1 Pues entonces maxtacox xeꞌ ajcꞌubꞌesiajox tama Cawinquirar, cꞌubꞌsenic ut itata y ut ituꞌ, porque bꞌan ucꞌani tuaꞌ iche. 2 Porque jax era e bꞌajxan ojroner lo que chꞌar tzꞌijbꞌabꞌir tama uley e Moisés xeꞌ che que ucꞌani tuaꞌ achojbꞌesna ut tin e oꞌbꞌian tut. Y che e ojroner era que: “Cꞌubꞌsen ut atata y ut atuꞌ.” 3 Y e chojbꞌesiaj che que tin e oꞌbꞌian tut e ojroner era: “Cꞌani atzay meyra y cꞌani aquetpa meyra tiempo tama ucuxtar tara tor e rum.” Bꞌan chꞌar tzꞌijbꞌabꞌir tama uyojroner e Dios.
4 Y nox xeꞌ tatabꞌirox ira iche ibꞌa tuaꞌ iqꞌuijnes meyra imaxtac, sino que chꞌijrsenicobꞌ tuaꞌ uyubꞌi oꞌbꞌianobꞌ, y cansenicobꞌ cocha tuaꞌ axanobꞌ tama ubꞌir Cawinquirar.
5 Y nox xeꞌ manox xeꞌ mambꞌirox inyajrer chꞌabꞌunic ibꞌa tuaꞌ ixcꞌubꞌseyan tut iwajyum tama tunor lo que uyareox iche. Y chenic tunor era taca tunor iwalma bꞌan cocha jay war ani iche tunor era tama e Cristo. 6 Y ira iche cocha uche inteꞌ man xeꞌ war taca apatna conda war eꞌrna umen upatron, pero xeꞌ machi apatna conda machi war eꞌrna umener. Pero nox ucꞌani tuaꞌ iche tunor ipatnar bꞌan cocha inteꞌ man tuaꞌ e Cristo, y chenic tunor ipatnar era taca tunor iwalma bꞌan cocha ucꞌani Cadiosir. 7 Y chenic ipatnar era taca inteꞌ tzayer tuaꞌ alocꞌoy imbꞌutz tut ipatron tunor lo que war iche, bꞌan cocha jay jax ani inteꞌ patnar tuaꞌ Cawinquirar y majax jax taca inteꞌ patnar tuaꞌ inteꞌ winic. 8 Y natanic que tunor lo que axin cache xeꞌ imbꞌutz, que Cawinquirar cꞌani axin utoyon tamar lo que cache. Y bꞌan tuaꞌ anumuy tama tunor tin e war uche lo que imbꞌutz, motor jay jax inteꞌ man xeꞌ mambꞌir inyajrer o motor jay jax inteꞌ winic xeꞌ jax taca inteꞌ ajpatnar.
9 Y nox xeꞌ patronox, chenic ibꞌa imbꞌutz tut iman xeꞌ mambꞌir inyajrer bꞌan cocha jaxirobꞌ ucꞌani tuaꞌ uche ubꞌobꞌ imbꞌutz tiut. Y ira ibꞌajcꞌuse iman taca iwojroner conda war iware tucꞌa tuaꞌ uchiobꞌ. Bꞌijnunic que nox xeꞌ patronox bꞌan cocha tin e manobꞌ xeꞌ mambꞌirobꞌ inyajrer que tunorox tuox inteꞌ taca Patrón xeꞌ turu tichan tut e qꞌuin xeꞌ jax Cawinquirar. Y jaxir mamajchi tuaꞌ uturbꞌa najtir xeꞌ war acꞌubꞌseyan tamar, y jax jaxir xeꞌ tuaꞌ axin utoyon inteꞌ intion tamar lo que cꞌapa cache tara tor e rum.
10 Pues entonces niwermanuox, qꞌuecꞌojsenic ibꞌa tama Cawinquirar umen que intera turox tacar, porque jaxir meyra ayan ucꞌotorer. 11 Y corpesic ibꞌa taca tunor utacarsiaj e Dios tuaꞌ uyubꞌiox ixqꞌuecꞌo ixwawan tut e diablo tuaꞌ machi ucucruox tacar umajresiaj. 12 Porque non era machi war cache e tzꞌojyir taca inteꞌ winic xeꞌ bꞌan cocha non, sino que war cache e tzꞌojyir taca tunor e sian mein xeꞌ mabꞌambꞌan xeꞌ war axanobꞌ tama e icꞌar tara tor e rum. Y war cache e tzꞌojyir taca e meinobꞌ xeꞌ ajmabꞌambꞌanirobꞌ xeꞌ aquetpobꞌ ajcꞌotorerobꞌ, y xeꞌ aquetpobꞌ ajcꞌamparobꞌ, y xeꞌ aquetpobꞌ ajwinquirobꞌ. Y war cache e tzꞌojyir taca tunor e mabꞌambꞌan meinobꞌ era xeꞌ war acꞌotoriobꞌ tama e incsibꞌaner lo que ayan tara tor e rum. 13 Y tamar era cꞌani inwareox que chꞌamic tunor uqꞌuecꞌojsiaj e Dios xeꞌ tuaꞌ ucojcox tuaꞌ machi ixcucurna conda watar e día tuaꞌ e mabꞌambꞌanir. Y tamar era conda acꞌapa iche tunor lo que uyubꞌiox iche, cꞌani ixquetpa ixwawan. 14 Warenic turix tuaꞌ iche e tzꞌojyir. Y canoenic tunor lo que erach tuaꞌ e Dios tuaꞌ machi ixmajresna xeꞌ bꞌan cocha inteꞌ cinturón lo que ayan cachbꞌir tama unac inteꞌ ajtzꞌojyir tuaꞌ uquete tunor ubꞌujc. Y turbꞌanic ibꞌa tuaꞌ ixquetpa erach tama tunor lo que war iche xeꞌ bꞌan cocha inteꞌ taqꞌuin lo que uturbꞌa inteꞌ ajtzꞌojyir tuaꞌ ucojco ut ubꞌa. 15 Y turbꞌanic ibꞌa tuaꞌ ixquetpa turix tuaꞌ ichecsu tunor uyojroner e Dios tama e jiriar tut e gente axin, bꞌan cocha inteꞌ ajtzꞌojyir conda axin ucachi bien uxanabꞌ tama uyoc y tamar era aquetpa turix tuaꞌ alocꞌoy axana tic taca. 16 Y tama tunor cꞌampesic icꞌubꞌesiaj tama e Dios tuaꞌ ucojcox tama tunor ucucursiaj e diablo, bꞌan cocha inteꞌ ajtzꞌojyir xeꞌ ucꞌampes inteꞌ escudo tuaꞌ ucorpes ubꞌa conda atobꞌoy watar inteꞌ sarac xeꞌ ayan e cꞌajc tamar. 17 Y chꞌamic e corpesiaj tuaꞌ Cadiosir tuaꞌ icorpes ibꞌa bꞌan cocha inteꞌ ajtzꞌojyir xeꞌ ucꞌampes inteꞌ casco tuaꞌ ucorpes ujor tuaꞌ machi achamesna. Y ojronenic tamar uyojroner e Dios tuaꞌ icucru e Satanás porque uyojroner e Dios era bꞌan cocha inteꞌ machit xeꞌ ajcꞌunon umen Unawalir e Dios bꞌan cocha inteꞌ ajtzꞌojyir xeꞌ ucꞌampes umachit tuaꞌ ucucru tin e aqꞌuijna eꞌrna umener y bꞌan tuaꞌ cacꞌampes uyojroner e Dios non ubꞌan. 18 Y ira iwacta tuaꞌ icꞌajti taca e Dios iraj iraj tacar utacarsiaj Unawalir. Y turbꞌanic ibꞌa tuaꞌ ichꞌujcu iwira tin ucucursiaj e Satanás ipater. Y cꞌajtinic iraj iraj taca e Dios tuaꞌ atacarnobꞌ tunor e inmojr maxtacobꞌ tuaꞌ e Dios ubꞌan. 19 Y cꞌajtinic taca e Dios tuaꞌ intacarna nen ubꞌan que e Dios tuaꞌ ucansen tucꞌa tuaꞌ inware e gente axin, y que conda inxin onjron que machi tuaꞌ imbꞌacta tuaꞌ inchecsu axin tunor uyojroner e Dios tamar lo que mucur ani tama e corpesiaj. 20 Y nen era quetpen inteꞌ ajchecsuyaj tuaꞌ e corpesiaj lo que ayan tama Cawinquirar Jesucristo motor que nen turen tara tama e cárcel. Y tamar era cꞌajtinic taca e Dios que nen inqꞌuecꞌo tuaꞌ inchecsu tunor uyojroner e Dios tut e gente axin bꞌan cocha ucꞌani tuaꞌ inche.
21 Pues tuaꞌ inata tucꞌa war inche nen, cꞌani inwebꞌta axin cawermano Tíquico tuaꞌ uyareox tunor lo que war anumuy tacaren. Pues cawermano era xeꞌ inchoj ut camener jax inteꞌ ajtacarsiaj tama upatnar Cawinquirar xeꞌ machi acꞌoy uche tunor era. 22 Y tamar era war inwebꞌta axin e hermano era tiut tuaꞌ ixcꞌotoy inata tunor lo que war anumuy tacaron y tuaꞌ axin utꞌabꞌse iwalma tunorox.
23 Que Catata Dios y Cawinquirar Jesucristo axin uyajcꞌox ujiriar y ucꞌunersiaj taca e cꞌubꞌesiaj tunorox xeꞌ jax niwermanuox. 24 Que utacarsiaj e Dios axin aquetpa taca tunor tin e war uyajta ut Cawinquirar Jesucristo taca inteꞌ cꞌunersiaj xeꞌ machi tuaꞌ acꞌapa. Tara acꞌapa tunor niwojroner, che e Pablo.
<- Efesios 5