SAN LUCAS 18

E ojroner tama e juez y e ixic xeꞌ chamen uviejo

1 Entonces e Jesús cay ucanse uyajcanuarobꞌ taca inteꞌ ojroner xeꞌ mucur cora que machi tuaꞌ acꞌoyobꞌ conda war ucꞌajtiobꞌ taca e Dios tamar lo que war ucꞌaniobꞌ. 2 Y che jaxir:

—Ayan inteꞌ ojroner tama inteꞌ juez xeꞌ machi ubꞌacre e Dios y nien e winicobꞌ. 3 Y tama e chinam tiaꞌ patna e juez era ayan inteꞌ ixic xeꞌ chamen uviejo xeꞌ war ayopa tut tuaꞌ atacarna umener tamar lo que war unumse ubꞌa taca inteꞌ xeꞌ war aqꞌuijna uwira ubꞌobꞌ tacar. 4 Y ixin e tiempo pero e juez machi cꞌani utacre e ixic. Pero tari e tiempo conda e juez cay ubꞌijnu jax taca y che: “Motor que machi imbꞌacre e Dios y nien e winicobꞌ, 5 pero cocha e ixic era war ucꞌoyjresen umen que war ayopa taniut iraj iraj, cꞌani intacre tuaꞌ machi ayopa más”, jaxto ubꞌijnu e juez. Tara acꞌapa e ojroner.

6 ’Ubꞌinic lo que uche e juez xeꞌ ajmabꞌambꞌanir que conda numuy cora día cay ubꞌijnu tuaꞌ utacre e ixic xeꞌ chamen uviejo. 7 Y Cadiosir, ¿machi ca tuaꞌ ucorpes tunor tin e axin usicbꞌa ut conda war ucꞌajtiobꞌ tacar iraj iraj? Cꞌani yaꞌ. Y ¿eixna ca tuaꞌ utacre e gente era? Machi. 8 Y cꞌani inwareox era que Cadiosir cꞌani axin utacre e gente era wacchetaca. Pero conda insutpa waten nen xeꞌ Uyunenen e winic otronyajr, ¿intajwito ca nic tara tor e rum tin e warto acꞌubꞌseyanobꞌ tama e Dios? che e Jesús.

E ojroner tama e fariseo y e ajmorojseyaj tumin tuaꞌ e gobierno

9 Pues entonces e Jesús cay canseyan taca otronteꞌ ojroner xeꞌ mucur cora tama tin e uchebꞌiobꞌ que imbꞌutz turobꞌ tut e Dios, pero xeꞌ war uxejbꞌiobꞌ ut e inmojr gente. Y che:

10 —Ayan chateꞌ winicobꞌ xeꞌ ixiobꞌ tama e templo tuaꞌ ucꞌajtiobꞌ taca e Dios. Y inteꞌ winic jax inteꞌ fariseo y otronteꞌ winic jax inteꞌ ajmorojseyaj tumin tuaꞌ e gobierno. 11 Y e fariseo war eꞌron tut e altar y cay ucꞌajti taca e Dios cocha era y che: “O Dios, intattzꞌi acꞌabꞌa que nen majax bꞌanen cocha e inmojr winicobꞌ xeꞌ ajxujchꞌobꞌ, o xeꞌ ajmajresiajobꞌ, o xeꞌ meyra axanobꞌ taca e ajnajtir ixictac, y nien majax bꞌanen cocha e ajmorojseyaj tumin tuaꞌ e gobierno. 12 Nen meyra war inche lo que imbꞌutz este que inwacta tuaꞌ inweꞌ chateꞌ día tama inteꞌ inteꞌ semana tuaꞌ incꞌajti taca e Dios, y war intoyi nidiezmo tama tunor lo que intojya.” Bꞌan che e fariseo conda war ucꞌajti taca e Dios. 13 Pero e ajmorojseyaj tumin tuaꞌ gobierno quetpa wawan innajt cora tut e altar y uchꞌubꞌa ut y machi utꞌabꞌse ut tuaꞌ uwira tichan. Y cay uyobꞌi uyalma y cay ucꞌajti taca e Dios y che: “O Dios, yajtan niut, porque nen ajmabꞌambꞌaniren toit”, che e ajmorojseyaj tumin tuaꞌ e gobierno conda war ucꞌajti taca e Dios. 14 Y cꞌani inwareox era que e ajmorojseyaj tumin tuaꞌ gobierno era sutpa ixin tama uyotot corpesbꞌir umen e Dios. Pero majax bꞌan chena taca e fariseo porque tin e uche ubꞌa que jax taquix cꞌani amanxujresna, pero tin e axin umanxujres ubꞌa cꞌani achꞌijrsena, che e Jesús.

Conda e Jesús uchojbꞌes ut e maxtac

Mateo 19:13-15, Marcos 10:13-16

15 Pues ayan tin e cay utares cora maxtac tut e Jesús tuaꞌ upacbꞌu ucꞌabꞌ tama ujorobꞌ, pero conda uyajcanuarobꞌ uwirobꞌ tunor era cay chenobꞌ que: “Ira itares imaxtac tut Cawinquirar.” 16 Pero e Jesús upejca e maxtac y che:

—Actanic tuaꞌ ayopobꞌ taniut tunor e bꞌiqꞌuit maxtac, y ira iquete iwabꞌuobꞌ, porque tunor tin e axin acꞌubꞌseyanobꞌ tama e Dios bꞌan cocha war uchiobꞌ e bꞌiqꞌuit maxtac era cꞌani oꞌchoyobꞌ tama uchinam e Dios. 17 Y cꞌani inwareox coner que tin e machi uchꞌami uchinam e Dios bꞌan cocha inteꞌ chuchu maxtac machi tuaꞌ oꞌchoy tamar, che e Jesús.

Conda inteꞌ chꞌom sitz xeꞌ meyra ayan utumin ojron taca e Jesús

Mateo 19:16-30; Marcos 10:17-31

18 Pues entonces cꞌotoy inteꞌ nuxi winic tut e Jesús y cay uyubꞌi tuaꞌ y che:

—Niwajcanseyajet xeꞌ erachet, ¿tucꞌa nic tuaꞌ inche nen tuaꞌ inchꞌami e cuxtar xeꞌ machi tuaꞌ acꞌapa? che e nuxi winic era.

19 Y che e Jesús:

—Net war awaren que nen erachen. Pero jax taca e Dios xeꞌ erach. Y tamar era war awaren que Diosen nen ubꞌan. 20 Pero net anata lo que arobꞌna umen e Dios, que ira iꞌxin taca inteꞌ ajnajtir ixic, ira ichamsan, ira ixujchꞌian, ira imajresian, y cꞌupsen atata y atuꞌ, che e Jesús.

21 Y che e winic:

—Tunor era inchix desde que chuchuento, che e winic.

22 Pero conda e Jesús uyubꞌi e ojroner era, sutpa ojron y che:

—Ayanto lo que ucꞌanto tuaꞌ ache, quiqui chono tunor lo que ayan tabꞌa y ajcꞌun tin e matucꞌa ayan tacarobꞌ. Y tamar era cꞌani aquetpa meyra atuanibꞌir tuaꞌ achꞌami conda iꞌxin tut e qꞌuin. Y conda acꞌapa achoni tunor lo que tabꞌa, lar incoꞌ tacaren, che e Jesús.

23 Pero conda e winic uyubꞌi e ojroner era quetpa tzajtaca ut cocha ayan meyra utumin y machi cꞌani uchoni lo que ayan tuaꞌ. 24 Pero conda e Jesús uwira que tzajtaca ut, ojron otronyajr y che:

—Intran tuaꞌ oꞌchoy tama uchinam e Dios tin e ayan meyra utumin. 25 Y intran tuaꞌ anumuy inteꞌ nuxi arac xeꞌ ucꞌabꞌa camello tama uchꞌenar inteꞌ aguja, pero más intran tuaꞌ oꞌchoy tama uchinam e Dios inteꞌ xeꞌ war ucojco tama utumin xeꞌ meyra ayan tuaꞌ, che e Jesús.

26 Entonces tin e war uyubꞌiobꞌ lo que ojron chenobꞌ:

—Y jay inteꞌ xeꞌ meyra ayan utumin cocha era machi uyubꞌi acorpesna, ¿chi tuaꞌ acorpesna? chenobꞌ.

27 Y che e Jesús:

—Pues mamajchi tuaꞌ acorpesna tamar taca utumin, pero tunor era intran tut e winicobꞌ. Pero Cadiosir erer uche tunor cocha jaxir ayan ucꞌotorer, che e Jesús.

28 Y che e Pedro:

—Pero Niwinquiraret, non era cawactix tunor lo que ayan ticabꞌa tuaꞌ caxin tacaret, che e Pedro.

29 Entonces ojron e Jesús y che:

—Cꞌani inwareox era que tunor tin e axin uyacta uyotot o utuꞌ y utata o usacunobꞌ y uwijtzꞌinobꞌ o uwixcar o umaxtac tuaꞌ taca ucꞌubꞌse e Dios, 30 cꞌani uchꞌami más tuaꞌ e Dios tara tor e rum y nacpat era cꞌani uchꞌami e cuxtar xeꞌ machi tuaꞌ acꞌapa conda axin tichan tut e qꞌuin, che e Jesús.

Conda e Jesús uchecsu otronyajr que jaxir tuaꞌ achamesna

Mateo 20:17-19; Marcos 10:32-34

31 Entonces e Jesús upejca e doce uyajcanuarobꞌ tuaꞌ alocꞌoyobꞌ cora najtir, y de allí cay ojron tacarobꞌ y che:

—Coner era cꞌani caxin esto tama e chinam Jerusalem tuaꞌ acꞌapa achempa tunor lo que chꞌar tzꞌijbꞌabꞌir umen e profetobꞌ xeꞌ turuanobꞌ tama e onian tiempo tamaren nen xeꞌ Uyunenen e winic. 32 Porque yajaꞌ tama e chinam Jerusalem cꞌani anjcꞌuna tama ucꞌabꞌ tin e majax tuobꞌ e Israel, y cꞌani asactzeniobꞌ nipater, y cꞌani ucꞌayenobꞌ bꞌan taca cocha ubꞌijnu uchiobꞌ, y axin utujbꞌienobꞌ. 33 Y de allí axin uwatzꞌienobꞌ y axin uchamsenobꞌ. Pero tama e uxteꞌ día cꞌani insujta imbꞌixqꞌuesna tujam e chamenobꞌ, che e Jesús.

34 Pero uyajcanuarobꞌ machi unatobꞌ tucꞌa tamar war oꞌjron, y nien machi unatobꞌ tucꞌa war che e ojroner era, y tamar era quetpa mucur tunor tutobꞌ.

Conda e Jesús utzꞌacpes inteꞌ winic xeꞌ tajpem unacꞌut

Mateo 20:29-34; Marcos 10:46-52

35 Entonces conda e Jesús cꞌanix acꞌotoy tama e chinam Jericó, turu inteꞌ winic xeꞌ tajpem unacꞌut tutiꞌ e bꞌir xeꞌ war ucꞌajti e tumin taca tin e war anumuyobꞌ. 36 Pero conda cꞌotoy unata que war anumuy meyra gente tut e bꞌir tiaꞌ turu cay uyubꞌi tuaꞌ e gente tuaꞌ unata chi war anumuy. 37 Y arobꞌna que jax e Jesús xeꞌ tuaꞌ e chinam Nazaret xeꞌ war anumuy. 38 Entonces jaxir cay aru taca inteꞌ nuxi nuc y che:

—Jesús Oo, xeꞌ sitzbꞌiret tuaꞌ e David, yajtan niut, che e winic xeꞌ tajpem unacꞌut.

39 Entonces tin e war axanobꞌ tut e bꞌir cay uyareobꞌ tuaꞌ machi aꞌru. Pero jaxir más cay aru y che:

—Sitzbꞌiret tuaꞌ e David, yajtan niut, inwaret, che e winic.

40 Entonces quetpa wawan e Jesús y uyare tuaꞌ ataresna. Y conda qꞌuejcha cꞌotoy e winic tuyejtzꞌer cay uyubꞌi tuaꞌ y che:

41 —¿Tucꞌa acꞌani tuaꞌ inche tacaret? che e Jesús.

Y e winic xeꞌ tajpem unacꞌut che:

—Niwinquiraret, incꞌani tuaꞌ awajqꞌuen unacniut tuaꞌ enron, che e winic.

42 Y e Jesús che:

—Chꞌama unacꞌoit, tzꞌacpesbꞌiret umen que war icꞌubꞌseyan tamaren, che e Jesús.

43 Y wacchetaca uchꞌami unacꞌut tuaꞌ uyubꞌi eꞌron. Y ixin tupat e Jesús, war utattzꞌi ucꞌabꞌa e Dios. Y tunor e gente xeꞌ uwirobꞌ lo que numuy era cay utattzꞌiobꞌ ucꞌabꞌa e Dios ubꞌan.

<- SAN LUCAS 17 SAN LUCAS 19 ->