Hechos 2

Conda Unawalir e Dios ubꞌutꞌi uyalmobꞌ tunor tin e ajcꞌubꞌesiajobꞌ

1 Pues entonces conda cꞌotoy e día tuaꞌ e nojqꞌuin xeꞌ ucꞌabꞌa Pentecostés, umorojse ubꞌobꞌ tunor tin e war acꞌubꞌseyanobꞌ tama e Cristo tama inteꞌ taca lugar. 2 Y wacchetaca cay uyubꞌiobꞌ inteꞌ nuxi jicnar xeꞌ tari tut e qꞌuin. Bꞌan e jicnar era cocha conda war ajicna axin inteꞌ nuxi icꞌar. Y tunor tin e turobꞌ macuir e otot cay uyubꞌiobꞌ e jicnar. 3 Entonces cay checta lo que lar uwirnar cocha inteꞌ cꞌajc xeꞌ awawan tujorobꞌ tama e icꞌar, y bꞌan uwirnar e cꞌajc era cocha inteꞌ uyac inteꞌ winic. Y cay uxere ubꞌa ixin e cꞌajc era este que war inteꞌ cꞌajc tujor inteꞌ inteꞌ ajcꞌubꞌesiajobꞌ xeꞌ turobꞌ tama e otot. 4 Y bꞌujtꞌa uyalmobꞌ tunor e ajcꞌubꞌesiajobꞌ era taca Unawalir e Dios y cay ojronobꞌ inteꞌ intiobꞌ tama inteꞌ ojroner xeꞌ majax tuobꞌach. Jax Unawalir e Dios xeꞌ uche tuaꞌ uyubꞌi oꞌjronobꞌ inteꞌ intiobꞌ tama inteꞌ ojroner xeꞌ majax tuobꞌach.

5 Y tama e día era ayan meyra gente xeꞌ tuobꞌ e Israel tama e chinam Jerusalem xeꞌ war acꞌapa uchiobꞌ tunor bꞌan cocha arobꞌnobꞌ umen e religión tuaꞌ e gente tuaꞌ e Israel. Y e gente era tariobꞌ tama tunor or e rum tuaꞌ acꞌotoyobꞌ tama e nojqꞌuin. 6 Y conda cay uyubꞌiobꞌ e nuxi jicnar tunor e gente xeꞌ war axanobꞌ tama e calle, cay umorojse ubꞌobꞌ tuaꞌ uwirobꞌ tucꞌa war anumuy. Y machi unatobꞌ tucꞌa tuaꞌ ubꞌijnuobꞌ, porque war uyubꞌiobꞌ uyojronerobꞌach inteꞌ intiobꞌ bꞌan cocha ojronobꞌ e gente tama ulugarobꞌach. 7 Y war ubꞌijnu uwirobꞌ tunor e gente y war abꞌactobꞌ uwirobꞌ, y cay uyare ubꞌobꞌ y che:

—¿Ma ca jax tama e departamento Galilea tariobꞌ tunor e winicobꞌ xeꞌ war oꞌjronobꞌ era? 8 Y ¿tucꞌa nic era que war coybꞌi oꞌjronobꞌ tama inteꞌ inteꞌ cawojroner bꞌan cocha cay cansenon ojronon inteꞌ intion umen catuꞌ tiaꞌ chꞌion? 9 Porque ticajam non xeꞌ ajwaron tara tama e chinam Jerusalem ayan tin e tariobꞌ tama e lugar Partia, y tama e lugar Media, y tama e lugar Elam. Y ayan ticajam tin e tariobꞌ tama e lugar Mesopotamia, y tama e lugar Judea, y tama e lugar Capadocia. Y ayan ticajam tin e tariobꞌ tama e lugar Ponto, y tama e departamento Asia. 10 Y ayan ticajam tin e tariobꞌ tama e lugar Frigia, y tama e lugar Panfilia, y tama e lugar Egipto, y xeꞌ tariobꞌ tama e lugar Africa xeꞌ jax e lugar más innajt que e Cirene. Y ayan ticajam ubꞌan tin e tuobꞌ e chinam Roma xeꞌ turobꞌ tara, y tujam tin e tuobꞌ e chinam Roma era ayan tin e cuxpobꞌ tama careligión tara, y ayan tin e cꞌotoy uchꞌamiobꞌ careligión ubꞌan conda nuquir gentiobꞌix. 11 Y ayan ticajam xeꞌ tariobꞌ tama e lugar Creta, y tama e lugar Arabia. Pero tunoron war coybꞌi uyareonobꞌ lo que galan tama Cadiosir, pero war coybꞌi tama inteꞌ inteꞌ cawojroner tiaꞌ chꞌion. Bꞌan ojronobꞌ e gente era jaxobꞌ taca.

12 Y tunor e sian gente era war ubꞌijnu uwirobꞌ tunor era y machi unatobꞌ tucꞌa tuaꞌ ubꞌijnuobꞌ tamar, y cay uyubꞌi ubꞌobꞌ jaxobꞌ taca y chenobꞌ:

—Y ¿tucꞌa war che tunor era? che e gente era.

13 Pero ayan tujam e gente era tin e intaca war asactzeniobꞌ jaxobꞌ taca y chenobꞌ:

—E gente era intaca war acarayobꞌ, che e gente era xeꞌ war asactzeniobꞌ.

Conda e Pedro uchecsu tucꞌa war anumuy conda cay ojronobꞌ tama inteꞌ ojroner xeꞌ majax tuobꞌach

14 Pues entonces achpa wawan e Pedro taca e inmojr once apostolobꞌ y cay ojron taca inteꞌ nuxi nuc y uyare e gente cocha era y che:

—Winicox xeꞌ tuox e Israel y tunorox xeꞌ turox tara tama e chinam Jerusalem, turbꞌanic ibꞌa tamar lo que cꞌani inwareox, y ubꞌinic tunor era. 15 Cꞌani inwareox que e winicobꞌ era machi war acarayobꞌ cocha nox war ibꞌijnu, porque era wartocto atꞌabꞌay e qꞌuin. 16 Ma cocha erer. Lo que war iwira era jax taca lo que chꞌar tzꞌijbꞌabꞌir umen e profeta Joel xeꞌ che:

17 Tama e tiempo conda axin acꞌapa tunor or e rum era, che e Dios,

cꞌani inwechꞌe axin Ninawalir tama tunor e gente xeꞌ turobꞌ tama tunor or e rum.

Y cꞌani inware itejromtacobꞌ y iwijchꞌoctacobꞌ inteꞌ inteꞌ ojroner,

y jaxirobꞌ tuaꞌ asutpa uyareox tucꞌa era otronyajr.

Y e chꞌom maxtacobꞌ tuaꞌ amayjutiobꞌ tamar lo que cꞌani inwirsiobꞌ,

y e onian winicobꞌ tuaꞌ uchꞌamiobꞌ cora wayac lo que cꞌani inwajcꞌuobꞌ, che e Dios.

18 Y cꞌani inwechꞌe axin Ninawalir tama nimanobꞌ winicobꞌ y tama nimanobꞌ ixictacobꞌ,

y cꞌani uchecsuobꞌ tut e gente lo que cꞌani inwareobꞌ, che e Dios.

19 Y nen cꞌani inwirsiox meyra seña tut e qꞌuin xeꞌ imbꞌacꞌajr uwirnar,

y cꞌani inwirsiox meyra seña tor e rum ubꞌan.

Y cꞌani achecta e chꞌich y e cꞌajc y e sian bꞌutz, che e Dios.

20 Pues e qꞌuin cꞌani asutpa incsibꞌan uwirnar,

y e luna cꞌani asutpa uwirnar bꞌan cocha e chꞌich.

Bꞌan tuaꞌ anumuy bꞌajxan que acꞌotoy e día conda watar Iwinquirar

xeꞌ jax e día xeꞌ más imbꞌacꞌajr uwirnar y xeꞌ más nojta tama tunor, che e Dios.

21 Y tunor tin e axin upejca Cawinquirar cꞌani acorpesnobꞌ.

Bꞌan chꞌar tzꞌijbꞌabꞌir tama uyojroner e Dios umen e profeta Joel.

22 ’Niwermanuox xeꞌ tuox e Israel, ubꞌinic ninuc. Cꞌani inwareox era que e Jesús xeꞌ tuaꞌ e chinam Nazaret jax inteꞌ winic xeꞌ chectesna umen e Dios que tuaꞌ umen que cay uche meyra sian maravilla, y meyra sian milagro, y que cay uche meyra sian checsuyaj, cocha jax e Dios xeꞌ cay uyajcꞌu ucꞌotorer tuaꞌ uche tunor era. Y tunor era chequer tiut cocha bꞌan cay iwira nox. 23 Pues natanwa y cꞌajna umen e Dios ixnix e tiempo que e Jesucristo ucꞌani tuaꞌ aꞌjcꞌuna tama icꞌabꞌ nox. Pero conda chequer tiut que tama icꞌabꞌ turu e Jesús, iware tuaꞌ achꞌubꞌna tut inteꞌ cruz tuaꞌ achamay tama ucꞌabꞌ e winicobꞌ xeꞌ mabꞌambꞌan uwirnarobꞌ. 24 Pero e Dios usuti ubꞌixqꞌues Cawinquirar Jesucristo tujam e chamenobꞌ. Pues ixin ucorpes tama ucꞌotorer e chamer, porque ma cocha erer acꞌotori más e chamer tujor Cawinquirar Jesucristo. 25 Y canata que bꞌan porque ayan lo que utzꞌijbꞌa e rey David tama uyojroner e Dios tamar Cawinquirar Jesús tama e onian tiempo xeꞌ che:

Nen inwira que war Niwinquirar taniut tama tunor e tiempo,

y que turu jaxir tama ninojcꞌabꞌ tuaꞌ ucojcuen tuaꞌ machi imbꞌajcꞌusena, che e David.

26 Y tamar era bꞌutcꞌa niwalma taca inteꞌ nuxi tzayer este que locꞌoy meyra ojroner tama niwej,

y tamar era cꞌani ajiri nicuerpo umen que war incojco tama e Dios, che e David.

27 Porque net, Nidiosiret, machix tuaꞌ awacta aquetpa niwalma tujam e chamenobꞌ,

y nien machix tuaꞌ awacta oꞌcꞌoy nicuerpo tama e mujr,

cocha nen manen tabꞌa xeꞌ yajtanbꞌir niut amener, che e David.

28 Y net, Nidiosiret, awirsenix cocha tuaꞌ inxana tama abꞌir tiaꞌ ayan e cuxtar xeꞌ machi tuaꞌ acꞌapa,

y tamar era cꞌani abꞌutcꞌa niwalma taca e nuxi tzayer conda incꞌotoy tawejtzꞌer net.

Bꞌan chꞌar tzꞌijbꞌabꞌir umen e David tama e onian tiempo tamar Cawinquirar Jesucristo.

29 ’Niwermanuox, cꞌani inwareox era que natanwa umen tunor que chamay catata viejobꞌir David, y que mujca y que yaꞌ turu umujr tara tama e chinam Jerusalem esto coner. 30 Pero e David jax inteꞌ profeta tuaꞌ e Dios y tamar era unata que e Dios uyacta inteꞌ ojroner tacar que tamar uchꞌajnarir e David cꞌani achecta inteꞌ sitzbꞌir xeꞌ tuaꞌ aquetpa e Cristo, y que jaxir cꞌani aturuan tama uturtar e David. 31 Pues e David unata ixnix tucꞌa cꞌani uche e Dios, y tamar era cay ojron tamar e tiempo conda cꞌani asujta abꞌixqꞌuesna e Cristo. Y tamar era chꞌar tzꞌijbꞌabꞌir tama uyojroner e Dios que uyalma e Cristo machix tuaꞌ aquetpa tujam e inmojr chamenobꞌ, y nien machix tuaꞌ oꞌcꞌoy uwerir. 32 Pues e Dios ixin usuti ubꞌixqꞌues e Jesús tujam e chamenobꞌ, y tunoron caquetpa ajchecsuyajon que bꞌan numuy cocha cawirix que bꞌixir e Jesús. 33 Y de allí e Jesús tꞌabꞌesna ixin tut e qꞌuin tichan umen ucꞌotorer e Dios y aquetpa tama unojcꞌabꞌ Cadiosir, y de allí e Jesús ajcꞌuna Unawalir e Dios umen Catata Dios bꞌan cocha quetpa arobꞌbꞌir desde ixnix, y de allí Cawinquirar Jesucristo sutpa uyari Unawalir e Dios tamaron este que cay iyubꞌi e nuxi icꞌar y e sian ojroner xeꞌ majax natanbꞌir camener, y cay iwira tunor lo que cay numuy sajmi era. 34 Pues majax e David xeꞌ tꞌabꞌay ixin tut e qꞌuin, sino que jax Cawinquirar Jesucristo xeꞌ tꞌabꞌay ixin tut e qꞌuin. Y tamar era chequer que majax tamar taca ubꞌa que war oꞌjron e David conda che:

E Dios uyare Niwinquirar, che e David:

“Turen taniwejtzꞌer tama ninojcꞌabꞌ tuaꞌ icꞌotori tacaren

35 este que inturbꞌa tunor tin e aqꞌuijna uwiretobꞌ yebꞌar utajn oꞌc.”

Bꞌan chꞌar tzꞌijbꞌabꞌir umen e David tama e onian tiempo.

36 ’Y tamar era natanic tunorox xeꞌ tuox e Israel que e Jesús ajcꞌuna umen e Dios tuaꞌ aquetpa Cawinquirar y tuaꞌ aquetpa e Cristo. Y jax jaxir xeꞌ chamesna imener, che e Pedro uyare e gente tuaꞌ e Israel.

37 Conda e gente xeꞌ turobꞌ yajaꞌ cꞌapa uyubꞌiobꞌ tunor era cay uqꞌuiobꞌ tama uyalmobꞌ y uyubꞌiobꞌ tuaꞌ e Pedro y tuaꞌ e inmojr apostolobꞌ y chenobꞌ:

—Cawermanuox, ¿tucꞌa tuaꞌ cache era? che e gente era xeꞌ tuobꞌ e Israel.

38 Entonces ojron e Pedro y che:

—Actanic tunor e mabꞌambꞌanir lo que war iche, y actanic ibꞌa tuaꞌ ixchꞌujya inteꞌ intiox taca e jaꞌ tama ucꞌabꞌa e Jesucristo tuaꞌ ixcorpesna tama tunor imabꞌambꞌanir, y de allí erer ichꞌami Unawalir e Dios. 39 Pues Cawinquirar Dios cꞌani uyajcꞌox y tunor imaxtac e tacarsiaj era, y bꞌan cꞌani uyajcꞌu tunor tin e turobꞌ teinxejr or e rum ubꞌan que war che que e Dios cꞌani uyajcꞌu utacarsiaj tunor tin e axin apejcnobꞌ umener, che e Pedro uyare e gente era xeꞌ tuobꞌ e Israel.

40 Pues entonces tamar lo que e Pedro ojron era, y tamar lo que ojronto cay uyare tunor e gente xeꞌ turobꞌ tama e chinam Jerusalem que ucꞌani tuaꞌ acꞌubꞌseyanobꞌ tamar lo que arobꞌnobꞌ umener y che:

—Corpesic ibꞌa tujam e inmojr gente era xeꞌ war ubꞌijnuobꞌ tuaꞌ uchiobꞌ e mabꞌambꞌanir iraj iraj, che e Pedro.

41 Y tamar era meyra gente cay uchꞌamiobꞌ uyojroner e Pedro y ixin chꞌujyobꞌ tunorobꞌ taca e jaꞌ tama ucꞌabꞌa Cawinquirar Jesús. Y tama e día era ayanobꞌ 3,000 winicobꞌ taca e ixictac xeꞌ cay cꞌubꞌseyanobꞌ tama Cawinquirar Jesucristo. 42 Y tunor tin e cay cꞌubꞌseyanobꞌ tama Cawinquirar Jesucristo qꞌuecꞌobꞌ tamar lo que war acansenobꞌ umen e apostolobꞌ, y war atzayobꞌ y war umorojse ubꞌobꞌ y war ucꞌuni ubꞌobꞌ tamar Cawinquirar, y inteꞌ intiobꞌ war utaresobꞌ lo que tuaꞌ ucꞌuxiobꞌ y war awiobꞌ tama inteꞌ taca lugar, y war ucꞌajtiobꞌ taca e Dios. Y bꞌan war uchiobꞌ iraj iraj.

Lo que numuy tama tin e cꞌubꞌseyanobꞌ tama Cawinquirar

43 Pues entonces tunor e gente xeꞌ turobꞌ tama e chinam Jerusalem war abꞌactobꞌ uwirobꞌ lo que war anumuy, porque war uwirobꞌ que war achena meyra milagro y meyra seña umen e apostolobꞌ. 44 Y tunor tin e cay cꞌubꞌseyanobꞌ tama Cawinquirar cay sutpa ubꞌijnusiajobꞌ tuaꞌ aquetpa intera ubꞌijnusiajobꞌ tunorobꞌ, y war uyajcꞌuobꞌ lo que ayan tacarobꞌ tuaꞌ utacriobꞌ uyet ajcꞌubꞌesiajirobꞌ tin e matucꞌa ayan tacar. 45 Y war uchoniobꞌ lo que ayan tuobꞌ y war uyajcꞌuobꞌ e tumin era inteꞌ inteꞌ tin e ayan unecesidobꞌ. Y tin e más nojta unecesidobꞌ más nojta war aꞌjcꞌunobꞌ. 46 Y iraj iraj war umorojse ubꞌobꞌ tama e templo, y war umorojse ubꞌobꞌ tama uyototobꞌ tuaꞌ awiobꞌ y war atzayobꞌ tama uyalmobꞌ y war uchiobꞌ tunor era taca e cꞌunersiaj tama uyalmobꞌ. 47 Y war utattzꞌiobꞌ ucꞌabꞌa e Dios iraj iraj, y war atzay eꞌrnobꞌ umen tunor upiarobꞌ, y ajqꞌuin ajqꞌuin war abꞌoro e gente watar y Cawinquirar war uche abꞌoro e gente era tin e war acorpesnobꞌ. Y tamar era war aꞌchꞌiꞌ axin tunor e nuxi grupo ajcꞌubꞌesiajobꞌ tamar Cawinquirar Jesucristo.

<- Hechos 1 Hechos 3 ->