pero matucꞌa ayan tamar. Ajrer taca e bꞌujc turu. Entonces sutpa ixin tama uyotot, war abꞌacta ubꞌijnu tama tunor lo que numuy.

—¿Tucꞌa tamar war ixojron? Y ¿tucꞌa tuaꞌ que tzajtaca iut era? che e Jesús.

18 Y ojron inteꞌ tujam uyajcanuarobꞌ era xeꞌ ucꞌabꞌa Cleofas y che:

—¿Abꞌajner ca net xeꞌ war ixana tama e chinam Jerusalem xeꞌ machi anata lo que numuy? che e Cleofas.

19 Entonces che e Jesús:

—¿Tucꞌa numuy pue?

Y chenobꞌ:

—Pues lo que numuy taca e Jesús xeꞌ tuaꞌ e chinam Nazaret. Jaxir jax ani inteꞌ profeta xeꞌ ayan meyra ucꞌotorer tamar lo que uche y tamar lo que ojron. Y tunor era quetpa galan tut e Dios y galan tut e gente ubꞌan. 20 Pero uwinquirobꞌ e inmojr sacerdotiobꞌ y e nuquir ajcꞌamparobꞌ tama cachinam ucachiobꞌ y uyajcꞌuobꞌ tuaꞌ achamesna tut inteꞌ cruz. 21 Y non canata ani que jax jaxir xeꞌ quetpa tuaꞌ ucorpeson xeꞌ tuon e Israel tama ucꞌabꞌ e winicobꞌ romano. Y era ayix uxteꞌ día que chamay. 22 Pero conda sacojpa sajmi ayan cora ixictac xeꞌ ixiobꞌ tama umujr e Jesús xeꞌ cay ubꞌajcꞌusionobꞌ tamar uyojronerobꞌ. 23 Pues jaxirobꞌ machi utajwiobꞌ ucuerpo e Jesús tama umujr, y tamar era sutpa tariobꞌ ticoit y cay uyareonobꞌ que uwirobꞌ inteꞌ mayjut tiaꞌ checta chateꞌ ángel tutobꞌ xeꞌ uyareobꞌ que e Jesús bꞌixir turu. 24 Y nacpat era ixiobꞌ ajner cora winicobꞌ ticajam esto tama umujr e Jesús, y conda cꞌotoyobꞌ bꞌan utajwiobꞌ cocha arobꞌnobꞌ umen e ixictac. Pero e Jesús machi uwirobꞌ ut, che e winic era.

25 Entonces che e Jesús:

—¿Machi ca ixubꞌian? Y ¿tucꞌa tuaꞌ que war iqꞌuecꞌojse iwalma tuaꞌ machi icꞌubꞌse lo que chꞌar tzꞌijbꞌabꞌir umen e onian profetobꞌ? 26 ¿Machi ca inata que quetpa tuaꞌ unumse ubꞌa e Cristo cocha era tuaꞌ axin ucorpeson, y que de allí quetpa tuaꞌ uchꞌami utawarer e Dios? che e Jesús.

27 Entonces cay uchecsu tutobꞌ tunor e lugar tama uyojroner e Dios tiaꞌ oꞌjron tamar e Cristo. Y ucajyes tamar lo que chꞌar tzꞌijbꞌabꞌir umen e Moisés, y de allí uchecsu tutobꞌ lo que chꞌar tzꞌijbꞌabꞌir umen e profetobꞌ ubꞌan.

28 Entonces conda cꞌotoyobꞌ tama e aldea Emaús, e Jesús uche ubꞌa que cꞌanto axana más innajt. 29 Pero conda uwirobꞌ lo que war ubꞌijnu uche jaxir cay upejcobꞌ y chenobꞌ:

—Quetpen tacaron tara. Porque tardix era, y wix acbꞌare, chenobꞌ.

Entonces e Jesús ochoy macuir uyototobꞌ y quetpa tacarobꞌ. 30 Y conda ochoy turuan tor e mesa tacarobꞌ cay uchꞌami e pan y ucꞌajti taca e Dios tuaꞌ achojbꞌesna ut e pan. Y de allí uxere ixin taca e chateꞌ ajcanuarobꞌ era. 31 Y tama e momento era checta tutobꞌ que e winic era jax e Jesús, pero wacchetaca satpa tutobꞌ y ixin. 32 Entonces cay ojronobꞌ jaxobꞌ taca y chenobꞌ:

—¿Machi ca aquirca cawalma conda war oꞌjron tacaron waton tama e bꞌir conda war uchecsu ticoit tunor uyojroner e Dios? chenobꞌ.

33 Entonces wacchetaca achpobꞌ y sutpa ixiobꞌ esto tama e chinam Jerusalem otronyajr. Y conda cꞌotoyobꞌ utajwiobꞌ que yaꞌ moror turobꞌ e once apostolobꞌ tuaꞌ e Jesús taca e inmojr ajcanuarobꞌ. 34 Entonces cay ojron inteꞌ tujamobꞌ era y che:

—Cawinquirar sutpa bꞌixcꞌa ixto yaꞌ, y uchectesix ut tut e Pedro, che inteꞌ.

35 Entonces tin e tariobꞌ tama e aldea Emaús cay uchecsu tutobꞌ tunor lo que numuy tacarobꞌ que checta inteꞌ winic tutobꞌ tama e bꞌir xeꞌ cay uchecsu tutobꞌ tunor uyojroner e Dios. Pero conda e winic cay uxere e pan, wacchetaca pascꞌa unacꞌutobꞌ tuaꞌ unatobꞌ que e winic era jax e Jesús.

—Chꞌamic e jiriar tama iwalma, che e Jesús.

37 Y bꞌactobꞌ meyra este que cay chinchobꞌ. Uchebꞌiobꞌ que war uwirobꞌ inteꞌ mein. 38 Pero jaxir che:

—¿Tucꞌa tuaꞌ que war ixbꞌacta cocha era? ¿Tucꞌa tuaꞌ que war ibꞌijnu tama iwalma que majax erach lo que war iwira era? 39 Chꞌujcunic iwira nicꞌabꞌ y nioc que nen jaxen e Jesús xeꞌ war iwiren. Pijchꞌinic niut tuaꞌ iwira que nen, porque inteꞌ mein matucꞌa uwerir y matucꞌa ubꞌaquer cocha war iwira era que nen ayan tanibꞌa, che e Jesús.

40 Entonces conda cꞌapa ojron cocha era cay uwirse utajn ucꞌabꞌ y upat uyoc que ayan e chec tamar tiaꞌ osena e clavo. 41 Pero machito war ucꞌubꞌsiobꞌ jay jax e Jesús. Y cocha war atzayobꞌ y war abꞌactobꞌ, jaxir cay uyubꞌi tuobꞌ y che:

—¿Ayan ca tucꞌa tuaꞌ incꞌuxi tara? che e Jesús.

42 Entonces uyajcꞌuobꞌ incojt chay xeꞌ pojbꞌir. 43 Y e Jesús uchꞌami y cay ucꞌuxi tunor era tutobꞌ. 44 Y de allí che:

—Tunor lo que cay innumse nibꞌa jax lo que cay inwareox conda turen tacarox tama ucajyesnibꞌir tunor era, que quetpa tuaꞌ innumse nibꞌa tunor bꞌan taca cocha chꞌar tzꞌijbꞌabꞌir tamaren tama uley e Moisés, y bꞌan taca cocha chꞌar tzꞌijbꞌabꞌir tamaren umen e profetobꞌ, y bꞌan taca cocha chꞌar tzꞌijbꞌabꞌir tamaren tama e Salmo, che e Jesús.

45 Entonces e Jesús cꞌapa ujanchꞌacnes tunor ujorobꞌ uyajcanuarobꞌ tuaꞌ acꞌotoy unatobꞌ tunor lo que war che uyojroner e Dios. 46 Y che e Jesús:

—Chꞌar tzꞌijbꞌabꞌir tama uyojroner e Dios ixnix e tiempo que e Cristo ucꞌani tuaꞌ achamesna, y de allí cꞌani asutpa abꞌixcꞌa tujam e chamenobꞌ tama e uxteꞌ día. 47 Y chꞌar tzꞌijbꞌabꞌir ubꞌan que tama ucꞌabꞌa e Cristo ucꞌani tuaꞌ ixixin ichecsu tut tunor e gente xeꞌ aturuanobꞌ tama tunor or e rum que ucꞌani tuaꞌ uyactobꞌ tunor umabꞌambꞌanirobꞌ, y tamar era e Dios tuaꞌ acꞌumpa tacarobꞌ. Pero nox ucꞌani tuaꞌ icajyes iche tunor era tama e chinam Jerusalem. 48 Pues nox ajchecsuyajox tama tunor era. 49 Y cꞌani inwareox que nen cꞌani inwebꞌta watar e chojbꞌesiaj bꞌan cocha cay uyareox Catata Dios, y tamar era nox tuaꞌ ichꞌami Unawalir e Dios. Pero ira ixlocꞌoy tama e chinam Jerusalem era este que acꞌapa ichꞌami tunor ucꞌotorer Unawalir e Dios xeꞌ watar tichan tut e qꞌuin, che e Jesús.