—Cꞌapa e vino lo que ayan ani. Y ¿tucꞌa tuaꞌ cache coner? O ¿ayan ca tucꞌa erer ache net tuaꞌ atacrion era? che utuꞌ e Jesús.

4 Pero e Jesús uyare utuꞌ y che:

—Ixic, ¿tucꞌa tuaꞌ que war awaren cocha era? ¿Machi ca anata que merato acꞌotoy niwora tuaꞌ acay inchectes nicꞌotorer tut e gente? Actan tunor era tacaren, che e Jesús.

5 Pero utuꞌ e Jesús, cay uyare tin e war upuquiobꞌ axin e comida taca e gente y che:

—Chenic tunor lo que axin uyareox jaxir, che utuꞌ e Jesús.

6 Y yajaꞌ warobꞌ seis nuquir bongo xeꞌ chembꞌir taca e tun xeꞌ uwajpi seis bꞌujr jaꞌ tama unac. Pues e bongo ayan ucꞌampibꞌir tuaꞌ ucojco e jaꞌ tuaꞌ upoquiobꞌ tuqꞌuic tuqꞌuic tamar. Porque chꞌar tzꞌijbꞌabꞌir tama uley e Moisés que ucꞌani tuaꞌ apojca tunor lo que ayan. 7 Entonces ojron e Jesús taca tin e war upuqui e comida axin tut e gente y che:

—Yaric e jaꞌ tama tunor e bongo era este que abꞌutcꞌa tunor, che e Jesús.

Entonces uchiobꞌ bꞌan cocha arobꞌnobꞌ umen e Jesús. 8 Entonces e Jesús sutpa uyare otronyajr y che:

—Locsenic imbꞌijc y qꞌuechic chic tut e ajyum nojqꞌuin, che e Jesús.

Y bꞌan uchiobꞌ. 9 Entonces conda e ajyum nojqꞌuin cay uyejta imbꞌijc e jaꞌ cꞌotoy unata que vino. Pero machi war unata tiaꞌ tari, ajtaca tin e war upuqui axin e comida war unatobꞌ que e vino era jaꞌ ani. Y tamar era e ajyum nojqꞌuin upejca tari e winic xeꞌ war anujbꞌi 10 y uyare:

—Tama inteꞌ nojqꞌuin bꞌajxan apujca axin e vino xeꞌ más galan uyuchnar, y de allí conda uchnix meyra vino acay aꞌjcꞌunobꞌ e vino xeꞌ más calapir. Pero net war acojco este era tuaꞌ awajcꞌu e vino xeꞌ más galan uyuchnar. Bꞌan che e ajyum nojqꞌuin uyare e winic xeꞌ war anujbꞌi.

11 Pues jax era e bꞌajxan milagro lo que uche e Jesús, y conda uche cay checsuna que jaxir ayan utawarer, y tamar era uyajcanuarobꞌ cay cꞌubꞌseyanobꞌ tamar. Pues tunor era numuy tama e chinam Caná tama e departamento Galilea.

12 Entonces conda cꞌapa e nujbꞌiar ixin e Jesús esto tama e chinam Capernaum taca utuꞌ y uwijtzꞌinobꞌ y taca uyajcanuarobꞌ. Y yajaꞌ quetpobꞌ cora día.

—Locsenic tunor tara. Ira iche más e chonmar tama uyotot Nitata, che e Jesús.

17 Y tamar era cꞌajpesna umen uyajcanuarobꞌ que chꞌar tzꞌijbꞌabꞌir tama uyojroner e Dios[b] y che:

—War uchien innumse nibꞌa umen que war intzꞌunle uyotot Nitata Dios, xeꞌ chꞌar tzꞌijbꞌabꞌir tama uyojroner e Dios.

18 Entonces ayan cora winicobꞌ xeꞌ tuobꞌ e Israel xeꞌ cay uyubꞌiobꞌ tuaꞌ e Jesús y chenobꞌ:

—Y ¿tucꞌa tuaꞌ awirsion tuaꞌ achectes ticoit que net ayan acꞌotorer tuaꞌ ache tunor era? che e winicobꞌ era.

19 Y che e Jesús:

—Tijresic e templo era y nen tuaꞌ anchi otronyajr tama uxteꞌ día, che e Jesús.

20 Y che e winicobꞌ:

—Cuarenta y seis año uqꞌuechion tuaꞌ cache e templo era y ¿net ca tuaꞌ abꞌijnu aꞌchi tama uxteꞌ día? che e winicobꞌ era.

21 Pero e templo lo que war oꞌjron e Jesús tamar, majax e nuxi otot lo que ayan tara sino que jax ucuerpo jaxir. 22 Y tamar era conda sutpa bꞌixcꞌa e Jesús tujam e chamenobꞌ cꞌajpa umen uyajcanuarobꞌ tunor e ojroner era, y cꞌotoy cꞌubꞌseyanobꞌ tamar lo que chꞌar tzꞌijbꞌabꞌir tama uyojroner e Dios y tama tunor lo que arobꞌnobꞌ umener.