Ester 5

Conda e Ester ochoy tuaꞌ oꞌjron taca e rey

1 Entonces conda numuy uxteꞌ día que uyacta tuaꞌ aweꞌ, e Ester ulapi ubꞌujc lo que ucꞌampes tuaꞌ aquetpa chequer que jaxir reina, y ixin ochoy macuir e otot tiaꞌ turu e rey. Y quetpa wawan innajt cora tiaꞌ aquetpa chequer tut e rey. Y e rey war aturuan tama uturtar tiaꞌ aquetpa chequer e puerta tama e ocher. 2 Y conda e rey uwira que war e Ester innajt cora tiaꞌ chequer tut, cay tzay y ubꞌijnu tuaꞌ uqꞌueche ubordon[a] tut tuaꞌ uyare oꞌchoy. Entonces ixin e Ester tuyejtzꞌer e rey y upijchꞌi ujor e bordón. 3 Entonces ojron e rey taca e Ester y che:

—Ester, ¿ayan ca tucꞌa war acꞌani? Cꞌajtin lo que acꞌani y nen cꞌani inwajqꞌuet, motor que iꞌxin acꞌajti tacaren mitad tama tunor lo que ayan tanibꞌa, che e rey.

Entonces ojron e Ester y che:

4 —Pues jay aquetpa imbꞌutz toit, niwinquiret, quisinic inwaret tuaꞌ icꞌotoy coner tama inteꞌ wiar xeꞌ ustabꞌir nimener xeꞌ tuaꞌ aquetpa bꞌan cocha inteꞌ tattzꞌarsiaj tabꞌa, y quisinic que aqꞌueche axin e Amán ubꞌan, che e Ester. Y quetpa imbꞌutz tut e rey lo que arobꞌna umen e Ester.

Entonces e rey uyare cora umanobꞌ y che:

5 —Quiquic sajcanic e Amán, y arenic tuaꞌ uche lo que war uyusre e reina Ester, che e rey.

Y bꞌan cocha era ixin e rey y e Amán esto tama e wiar lo que ustabꞌir umen e Ester. 6 Y conda war uyuchꞌiobꞌ e vino e rey sutpa uyubꞌi tuaꞌ e Ester y che:

—Cꞌajtin lo que acꞌani y nen cꞌani inwajqꞌuet, motor que iꞌxin acꞌajti mitad tama tunor lo que ayan tacaren, che e rey.

7 Entonces ojron e Ester y che:

—Pues unsre tuaꞌ incꞌajti tacaret cocha era: 8 Pues jay net, niwinquiret, war ayajta niut, y jay itzay tuaꞌ ache lo que war unsre era, y jay turix tuaꞌ awajqꞌuen lo que axin incꞌajti tacaret, entonces cꞌani inwaret tuaꞌ icꞌotoy ejcꞌar taca e Amán tama otronteꞌ wiar xeꞌ cꞌani unstes. Y yajaꞌ taca cꞌani inwaret lo que war incꞌani, che e Ester uyare e rey.

Conda e Amán uyustes inteꞌ teꞌ xeꞌ nojta uwatar tiaꞌ tuaꞌ achꞌubꞌna e Mardoqueo

9 Pues conda cꞌapa e wiar locꞌoy e Amán war atzay meyra. Pero conda uwira e Mardoqueo tiaꞌ turu tama uyocher uyotot e rey, y conda uwira que machi achpa y que nien machi bꞌacta conda uwira numuy e Amán, qꞌuijna meyra este que cay ojmay uchꞌichꞌer. 10 Pero jaxir machi uchecsu ubꞌa tama e hora era que war aqꞌuijna uwira e Mardoqueo. Pero conda cꞌotoy tuyotot uyare tuaꞌ apejcna cora winicobꞌ xeꞌ atzay uwira ubꞌa tacar y e Zeres xeꞌ jax uwixcar, 11 y cay utattzꞌi ubꞌa tutobꞌ que jaxir ayan meyra lo que ayan tacar, y que ayan meyra umaxtacobꞌ, y cay uchecsu ubꞌan cocha sicbꞌana umen e rey tuaꞌ aquetpa tujor e inmojr ajcꞌotorerobꞌ y tujor e inmojr ajcꞌamparobꞌ. 12 Y de allí ojronto e Amán y che:

—Pues jax taca nen xeꞌ pejcnen umen e reina Ester tuaꞌ incꞌotoy tama e wiar lo que uyajcꞌu e rey sajmi, y uyarenix ubꞌan tuaꞌ incꞌotoy otronyajr tama inteꞌ wiar lo que cꞌani uyajcꞌu ejcꞌar. 13 Pero matucꞌa ucꞌampibꞌir tunor era taniut conda inwira e Mardoqueo xeꞌ chꞌajnarir tuaꞌ e Israel que intaca turu tama uyocher uyotot e rey y que machi acotuan taniut conda innumuy, che e Amán.

14 Entonces ojron uwixcar y e winicobꞌ xeꞌ atzay uwira ubꞌa tacar y chenobꞌ:

—¿Tucꞌa tuaꞌ machi aware tuaꞌ oꞌstana inteꞌ nuxi teꞌ xeꞌ ucojco veintidós metro tama uwatar, y conda war asacojpa ejcꞌar erer iꞌxin tut e rey tuaꞌ acꞌajti tuaꞌ achꞌubꞌna e Mardoqueo tamar? Y jay ache cocha era erer itzay iꞌxin taca rey tama e wiar, chenobꞌ e winicobꞌ era.

Pues tunor e bꞌijnusiaj era quetpa imbꞌutz tut e Amán y uyare tuaꞌ oꞌstana e nuxi teꞌ.

<- Ester 4 Ester 6 ->