ƐFESUDEENƆ 4

Mɛ̀dↄ̃nkↄ̃kɛna

1 Mamↄma kɛ̀ má dɛ pisina ũ Diinɛ, ma wɛ́ɛ kɛ̀awa a kuuna gↄ̃ dɛ lán Luda a sisi àgↄ̃ dɛ nà. 2 À kↄ̃ fↄ̃ àgↄ̃ yekↄ̃zi zĩndabusana guu kↄ̃n nↄ̀sɛyĩio kↄ̃n mɛnao. 3 À wɛ́ɛ tã àgↄ̃ lɛ́dolɛ kɛ̀ bↄ̀ Luda Nini kiia vĩ bà kɛ̀ è a dↄkↄ̃a ũ. 4 Mɛ̀ mɛ̀n domɛ, bensↄ̃ Ninii pì mɛ̀n domɛ. Lɛn tãmaa kɛ̀ Luda a sisia mɛ̀n do lɛ se. 5 Dii mɛ̀n do bensↄ̃ dↄnzizɛ mɛ̀n do kↄ̃n batisi mɛ̀n dooo. 6 Luda mɛ̀n domɛ wa píngi De ũ. Àmbe à iko vĩ wa baadea, ègↄ̃ zĩi kɛɛ wa baade píngi guu, à kú kↄ̃n wa baade píngio.

7 Kirisi gbɛ̃kɛɛ kɛ̀ wa baadenɛ, lán à gba dàwe nà lɛ́n. 8 Beee yãnzi à kɛ̃na Luda yãn wà bè:

Kɛ̀ à fɛ̀ɛ à tà musu, à dↄ̀ zĩ̀zↄnↄnɛ aɛ,

à gba dà gbɛ̃nↄnɛ.

9 À fɛɛ à tana musu beee dɛ diamɛ? Beee bè à pìta ai tↄↄtɛ gĩzĩ gĩa. 10 Gbɛ̃ kɛ̀ pìta pìmɛ gbɛ̃ kɛ̀ fɛ̀ɛ à tà ludambɛ musumusu ũ, lɛ à gu sãnda píngi pa. 11 Àmbe à gbɛ̃kenↄ gbà zɛ́ aↄ̃gↄ̃ dɛ zĩ̀rinↄ ũ, gbɛ̃kenↄ annabinↄ, gbɛ̃kenↄ baarunnakparinↄ, gbɛ̃kenↄ pasitↄnↄ ke yãdannɛrinↄ, 12 lɛ Luda gbɛ̃nↄ gↄ̃ kú à zĩ soru guu, lɛ Kirisi mɛ̀ gbãa kũ, 13 ai wa píngi wàgↄ̃ gá ká Luda Nɛ́ náanɛ dↄ̃nkↄ̃ kɛnaa à dↄ̃na dↄ̃nkↄ̃ guu, lɛ wà gↄ̃ gbɛ̃ papananↄ ũ Kirisi kɛ̀ pↄ́ píngi pɛ̀kↄ̃rɛa bíta lɛ́n. 14 Tó lɛmɛ wégↄ̃ dɛ nɛ́ féte kɛ̀ wè ↄ̃ndↄ̃ kↄ̃n mↄnafikio kɛńzi wà ń sãsãnↄ ũ dↄro, kɛ̀ yã dufu dannɛna è ń sɛ́ lán ĩa ke ísↄ̃ bà. 15 Auo, wé yãpuraa o kↄ̃n yenzio wà gbã yã píngi musu Kirisi kɛ̀ dɛ à mì ũu guu. 16 À guun mɛ̀gu píngi è kↄ̃ kũn aↄ̃ nakↄ̃a kↄ̃n tĩinↄ gbãaao, ben mɛ̀guunↄ è zĩi kɛ a zɛ́a, mɛ̀ ègↄ̃ gbãa àgↄ̃ kaara kↄ̃n yenzio.

Kuuna zi kↄ̃n kuuna dufuo

17 Beee yãnzin mɛ́ɛ yã ooare kↄ̃n Dii tↄ́o, mɛ́ɛ a gbaao làakari. Àtongↄ̃ kuu lán kifii kɛ̀ aↄ̃ nↄ̀sɛfutakɛɛ dↄńnɛ aɛnↄ bàro. 18 Aↄ̃ laasuu ń kɛ́ yↄ̃nkↄ, aↄ̃ↄ zã̀ kↄ̃n wɛ̃̀ndi kɛ̀ Luda è kpáḿmao, kɛ̀ aↄ̃ wɛ́ɛ sia, bensↄ̃ aↄ̃ swã gbãaa yãnzi. 19 Aↄ̃ↄ nↄ̀sɛ vĩro, aↄ̃ ń zĩnda kpà wísaiyãa, aↄ̃ↄ dà zaa bori píngi kɛna nii vĩ. 20 Amↄanↄ sↄ̃, ée Kirisi yã dada lɛro. 21 A à yã mà, ben Yesu guu a yãpuraa kɛ̀ à vĩi dàda. 22 Wà òare à ↄ kpá a dà zii kɛ̀ dↄare aɛzi, kɛ̀ yàka a pↄ́nidɛna zaaanↄ yãnzi. 23 Wà òare à a nↄ̀sɛ liɛ a laasuu gↄ̃ dufu, 24 é dà dufu kɛ̀ Ludaa kɛ̀ lán a pↄ́ bà sɛ́, a kuuna égↄ̃ adona kuuna yãpuradee ũ yãzɛdekɛna guu.

25 Beee yãnzi à ↄ kpá mↄnafiki yãzi, a baade gae yãpuraa o a gbɛ̃daaanɛ, zaakɛ mɛ̀dↄ̃nkↄ̃deenↄn wa ũ. 26 Tó a pↄ fɛ̃̀, àton durun kɛro. Àton tó ↄfãntɛ̃ gɛ̃ kpɛ́n àgↄ̃ kpɛɛ pↄfɛ̃naro, 27 lɛ àton Ibilisi gba zɛ́ro yãnzi. 28 Gbɛ̃ kɛ̀ è kpãi o yã kpãi tó. À wɛ́ɛ tã à zĩ maaa kɛ kↄ̃n a ↄↄo, lɛ à pↄ́ e à takaasideenↄ gba. 29 Àton tó yã zaa ke bↄ a lɛ́nlo, séde à zɛ́dee kɛ̀ eé gbɛ̃ kaara, à kɛ àre ũ gbɛ̃ kɛ̀ aↄ̃ↄe maanↄnɛ. 30 Àton Luda Nini kɛ̀ kú adona da pↄsiaanlo. À dɛ sèeda kɛ̀ Ludaa kɛ̀awa ai a bogurↄzĩ ũ. 31 Àton kɛ ĩi kↄ̃n gbɛ̃keoro. À pↄfɛ̃ tó kↄ̃n pɛ̃tɛ̃o kↄ̃n patana gbãaao kↄ̃n gbɛ̃sↄ̃sↄ̃nao kↄ̃n pãsĩ bori sãnda píngio. 32 Àgↄ̃ gbɛ̃kɛɛ vĩ kↄ̃o. Àgↄ̃ kↄ̃ wɛ̃nda vĩ. À sùu kɛ kↄ̃o lán Luda sùu kɛ̀ao nà Kirisi guu.

<- ƐFESUDEENƆ 3 ƐFESUDEENƆ 5 ->