1 Pues tama inteꞌ día conda turu e Jesús macuir e templo war acanseyan tut tunor e sian gente tama ucorpesiaj e Dios, cꞌotoyobꞌ yajaꞌ ubꞌan uwinquirobꞌ e inmojr sacerdotiobꞌ taca cora ajcanseyajobꞌ tama uley e Moisés y cora nuquir winicobꞌ 2 xeꞌ chenobꞌ:
—¿Chi tuaꞌ tunor e nuxi cꞌotorer lo que war acꞌampes tuaꞌ awajnes e ajchonmarobꞌ y tuaꞌ atzꞌacpes tin e ajmuacobꞌ y tuaꞌ achꞌami utattzꞌarsiaj e maxtacobꞌ era? ¿Chi uyajqꞌuet e cꞌotorer era? chenobꞌ e nuquir winicobꞌ.
3 Y che e Jesús:
—Bꞌanen ubꞌan, ayan lo que cꞌani umbꞌi tibꞌa. Y jay iwaren, entonces cꞌani inwareox chi umen ajcꞌunen e cꞌotorer era. 4 ¿Chi umen tzacarna ixin e Juan tuaꞌ achꞌuyma? ¿Umen ca e Dios, o umen e winicobꞌ? che e Jesús.
5 Entonces ojronobꞌ jaxobꞌ taca y chenobꞌ:
—Y ¿tucꞌa tuaꞌ caware era? Jay caware que e Juan ebꞌetbꞌir tari umen e Dios, jaxir tuaꞌ uyareon que: “Y ¿tucꞌa tuaꞌ que machi icꞌubꞌse?” 6 Pero jay caware que e Juan ebꞌetbꞌir tari umen e winicobꞌ, cꞌani aqꞌuijnobꞌ tunor e gente este que axin urionobꞌ taca e tun tuaꞌ uchamsionobꞌ, porque tunorobꞌ war unatobꞌ que e Juan ojron tamar taca lo que ajcꞌuna umen e Dios, chenobꞌ e nuquir winicobꞌ era jaxobꞌ taca.
7 Y tamar era uyareobꞌ e Jesús que machi unatobꞌ chi umen ebꞌetbꞌir tari e Juan tuaꞌ achꞌuyma. 8 Entonces e Jesús che:
—Y nien nen machi tuaꞌ inwareox chi umen ajcꞌunen e cꞌotorer tuaꞌ inche tunor era, che e Jesús.
9 Pues entonces cay ojron e Jesús tut e gente otronyajr y uchecsu inteꞌ ojroner xeꞌ mucur cora tutobꞌ y che:
—Ayan inteꞌ ojroner tama inteꞌ ajyum chor xeꞌ ixin upaqꞌui cora chꞌan xeꞌ ucꞌabꞌa uva tama inteꞌ nuxi chor. Meyra lugar upaqꞌui. Y nacpat era utajwi cora winicobꞌ xeꞌ cꞌani utoyi e rum tuaꞌ apatnobꞌ tamar. Y jaxirobꞌ quetpa tuaꞌ utoyi taca imbꞌijc e cosecha xeꞌ alocꞌoy tama e rum. Y de allí e ajyum locꞌoy ixin innajt tama meyra tiempo. 10 Entonces conda cꞌotoy e día tuaꞌ e cosecha e ajyum uyebꞌta ixin inteꞌ uman tuaꞌ axin ucꞌajti imbꞌijc e cosecha xeꞌ quetpa tuaꞌ uchꞌami. Pero e ajpatnarobꞌ cay uwatzꞌiobꞌ e man y utzacriobꞌ ixin bꞌan taca, matucꞌa uyajcꞌuobꞌ. 11 Entonces e ajyum sutpa uyebꞌta ixin otronteꞌ uman, pero intaca ucꞌayobꞌ y uwatzꞌiobꞌ otronyajr y utzacriobꞌ ixin bꞌan taca. Matucꞌa uyajcꞌuobꞌ. 12 Y de allí e ajyum sutpa uyebꞌta ixin otronteꞌ uman, pero e ajpatnarobꞌ cꞌapa uchꞌaquiobꞌ y uyajnesobꞌ locꞌoy ixin.
13 ’Pero tama ucꞌapesnibꞌir cay ubꞌijnu e ajyum jax taca y che, “Pero ¿tucꞌa tuaꞌ inche tamar era? O ¿inwebꞌta ca axin niunen xeꞌ inyajta ut? Y conda e ajpatnarobꞌ uwirobꞌ que jax niunen xeꞌ war acꞌotoy, bꞌajcꞌat ubꞌacriobꞌ este que axin uyajcꞌuobꞌ imbꞌijc e cosecha xeꞌ aquetpa ani tuaꞌ uyajqꞌuenobꞌ”, xeꞌ ubꞌijnu e ajyum jax taca. Entonces e ajyum ixin uche bꞌan cocha cay ubꞌijnu. 14 Pero conda irna uyunen umen e ajpatnarobꞌ, cay ojronobꞌ jaxobꞌ taca y chenobꞌ: “O ¿jax ca era xeꞌ tuaꞌ aquetpa ajyum tama tunor e rum era conda axin achamay utata? Cachamsenic tuaꞌ aquetpa tunor e cꞌopot era tacaron”, chenobꞌ e ajpatnarobꞌ xeꞌ uputputir jaxobꞌ taca. 15 Entonces ulocsiobꞌ macuir e chor y uchamsiobꞌ. Tara acꞌapa e ojroner, che e Jesús.
Entonces e Jesús sutpa uyubꞌi tuaꞌ e gente y che:
—Y ¿tucꞌa tuaꞌ uche e ajyum rum taca e ajpatnarobꞌ era? 16 Cꞌani inwareox era tucꞌa cꞌani uche: Jaxir cꞌani axin uchamse tunor e ajpatnarobꞌ era, y de allí cꞌani axin upojro otro inmojr ajpatnarobꞌ xeꞌ cꞌani utoyi tuaꞌ apatnobꞌ tama e rum, che e Jesús.
Pues conda e gente cꞌapa uyubꞌiobꞌ tunor e ojroner era bꞌactobꞌ meyra y quetpobꞌ tzajtaca utobꞌ, porque war unatobꞌ que e ajpatnarobꞌ era xeꞌ uputputir utobꞌ jax e gente xeꞌ tuobꞌ e Israel. 17 Pero e Jesús uchꞌujcu uwira tunor e gente era y che:
—Y ¿tucꞌa war che lo que chꞌar tzꞌijbꞌabꞌir tama uyojroner e Dios[a] tiaꞌ che que:
E tun xeꞌ chocbꞌir ani umen e ajcheyaj ototobꞌ
ayan meyra ucꞌampibꞌir coner?
Bꞌan che tama uyojroner e Dios. 18 Tin e axin acucrema tujor e tun era axin ucꞌocchi ubꞌa tamar, y jay oꞌjri e tun era tujor inteꞌ, jaxir tuaꞌ aquetpa uchꞌeir umen umabꞌambꞌanir, che e Jesús conda war uchecsu tut e gente que jaxir jax e tun.
Conda cora winicobꞌ cꞌani ani umajres e Jesús
Mateo 21:45-46; 22:15-22; Marcos 12:12-17
19 Pues entonces qꞌuijnobꞌ uwinquirobꞌ e inmojr sacerdotiobꞌ y e ajcanseyajobꞌ tama uley e Moisés umen lo que arobꞌnobꞌ umen e Jesús, porque uyubꞌiobꞌ lo que che e ojroner era que jaxirobꞌ jax e ajpatnarobꞌ xeꞌ uputputir utobꞌ. Y tamar era cay usajcobꞌ cocha tuaꞌ uquete uturbꞌobꞌ e Jesús macuir e cárcel, pero ma cocha tuaꞌ uchiobꞌ coner cocha war ubꞌacriobꞌ e gente umen que war ucꞌaniobꞌ e Jesús tunorobꞌ. 20 Entonces cay uyebꞌta ixin cora winicobꞌ tuaꞌ uche ubꞌobꞌ que erobꞌach ani tut e Jesús. Cꞌani ani umajresobꞌ e Jesús tuaꞌ erer utuchꞌiobꞌ tut e ley tamar taca uyojroner tuaꞌ uyubꞌi uqꞌuechiobꞌ axin tut e gobernador. 21 Y entonces e winicobꞌ era cay uyubꞌiobꞌ tuaꞌ e Jesús y chenobꞌ:
—Cawajcanseyajet, canata que aware ajtaca lo que erach. Y bꞌan war ache tut tunor e gente, y machi war aturbꞌa abꞌa tamar inteꞌ jay nuquir winic o jay chuchu. Y non war canata que war icanseyan bꞌan taca cocha ucꞌani tuaꞌ axana inteꞌ tama ubꞌir e Dios. 22 Pero ayan lo que cꞌani canata tacaret: ¿Ucꞌani ca tuaꞌ catoyi e tumin lo que arobꞌnon umen e César que ucꞌani tuaꞌ amorojsena iraj iraj, o machi? che e ajmajresiajobꞌ era.
23 Pero e Jesús cꞌotoy unata lo que cꞌani ani achena upater umenerobꞌ y che:
—¿Tucꞌa tuaꞌ que war iche cocha era tuaꞌ ani imajresen? 24 Irseniquen inteꞌ tumin xeꞌ wechꞌer ut. ¿Chi uyeroj xeꞌ turu tamar? ¿Tucꞌa ucꞌabꞌa xeꞌ tzꞌijbꞌabꞌir tamar? che e Jesús.
Entonces chenobꞌ:
—Jax tuaꞌ e rey César, che e gente.
25 Y che e Jesús:
—Ajcꞌunic e César lo que jaxir ucꞌajti y ajcꞌunic e Dios lo que jaxir ucꞌajti, che e Jesús.
26 Y matucꞌa tamar ubꞌna umajresobꞌ e Jesús tut e gente, sino que bꞌactobꞌ tama tunor lo que che e Jesús, y subꞌajrobꞌ que matucꞌa ubꞌna uchiobꞌ tacar.
¿Erach ca que cꞌani asutpa abꞌixcꞌa e gente?
Mateo 22:23-33; Marcos 12:18-27
27 Pues nacpat era checta tari cora winicobꞌ tut e Jesús xeꞌ tuaꞌ inteꞌ grupo religioso xeꞌ ucꞌabꞌa saduceo. Y e saduceobꞌ era ucansiobꞌ que mamajchi tuaꞌ asutpa abꞌixcꞌa tujam e chamenobꞌ. Y tamar era cꞌani ani umajresobꞌ e Jesús y chenobꞌ:
28 —Cawinquiret, chꞌar tzꞌijbꞌabꞌir tama uley e Moisés que jay axin anujbꞌi inteꞌ sitz taca inteꞌ ijchꞌoc, pero conda mato tucꞌa umaxtac achamay e winic, entonces uwijtzꞌin e winic era ucꞌani tuaꞌ asutpa anujbꞌi taca e ixic tuaꞌ achꞌijrtesian tacar. Y e sitz xeꞌ axin acuxpa bꞌajxan ucꞌani tuaꞌ aturbꞌana ucꞌabꞌa usacun xeꞌ chamay. 29 Pues tama inyajr ayan inteꞌ familía xeꞌ ayan siete xeꞌ intarer tejromtacobꞌ. Entonces xeꞌ bꞌajxan ixin nujbꞌi taca inteꞌ ijchꞌoc, pero chamay y matucꞌa umaxtac uyacta. 30 Entonces e ijtzꞌimbꞌir uchꞌami uwixcar usacun ani tuaꞌ anujbꞌi tacar, pero jaxir chamay ubꞌan, y matucꞌa umaxtac uyacta. 31 Entonces e uxteꞌ tejromtac sutpa nujbꞌi otronyajr taca uwixcar usacunobꞌ, y bꞌan cꞌapa uchiobꞌ tunor e siete tejromtacobꞌ. Y inteꞌ intiobꞌ ixin uchꞌamiobꞌ e ixic era, y mamajchi checta umaxtac tacar. Y bꞌan taca chamayobꞌ tunor e siete tejromtacobꞌ era. 32 Entonces tama ucꞌapesnibꞌir tunor era chamay e ixic ubꞌan. Tara acꞌapa e ojroner. 33 Entonces arenon ¿tucꞌa tuaꞌ anumuy conda asujta abꞌixqꞌuesna tunor e gente tara tor e rum? Y ¿chi tacar tuaꞌ aquetpa ixcarbꞌir e ixic era cocha cꞌapa nujbꞌi taca e siete tejromtacobꞌ era? che e saduceobꞌ.
34 Entonces che e Jesús:
—Tara tor e rum e winicobꞌ y e ixictac war anujbꞌiobꞌ. 35 Pero tama e tiempo xeꞌ tuaꞌ watar tunor tin e tawar cꞌani asujta abꞌixqꞌuesna tujam e chamenobꞌ, y machi ixto tuaꞌ anujbꞌiobꞌ más y nien machi ixto tuaꞌ uyajcꞌuobꞌ uwijchꞌoctacobꞌ tuaꞌ anujbꞌiobꞌ más. 36 Porque machi ixto tuaꞌ asutpa achamayobꞌ más. Pero tunor e gente era xeꞌ tuaꞌ asujta abꞌixqꞌuesna tujam e chamenobꞌ cꞌani aquetpobꞌ bꞌan cocha uyangelobꞌ e Dios y aquetpobꞌ umaxtacobꞌ e Dios umen que sujta bꞌixqꞌuesnobꞌ. 37 Pues e Moisés canseyan ubꞌan que cꞌani asutpa abꞌixqꞌuesna e gente. Porque chꞌar tzꞌijbꞌabꞌir umener que conda jaxir turu tut e chꞌac tꞌix xeꞌ war atzꞌajbꞌa cay uyubꞌi unuc e Dios xeꞌ che que Cawinquirar Dios jax Udiosir e Abraham y que jax Udiosir e Isaac y que jax Udiosir e Jacob. 38 Pues Cadiosir majax Udiosirobꞌ tin e chamen, sino que jax Udiosirobꞌ tin e bꞌixir turobꞌ, che e Jesús.
39 Entonces cay tzayobꞌ cora ajcanseyajobꞌ tama uley e Moisés y chenobꞌ:
—Imbꞌutz lo que war acanse era, chenobꞌ.
Bꞌan chenobꞌ porque jaxirobꞌ ucꞌubꞌsiobꞌ que cꞌani asujta abꞌixqꞌuesnobꞌ tin e chamenobꞌ.
40 Entonces subꞌajrobꞌ e saduceobꞌ era y matucꞌa más uyubꞌiobꞌ tuaꞌ e Jesús.
¿Chi tuaꞌ sitzbꞌir e Cristo?
Mateo 22:41-46; Marcos 12:35-37
41 Pues entonces che e Jesús:
—¿Tucꞌa war che tiut lo que chꞌar tzꞌijbꞌabꞌir tama uyojroner e Dios que che que e David jax utata viejobꞌir e Cristo xeꞌ jax xeꞌ tuaꞌ watar ucorpeson? 42 Porque chꞌar tzꞌijbꞌabꞌir umen e David tama e ojroner xeꞌ ucꞌabꞌa Salmos [b]que:
43 este que inturbꞌa tunor tin e aqꞌuijna uwiretobꞌ yebꞌar utajn oꞌc
este que ucꞌubꞌsetobꞌ tunorobꞌ.”
Bꞌan chꞌar tzꞌijbꞌabꞌir umen e David. 44 Entonces cocha e David uyare: “Niwinquiraret” tama e Cristo, ¿cocha tuaꞌ caware que e Cristo jax taca usitz e David ubꞌan? che e Jesús.
Iwiric tama e ajcanseyajobꞌ tama uley e Moisés
Mateo 23:1-36; Marcos 12:38-40; Lucas 11:37-54
45 Pues tunor e gente war uyubꞌiobꞌ uyojroner e Jesús y tamar era jaxir cay uyare uyajcanuarobꞌ y che:
46 —Iwiric tamar lo que acanseyanobꞌ e ajcanseyajobꞌ tama uley e Moisés, porque jaxirobꞌ war uyusre tuaꞌ ulapiobꞌ e bꞌujc xeꞌ nojta xeꞌ acꞌaxi esto tama unuc uyocobꞌ tuaꞌ anatanwa umen e gente que jaxirobꞌ nuquir winicobꞌ. Y jaxirobꞌ war uyusreobꞌ tuaꞌ atajttzꞌobꞌ umen e gente tama e chinam. Y jaxirobꞌ war usajcobꞌ e turtar xeꞌ más galanic tuaꞌ aturuanobꞌ tamar tama e sinagoga. Y jaxirobꞌ war usajcobꞌ e bꞌajxan turtar tor e mesa tama inteꞌ nojqꞌuin tuaꞌ awiobꞌ bꞌajxan. 47 Y ulocsiobꞌ uyototobꞌ e ixictac xeꞌ chamen uviejobꞌ. Y tuaꞌ eꞌrnobꞌ umen e gente que imbꞌutzobꞌ tut e Dios axin ucꞌajtiobꞌ meyra tiempo taca e Dios. Y tamar era cꞌani ajajtzꞌobꞌ más nojta umen e Dios tama e día tuaꞌ e juicio, che e Jesús.
