3
Yaubada, ya Yoga Lau Mose Lisina
Auꞌaulaha 3:1-16
1 Mose botiyana Detelo, Midiyan dodogadi edi tau antalasam ena sipi yo gouti ya itaꞌita watanidi, ma baibaiwadi ya foya doheyedi nuꞌu pitapitalina be ya lau Sainai tuꞌana fafagabina yai.[a] 2 Amainiya Yaubada ena anelu ya taumahata felen doha oyagi balebalelemna oyagi kiukiu atiꞌatipuna yai. Oyagi kiukiu ya alaꞌala, ya ita. In moho hige i ala fofo.
3 Nuwana yai iyen,
Hige ya nuwatuhu lobahi. Paꞌana somo be oyagi kiukiu ni, hige i ala ofi?
4 Yaubada ya itaꞌita lau mate Mose ya sigisigilau, yo fede oyagi kiukiu, ganahewana yai ya yoga lau lisina iyen,
Mose! Mose!
Alinana Mose ya bui iyen,
Yau, ite.
5
Tabu u sigima. Am ahe sumasuma u kamfahidi, paꞌana tanohi fafagabina yai wa obiꞌobiyo.
6 Yau mate wahawaham Abelaham, Isako, yo Iyakobo edi Yaubada.
Yo fede Mose matana ya fakoudi paꞌana ya ꞌwasabu, Tabu Yaubada i ita.
7 Habahim
Wananaha, egu dodoga sidohana edi fafahisu faheyayadi yo edi fafakamnadi Idipi yai haꞌa E ita. Tau lau faliuhwaidi debadi yai edi tan E atahi. Edi kamkamna E sibai.
8 Lisina yai E lidima bena Idipi nimadi yai haba E fofofahidi yo tanohina yai E abifahidi na E hasaedima ai tanohi loholohona te, ya laꞌi yo mahulana. Kanana, Hiti, Amoli, Pelesi, Hiwi, yo Debusi aho edi aba miya. 9 Egu dodoga edi tan E atahi wananahai, yo Idipi sidohana edi fafahisu faheyayadi yo edi fafakamkamnadi haꞌa E ita.
10 Aho te E duim, wa lau Idipi edi Kin lisina, be haba egu dodoga edi nuꞌu yai wa foyahidima.
11 Na Mose ya libalau Yaubada lisina, iyen,
Yau doga gaibu. Yau sai be haba E lau Kin Falo lisina, be Isalaela E auledi Idipi yai?
12 Yaubada ya liba fuyo, iyen,
Yau haba maꞌem, yo yena dodoga Idipi yai wa ledima, haba ai tuꞌana te ami fadebasaegu. Haba wa fawananaha mate Yau E fatamalim.
13 In moho Mose ya liba fuyo iyen,
Ibe E lau Isalaela dodogadi lisidi be E falibadi, yawa, “Wahawahamiu edi Yaubada ya duigu be E laoma lisimiu, haba sa fatiꞌoigu, tiyen,
“Hesana somo? Haba somo E falibadi?”
14 Yaubada iyen,
“Yau mate Yau!” Doha ite haba wa falibadi: In sai hesana “Yau” mate ya duigu be E laoma lebemiu.
15-16 Isalaela u falibadi mate,
Yau, Yaubada! Abelaham, Isako, yo Iyakobo, edi Yaubada. Logena, ya duigu be E laoma lisimiu. Hesagu te, haba ya ota esegahi; hiti mulita mahudoꞌidi haba hesagu sa atahi doha. U lau be Isalaela baꞌibaꞌisadi u yoga gogondi na u falibadi mate, Yau Guyau Yaubada, haꞌa E taumahata wahawahamiu yo umi hinaga lisimiu yai.
Yo fede, Yaubada iyen,
U falibadi mate, Yau E laoma lisidi be somo Idipi sa ginauli lisidi yai, haꞌa E itadi.
<- Au'aulaha 2Au'aulaha 4 ->
-
a Sainai Tuꞌana hesana hesa mate Holebi.