—¿Tucꞌa tamar war anumse abꞌa, pue? ¿Tucꞌa tuaꞌ que net xeꞌ unembꞌiret tuaꞌ e rey war imerecna ajqꞌuin ajqꞌuin? Arenen tucꞌa tamar que war imerecna, che e Jonadab.

Entonces ojron e Amnón y che:

—Pues nen chꞌur niut tama e Tamar xeꞌ jax uwijtan e Absalón y war imbꞌijnu meyra tamar jaxir, che e Amnón.

5 Entonces ojron e Jonadab y che:

—Chꞌaren tama achꞌacteꞌ y chen abꞌa que ajmuaquet. Y conda atata ayopa tuaꞌ uwiret, aren tuaꞌ uyebꞌta watar awijtan Tamar tuaꞌ uyustes e comida yaꞌ taca tiaꞌ chꞌaret tuaꞌ awira apatna y de allí tuaꞌ uweset, che e Jonadab uyare e Amnón.

6 Entonces e Amnón ochoy chꞌan tama uchꞌacteꞌ y uche ubꞌa que ajmuac. Y conda cꞌotoy irna umen e rey, jaxir ojron y che:

—Quisinic watar niwijtan Tamar tuaꞌ uche chateꞌ torta bꞌan cocha nen incꞌani, y que jaxir erer uyustes taniut, y de allí erer uyajqꞌuen incꞌuxi, che e Amnón.

7 Entonces e David quetpa imbꞌutz tut lo que arobꞌna, y uyare e Tamar tuaꞌ axin tama uyotot e Amnón tuaꞌ uyustes e comida.

8 Entonces conda e Tamar cꞌotoy tama uyotot e Amnón, ixin esto tiaꞌ chꞌar tama uchꞌacteꞌ tuaꞌ eꞌrna conda war uyapru e harina. Y de allí cay upojpi e torta. 9 Pero conda e Tamar uqꞌueche ixin e torta tut e Amnón, jaxir machi cꞌani aweꞌ sino que uyare uyajpatnarobꞌ y che: “Loqꞌuenic tunorox tara,” che e Amnón. 10 Y conda cꞌapa locꞌoyobꞌ tunor uyajpatnarobꞌ, e Amnón uyare e Tamar y che:

—Tares e comida tiaꞌ chꞌaren y ajcꞌunen incꞌuxic, che e Amnón.

Entonces e Tamar uchꞌami e torta lo que uche y uqꞌueche ixin esto tut usacun tiaꞌ chꞌar tama uchꞌacteꞌ. 11 Pero conda e Tamar cꞌotoy tuyejtzꞌer tuaꞌ uwese, jaxir uchuqui y uyare cocha era y che:

—Ijtan, lar tara. Chꞌaren tacaren, che e Amnón uyare e Tamar.

12 Entonces ojron e Tamar y che:

—Machi sacun. Machi incꞌani tuaꞌ asubꞌarien. Ira ache inteꞌ mabꞌambꞌanir cocha era, porque tama e país e Israel ma tiaꞌ anumuy cocha era. 13 Porque jay net iꞌxin asubꞌarien cocha era, ma tiaꞌ tuaꞌ acꞌapa nisubꞌar tut tin e turobꞌ taniwejtzꞌer. Y net tuaꞌ iyarobꞌna que jaxet tin e más uputputir oit tama tunor e país Israel. Quisinic incꞌajti tacaret tuaꞌ iꞌxin iyojron taca e rey, porque nen innata que jaxir axin uyaret que erer inujbꞌi tacaren, che e Tamar uyare e Amnón.

14 Pero e Amnón machi cꞌani uyubꞌi lo que arobꞌna umener, y cocha jaxir más ayan uqꞌuecꞌojsiaj que e Tamar, umori umeqꞌue y chꞌan tacar. 15 Pero conda cꞌapa uche e mabꞌambꞌanir tacar, ochoy inteꞌ nuxi qꞌuijnar tama uyalma y cꞌotoy uxejbꞌe ut más meyra que conda war ani uyajta ut. Y tamar era ojron cocha era y che:

—Achpen quiqui, che e Amnón.

16 Entonces ojron e Tamar y che:

—Machi sacun, ira atzacren inlocꞌoy bꞌan taca, porque jay bꞌan ache, aquetpa más calapir e mabꞌambꞌanir era que lo que achix tacaren, che e Tamar.

Pero e Amnón machi ubꞌian tut lo que arobꞌna, 17 sino que upejca tari inteꞌ uman y uyare cocha era y che:

—Locsen e ixic era tara, y maca e puerta tut, che e Amnón.

18 Entonces e man ulocse e Tamar macuir e otot, y umaqui e puerta tut. Pues e bꞌujc lo que lapar umen e Tamar galan atzꞌapruma ut bꞌan cocha ucꞌampesobꞌ e ijchꞌoctac tuaꞌ e rey xeꞌ ubꞌajnerobꞌto. 19 Pero cocha jaxir war asubꞌajra meyra tamar lo que chena tacar, uyari e tan tama ujor y uwejru ubꞌujc xeꞌ lapar umener, y ucꞌatbꞌu ucꞌabꞌ tama ujor, y war aꞌru locꞌoy ixin tama tunor e bꞌir. 20 Entonces conda usacun Absalón uwira ut e Tamar, uyubꞌi tuaꞌ y che:

—O ¿jax ca e Amnón xeꞌ uche e mabꞌambꞌanir tacaret? Pero jay bꞌan, cꞌani inwaret tuaꞌ icꞌumpa, cocha jaxir jax asacun ubꞌan. Y irix abꞌijnu más tama tunor lo que numuy, che e Absalón.

Entonces cꞌumpa e Tamar y ixin turuan tama uyotot usacun Absalón. 21 Pero conda e rey David cꞌotoy unata tama tunor era, qꞌuijna meyra. 22 Y nien e Absalón matucꞌa uyare e Amnón ubꞌan, pero qꞌuijna meyra uwira tama tunor lo que uche taca uwijtan Tamar.

—Pues nimanobꞌ war ususiobꞌ utzutzer niwoveja. Quisinic que net y awajcꞌamparobꞌ ixcꞌotoy tacaron tuaꞌ cache inteꞌ nojqꞌuin, che e Absalón.

25 Entonces ojron e rey y che:

—Machi sitz, machi uyubꞌi tuaꞌ caxin tunoron, porque machi incꞌani tuaꞌ ache meyra gasto, che e rey David.

Pero e Absalón ojronto que quisinic que axin e rey, pero jaxir machi ixin, sino que intaca uchojbꞌes ut e Absalón tuaꞌ alocꞌoy imbꞌutz e nojqꞌuin. 26 Entonces e Absalón ojron y che:

—Pues jay net machi cꞌani iꞌxin, pero quisinic awacta axin tacaren nisacun Amnón, che e Absalón.

Y ojron e rey y che:

—¿Tucꞌa tuaꞌ que war acꞌani tuaꞌ axin tacaret e Amnón? che e rey.

27 Pero cocha e Absalón uyareto que war ucꞌani tuaꞌ axin e Amnón taca tunor e inmojr uyunenobꞌ e rey, entonces e rey che que uyubꞌi tuaꞌ axiobꞌ.

Y tamar era e Absalón cay uyustes inteꞌ nuxi wiar xeꞌ tawar tuaꞌ acꞌujxa umen inteꞌ rey. 28 Y de allí e Absalón uyare umanobꞌ cocha era y che: “Iwiric conda e Amnón acay oychꞌi este que axin asatpa ujuicio, y conda inwariox, chamsenic. Y ira ixbꞌacta, porque jax nen xeꞌ war inwareox tuaꞌ iche, y nien tuaꞌ ixjayjayran,” che e Absalón uyare umanobꞌ.

29 Entonces conda cꞌotoyobꞌ tunor tin e pejcbꞌirobꞌ tama e nojqꞌuin, e Absalón uyare tuaꞌ achamesna e Amnón. Y wacchetaca e manobꞌ uchiobꞌ lo que arobꞌnobꞌ umener. Pero conda e inmojr uyunenobꞌ e rey uwirobꞌ que chamesna e Amnón, achpobꞌ y turuanobꞌ tama ujor uchijobꞌ y locꞌoy ajniobꞌ.

30 Pues conda warto axiobꞌ tama e bꞌir tuaꞌ acꞌotoyobꞌ esto tama e chinam Jerusalem, cꞌotoy e checsuyaj tut e rey David xeꞌ che cocha era: “E Absalón cꞌapa uchamse tunor uyunenobꞌ e rey, y mamajchi xeꞌ uyacta bꞌixir,” che e checsuyaj. 31 Entonces e rey achpa y uwejru ubꞌujc tuaꞌ uchecsu e tzꞌintzꞌar y uwarcu ubꞌa tut e rum. Y tunor uyajcꞌamparobꞌ xeꞌ turobꞌ tuyejtzꞌer uwejru ubꞌujcobꞌ ubꞌan. 32 Pero e Jonadab xeꞌ unembꞌir tuaꞌ e Simá xeꞌ sacumbꞌir tuaꞌ e David ojron y che:

—Niwinquiret, ira abꞌijnu que tunor oynenobꞌ cꞌapa chamesnobꞌ. Pues xeꞌ chamesna jax taca e Amnón, cocha bꞌan cay ubꞌijnu tuaꞌ uche e Absalón desde que subꞌajresna uwijtan Tamar umen e Amnón. 33 Ira abꞌijnu, Niwinquiret, que chamesnobꞌ tunor oynenobꞌ. Pues xeꞌ chamesna jax taca e Amnón, che e Jonadab.

34 Y e Absalón locꞌoy ajni. Pero tama e chinam Jerusalem ayan inteꞌ ajtzꞌojyir xeꞌ war acojcsan tujor e petzbꞌir tun, y conda sutpa chꞌujcsan, uwira que war ecmay watobꞌ cora winicobꞌ tama e bꞌir xeꞌ axin esto tama e chinam Horonaim xeꞌ aquetpa ejmarbꞌir or e witzir. Entonces e ajtzꞌojyir ixin uyare e rey y che: “Pues nen inwira que war ecmay watar cora winicobꞌ tama e bꞌir xeꞌ axin esto tama e chinam Horonaim,” che e ajtzꞌojyir. 35 Entonces e Jonadab uyare e rey y che:

—Watobꞌix oynenobꞌ, niwinquiret, bꞌan cocha inwaret, che e Jonadab.

36 Pues conda wartocto acꞌapa ojron e Jonadab, cꞌotoyobꞌ uyunenobꞌ e rey, y war aꞌruobꞌ taca inteꞌ nuxi nuc. Y aꞌru e rey ubꞌan, y bꞌan uchiobꞌ tunor uyajcꞌamparobꞌ. 37 Pues e David merecna meyra día tama uyunen Amnón.

Pero e Absalón locꞌoy ajni, y ixin mucuan esto tama uyotot e Talmai xeꞌ unembꞌir tuaꞌ e Amihud xeꞌ rey tama e chinam Guesur. 38 Y quetpa uxteꞌ año tama e chinam yajaꞌ. 39 Pero conda e David sisa e tzꞌintzꞌar tama uyalma tama uchamer uyunen Amnón, cay uyusre tuaꞌ uwira ut uyunen Absalón otronyajr.

<- 2 Samuel 122 Samuel 14 ->