39
1 Ń zↄ̃ nɛ́'igurↄↄ dↄ̃ↄ́?
N gãsi è gurↄↄ kɛ̀ èe nɛ́ iiↄ́?
2 Nɛɛ̀ ń nↄ̀ mↄↄ dↄdↄↄ́?
Nɛɛ̀ ń nɛ́'igurↄↄ dↄ̃ↄ́?
3 Aↄ̃è kúɛ wà nɛ́ imɛ,
ben aↄ̃ nɛ́'iwãwãa è kpáɛ.
4 Aↄ̃ nɛ́nↄ è gbãa kũ sɛ̃̀n aↄ̃è pɛ́ɛ,
aↄ̃è gɛ̃ zɛ́la aↄ̃è su ń danↄa dↄro.
5 Dé bé à tò zaakisɛ̃tɛ gↄ̃̀ a zĩndanɛ?
Dé bé à à pòro à à gbàrɛɛ?
6 Ma sɛ̃̀tɛ dìɛnɛ à bɛɛ ũmɛ,
ma tↄↄtɛ wisidee kɛ̀nɛ à kúkii ũ.
7 È pã kpá wɛ́tɛ kĩizi,
è a kpàkɛri zↄka maro.
8 Ègↄ̃ tɛ́ sĩ̀sĩnↄa àgↄ̃ sɛ̃̀ wɛtɛɛ,
ègↄ̃ kpáɛ kɛɛ pↄ́ ísinↄzi píngi.
9 Zùsɛ̃tɛ é we à zĩi kɛnnɛↄ́?
Eé we à i n zùnↄ karan yↄ́?
10 Nɛ́ bà dↄa lɛ à bú wínnɛↄ́?
Nɛ́ gbóngo danɛ lɛ à kpasee kɛ̃nnɛↄ́?
11 Nɛ́ náanɛ dↄa à gbãa bíta yãnzii?
Nɛ́ n zĩi tónɛↄ́?
12 Nɛ́ à náanɛ kɛ à n pↄ́wɛɛ sɛ́sɛ
à suonnɛ pↄ́wɛɛgbɛ̃kiiaↄ́?
13 Taataa è a dɛ̀bɛkãnↄ poro kↄ̃n pↄnnaao,
mↄde eé sí lɛ́kↄ̃zi kↄ̃n tokũ dɛ̀bɛkãoro.
14 È nɛ́gbere da tↄↄtɛ,
è tó bùsu'ãatɛ̃ nɛ́gbere pìnↄ wã à pipi.
15 À sã̀n kɛ̀ weé gà wà kɛ̀sɛ pɛ́ɛa à wíwi,
kesↄ̃ nↄ̀bↄsɛ̃tɛnↄ é táa oa.
16 Ègↄ̃ pãsĩ kↄ̃n a nɛ́nↄ,
nɛ́gↄ̃ dↄ̃ se à zĩnda nɛ́nↄnlo,
zĩ pã kɛna è kɛnɛ yãke ũro.
17 Zaakɛ mɛ́ɛ à gba ↄ̃ndↄ̃ↄro,
mɛ́ɛ à baka da faadeenↄ tɛ́ro.
18 Mↄde tó à fɛ̀ɛ à bↄ̀ kↄ̃n bào,
è gɛ̃ sↄ̃la à à dìri yáa dↄ.
19 Ḿbe nɛɛ̀ tó sↄ̃ gↄ̃ gbãaa vĩↄ́?
Ḿbe n sɛ̀sɛkã pɛ̀pɛnɛ à waaaↄ́?
20 Ḿbe nɛɛ̀ tó àgↄ̃ vĩvĩi lán kwaa bàↄ́?
À pↄ́ bↄna à yĩn kĩi gbãaa è tó vĩa ń kũ.
21 È a gbá gáɛgaɛ guzurɛn,
è pↄnnaa kɛ a gbãaa yãnzi,
ben è gá da zĩ̀kpɛɛnↄlɛ.
22 È pↄ́ kɛ̀ wè vĩa kɛnɛ yáa dↄ,
swɛ̃̀ è kɛ̃nlo, è bↄru kpɛɛ fɛ̃ɛdaanɛro.
23 Kà ègↄ̃ kĩi kɛɛ gbàran à musu,
sári lɛ̀ɛtɛgɛ kↄ̃n sári gésedeeo è pí.
24 Tó wà zĩ̀kuu pɛ̀, ègↄ̃ a zĩnda dakii dↄ̃ro,
ègↄ̃ tↄↄtɛ lɛ́lɛɛ ègↄ̃ vĩvĩi ègↄ̃ kɛɛ kɛ̀ɛkɛɛ.
25 Tó wà kuu pɛ̀,
è pↄ́ bↄ a yĩn à be, ɛ̃hɛ̃!
Ègↄ̃ zĩ̀ ĩa sɛ́sɛɛ zaa zã̀azã
kↄ̃n gbɛ̃nsinↄ wii gbãaao kↄ̃n kuukɛnao.
26 N ↄ̃ndↄ̃ↄ bé à tò blɛa è yàa pá,
à a dɛ̀bɛ poro à gá sↄↄmɛtɛ kpaↄ́?
27 Ḿbe ń dìɛ kúunɛ
àgae vĩa zãazãa à a sà da zaa musuↄ́?
28 Ègↄ̃ kú gbɛ̀ musu, gwen è in,
è zↄ̃ gbɛ̀ mìsↄ̃ntɛ̃a a aafia'ekii ũ.
29 Zaa gwen ègↄ̃ kpáɛ kɛɛ pↄ́bleezi,
è wɛ́ɛ pá pↄ́nↄa kãaa.
30 Arun à nɛ́nↄ pↄ́blee ũ,