40
Gbɛ̃ntee è fↄ̃ à Luda zaaa boro
1 Ben Dii ɛ̀ara à bè Ayubanɛ:
2 Mamↄma Gbãapingide,
nɛ́ ma taari e ǹ ma gba làakariↄ́?
Ludazaabori, ǹ yã wemala sa.
3 Ben Ayuba wèàla à bè:
4 Pↄ́ken ma ũro fá! Dian mɛ́ wenla nà?
Séde mà ↄ kú ma lɛ́a.
5 Ma yã ò gɛ̃̀n do, mɛ́ ɛara mà o dↄro,
má ò gɛ̃̀n plaa se, mɛ́ yã sínla dↄro.
6 Ben Dii ɛ̀ara à yã ò Ayubanɛ zàga'ĩa guu à bè:
7 Ǹ fɛɛ ǹ zɛ lán nɛ́gↄ̃gbɛ̃ bà,
mɛ́ n lala yãzi, nɛ́ wemala.
8 Nɛ́ lá kú ma yãkɛna a zɛ́alan yↄ́?
Ń yezi ǹ ma taari e lɛ n yã bↄ nnan yↄ́?
9 N gã̀sã gbãaa kà ma pↄ́ ũↄ́?
N kòto é fↄ̃ à guu nigã lán ma pↄ́ bàↄ́?
10 Ǹ bítakɛ kↄ̃n kíkɛɛo da pↄ́kãsã maaanↄ ũ,
ǹ gakui kↄ̃n bɛ̀ɛo da utadaa ũ.
11 Ǹ n pↄfɛ̃ bↄbↄḿma,
ǹ ĩadãrinↄ gwa kↄ̃n wɛ́ɛ zaaao ǹ wí daḿma.
12 Ǹ ĩadãrinↄ gwa kↄ̃n wɛ́ɛ zaaao ǹ ń pãɛ,
ǹ ń dúgu zↄ̃ guu kɛ̀ aↄ̃ↄ kún,
13 ǹ ń ká tú ń píngi,
ǹ ń yiyi ǹ ń ká gɛ̀wãan,
14 mɛ́ gbasa mà n sáabu kpá,
kɛ̀ n zĩ̀ blè kↄ̃n n gã̀sã gbãaao yãnzi.
Bↄrɛ yã
15 Ǹ bↄrɛ gwa,
kɛ̀ ma à kɛ̀ lán ma n kɛ nà.
È sɛ̃̀ ble lán zù bàmɛ.
16 À gbãaa kú à wógbaamɛ,
à yɛ̃̀ɛ kú à gbɛɛ báasiamɛ.
17 À vlãa porona lán sida lí bà,
à gbáda tĩi dɛ lán bàtãna bà.
18 À wánↄↄ gbãa lán mↄ̀gotɛ̃ bà,
à gbánↄↄ dɛ lán mↄ̀ gò bà.
19 À bíta bé à dɛ pↄ́ bɛ̃ɛ kɛ̀ má kɛ̀nↄla píngi,
à Kɛ̀ri ado bé eé à fↄ̃.
20 Sĩ̀sĩnↄ musun è pↄ́ blen,
gwen nↄ̀bↄsɛ̃tɛnↄ è kↄ̃kↄ̃ on ń píngi.
21 È daɛ lɛ̀'itɛ gbáru,
ègↄ̃ sↄtↄↄ vↄ̃n dã̀dã guu.
22 Lɛ̀'itɛ ↄra è daàla,
swagbaranↄ è ligazi.
23 Baa tó ísↄ̃ e vĩvĩi, è bídi kɛro,
tó Yoda ísↄ̃pɛɛna e à lɛ́ paa,
à làakari ègↄ̃ kpaɛnamɛ.
24 Weé fↄ̃ wà à wɛ́ɛ wíwi wà à kũↄ́?