EBERUNƆ 3

Yesu dɛ Musala

1 Beee yãnzi ma gbɛ̃nↄ, amↄa kɛ̀ Luda a sisi a mↄ a kiianↄ, à laasuu lɛ́ Yesu kɛ̀ Luda à zĩ̀ Sa'oriki kɛ̀ wa zɛo ũua. 2 Náanɛdeemɛ Luda kɛ̀ à à dìɛnɛ lán Musa dɛ nà Luda ua guu. 3 Lán uakaɛri bɛ̀ɛ ègↄ̃ dɛ uala nà, lɛn Yesu gakui bíta dɛ Musa pↄ́la lɛ. 4 Ua sãnda píngi a kaɛri vĩ, bensↄ̃ pↄ́ sãnda píngi Kaɛrin Luda ũ. 5 Luda ua zĩkɛri náanɛdeen Musa ũ, yã kɛ̀ Luda é oo sèedadeemɛ. 6 Kirisi sↄ̃ bɛdee pì nɛ́mɛ. Luda a ua nànɛ à ↄzĩ. Wámbe ua pì ũ, tó wá kpɛ́ wée tãmaa kɛ̀ wá vĩ lɛ́ gbɛ̃ɛ kↄ̃n swɛ̃̀o kpáɛna.

Luda gbɛ̃nↄ kámmabokii

7 Beee yãnzi lán Luda Ninii ò nà:

Tó a Luda kòto mà gbã̀a,

8 àton swãgbãaa kɛ lán a dezinↄ kɛ̀ nàro,

kɛ̀ aↄ̃ ma lɛ wà ma gwa gurↄↄ kɛ̀ aↄ̃ bↄ̀ ma kpɛɛ gbáan.

9 Baa kɛ̀ aↄ̃ ma yãkɛnanↄ è wɛ̃̀ baplaa,

aↄ̃ ma lɛ wà ma gwa gwe, aↄ̃ ma gbãa lɛ́ gwà.

10 Ben ma pↄ fɛ̃̀ gbɛ̃ pìnↄzi,

ma bè gbɛ̃ sãsãnanↄn ń ũ,

aↄ̃ↄe ma zɛ́nↄ dↄ̃ro.

11 Ben ma la dà ma pↄfɛ̃ guu ma bè,

aↄ̃é gɛ̃ ma kámmabokiinlo fá.

12 Ma gbɛ̃nↄ, à làakari kɛ a gbɛ̃ke tóngↄ̃ swɛ̃̀ zaa ludanaanɛkɛsai vĩ ai à gá kɛ̃o Luda Wɛ̃̀ndidearo. 13 Guu kɛ̀ è dↄ kɛ̀ eè be Gbã̀amɛ píngi, àgↄ̃ lɛ́ daakↄ̃a, lɛ durun tón a gbɛ̃ke sãsã à swãgbãa kũro yãnzi. 14 Kirisi gbɛ̃nↄn wa ũ, tó wá náanɛ kɛ̀ wá vĩ zaa káaku kũna gbãngbãn ai à lɛ́a. 15 Lán wà ò nà:

Tó a à kòto mà gbã̀a,

àton swãgbãaa kɛ lán a dezinↄ kɛ̀ nà

gurↄↄ kɛ̀ aↄ̃ bↄ̀ ma kpɛɛro.

16 Dénↄn gbɛ̃ kɛ̀ aↄ̃ Luda kòto mà aↄ̃ bↄ̀ à kpɛɛnↄ ũ, tó èe kɛ gbɛ̃ kɛ̀ Musa ń bↄ́ɛ Igipitinↄ baasiroo? 17 Dénↄn Luda pↄ fɛ̃̀ńzi ai wɛ̃̀ baplaa, tó èe kɛ gbɛ̃ kɛ̀ aↄ̃ durun kɛ̀, aↄ̃ gɛ̀ gↄ̃̀ kaɛna gbáa guunↄ baasiroo? 18 Dénↄn à la dàńnɛ kɛ̀ aↄ̃é gɛ̃ a kámmabokiinlo, tó èe kɛ gbɛ̃ kɛ̀ aↄ̃ gì à yã mazinↄ baasiroo? 19 Wá è kɛ̀ aↄ̃ↄe e wà gɛ̃̀nlo aↄ̃ ludanaanɛkɛsai yãnzi.

<- EBERUNƆ 2 EBERUNƆ 4 ->