Hebreos 8

E Jesucristo, jax Casacerdote xeꞌ más nojta

1 Pues tamar lo que war catzꞌijbꞌa axin, lo que más ayan ucꞌampibꞌir jax era: Que non ayan inteꞌ Casacerdote xeꞌ más nojta xeꞌ war aturuan tama unojcꞌabꞌ e turtar tuaꞌ Catata Dios tichan tut e qꞌuin. 2 Y coner Casacerdote era war apatna tama e tabernáculo xeꞌ erach lo que ayan tut e qꞌuin xeꞌ chembꞌir umen Cawinquirar Dios, y majax umen inteꞌ winic. 3 Pues inteꞌ inteꞌ xeꞌ aquetpa inteꞌ sacerdote xeꞌ más nojta turbꞌabꞌirobꞌ tuaꞌ uyajcꞌuobꞌ cora ofrenda y tuaꞌ uchamsiobꞌ cora arac tuaꞌ utoyi tama umabꞌambꞌanirobꞌ e gente, y tamar era Cawinquirar Jesucristo xeꞌ turu tut e qꞌuin ucꞌani tuaꞌ uyajcꞌu cora ofrenda yajaꞌ tichan ubꞌan. 4 Pero jay turuto ani tara tor e rum, ma cocha erer ani aquetpa inteꞌ sacerdote cocha ayanto chi xeꞌ aquetpobꞌ sacerdotiobꞌ xeꞌ war uyajcꞌuobꞌ cora ofrenda e Dios bꞌan cocha arobꞌnobꞌ tuaꞌ uchiobꞌ tama uley e Moisés. 5 Pero lo que war uchiobꞌ tin e aquetpobꞌ sacerdotiobꞌ tara tor e rum aquetpa bꞌan cocha inteꞌ uchequerir xeꞌ chꞌur tara tor e rum tamar lo que ayan tut e qꞌuin. Y canata que bꞌan porque conda e Moisés cꞌani uche e tabernáculo arobꞌna umen e Dios y che: “Turbꞌan abꞌa tuaꞌ ache e tabernáculo bꞌan taca cocha uwirnar uchequerir lo que cay inwirset tama ujor e witzir tama e lugar Sinaí”, che e Dios. 6 Pero Casacerdote xeꞌ más nojta ticabꞌa ajcꞌuna upatnar xeꞌ más nojta ubꞌan que e inmojr sacerdote, cocha jaxir cꞌapa uyustes inteꞌ pacto que más ayan ucꞌampibꞌir tut e Dios y tut e winicobꞌ que inteꞌ xeꞌ chembꞌir ixnix, cocha e pacto era chembꞌir taca inteꞌ tuanibꞌir xeꞌ más nojta ucꞌampibꞌir tama tunor.

7 Porque jay uyubꞌi ani ucorpeson e onian pacto xeꞌ chembꞌir taca e Moisés, machi ani ucꞌani otronteꞌ pacto era xeꞌ chembꞌir umen Cawinquirar Jesucristo. 8 Pero Cadiosir, conda uwira e gente tama e tiempo yajaꞌ, uwira que ayan lo que ucꞌanto y tamar era ojron y che:

Watar e día, che Cawinquirar Dios,

conda cꞌani inche otronteꞌ pacto taca e gente tuaꞌ e Israel,

y taca e gente tama uchꞌajnar e Judá.

9 Y e pacto era xeꞌ imbꞌutz lo que cꞌani inche tacarobꞌ majax bꞌan cocha inteꞌ pacto lo que cay inche taca utata viejobꞌirobꞌ

conda cay inchuqui ucꞌabꞌobꞌ tuaꞌ inlocsiobꞌ tama e lugar Egipto.

Pues jaxirobꞌ machi cꞌubꞌseyanobꞌ tut e onian pacto era,

y tamar era ixien inwactobꞌ bꞌan taca, che Cawinquirar Dios.

10 Pues e pacto lo que cꞌani inche taca e gente tuaꞌ e Israel tama e tiempo xeꞌ watar jax era, che Cawinquirar Dios,

Cꞌani inturbꞌa niwojroner tama ujorobꞌ,

y cꞌani intzꞌijbꞌa tunor era tama uyalmobꞌ ubꞌan.

Y tamar era nen tuaꞌ inquetpa Udiosirenobꞌ,

y jaxirobꞌ tuaꞌ aquetpobꞌ nimaxtacobꞌ ubꞌan, che Cawinquirar Dios.

11 Y tama e tiempo yajaꞌ mamajchi chi tuaꞌ axin ucanse upiarobꞌ

y nien tuaꞌ axin ucanse uyermanuobꞌ tuaꞌ acꞌotoy unatobꞌ chi Cawinquirar Dios,

porque tunor e gente tuaꞌ unatobꞌ chien nen,

y bꞌan tin e más chuchu este tin e más nojta.

12 Y cꞌani inxin incꞌumpa tacarobꞌ y cꞌani innajpes tunor lo que uchiobꞌ que majax imbꞌutz,

y machi ixto tuaꞌ incꞌajpes umabꞌambꞌanirobꞌ otronyajr,

che e Dios. 13 Y conda ojron e Dios y che que ayan inteꞌ pacto xeꞌ imbꞌutz, war che era que e onian pacto lo que chembꞌir taca e Moisés war asatpa axin y que war acꞌapa era este que war anajpa axin.

<- Hebreos 7 Hebreos 9 ->