Sɑkɑri 7

Nɔɔ bɔku te bɑ kɑ

Yerusɑlɛmun bɑnsu yɑɑyɑmɔ

1 Dɑrusin bɑndun wɔ̃ɔ nnɛse sɔɔ, yen suru nɔɔbɑ nnɛse wi bɑ mɔ̀ Kisilun sɔ̃ɔ nnɛse sɔɔrɑ Yinni Gusunɔ u kɑ Sɑkɑri gɑri kuɑ u nɛɛ, 2 Betɛligibu bɑ rɑɑ Sɑrɛsɛɛ kɑ Regɛmu Mɛlɛki kɑ gɑbu gɔrɑ Gusunɔ wɔllu kɑ tem Yinnin sɑ̃ɑ yerɔ bu kɑ win durom kɑnɑ. 3 Kpɑ bu mɑɑ yɑ̃ku kowobu kɑ win sɔmɔbu bikiɑ bɑ̀ n ko bɑ n sumɔn nɑ, kpɑ bɑ n nɔɔ bɔkuɑ wɔ̃ɔn suru nɔɔbuse kpuro sɔɔ nge mɛ bɑ mɔ̀ tɛɛbun di.

4 Yerɑ Gusunɔ, wɔllu kɑ tem Yinni u Sɑkɑri sɔ̃ɔwɑ u nɛɛ, 5 ɑ yɑ̃ku kowobu kɑ tɔn be kpuro wisio ɑ nɛɛ,

sɑɑ wɔ̃ɔ wɑtɑ kɑ wɔkurun di, bɑ rɑ nɔɔ bɔke

kpɑ bɑ n wɑ̃ɑ nuku sɑnkirɑnu sɔɔ wɔ̃ɔn suru nɔɔbuse kɑ nɔɔbɑ yiruse sɔɔ.

Adɑmɑ bɑ ǹ ye mɔ̀ bu kɑ mɑn bɛɛrɛ wɛ̃.

6 Bɑ̀ n mɑɑ dimɔ, bɑ nɔrumɔ, ben tiin sɔ̃nɑ.

7 Yellu, nɛ, Yinni Gusunɔ nɑ tɔmbu kirɔ kuɑ kɑ gɑri yinin bweseru nɛn sɔmɔ gbiikobun min di. Sɑɑ ye sɔɔ, Yerusɑlɛmu kɑ wuu si su kɑ ye sikerenɛn tɔmbu bɑ wɑ̃ɑ bɔri yɛndu sɔɔ, mɑ tɔmbɑ yibɑ sɔ̃ɔ yɛ̃sɑn nɔm dwɑru giɑ kɑ wɔwɑɔ.

8-9 Gusunɔ wɔllu kɑ tem Yinni u mɑɑ Sɑkɑri sɔ̃ɔwɑ u nɛɛ, ɑ tɔn be gɑri yini yɑɑyɑsio yi yi nɛɛ,

bu tɔmbu sirio dee dee,

kpɑ bɑ n tɔn geeru kɑ wɔnwɔndu mɔɔsinɛ.

10 Bu ku gɔminibu kɑ gobekubɑ

kɑ sɔbu kɑ sɑ̃ɑrobu dɑm dɔre.

Bu ku mɑɑ ben winsim kɔ̃sɑ bwisikusi.

11 Adɑmɑ bɑ ǹ gɑri yi swɑɑ sue. Bɑ swɑɑ tɑɑyɑwɑ. 12 Mɑ bɑ ben gɔ̃rusu bɔbiɑsiɑ nge kpee kpikiru. Bɑ ǹ nɛ, Gusunɔ wɔllu kɑ tem Yinnin woodɑ ye swɑɑ dɑki, ye nɑ bu wɛ̃ sɑɑ nɛn sɔmɔbun min di, be nɛn Hunde u kɑ gɑri kuɑ. Mɑ ben swɑɑ tɑɑ bi, bu mɑn mɔru kuɑ too.

13 Sɑnɑm mɛ nɑ bu sokɑ, bɑ ǹ wisɑ.

Yen sɔ̃nɑ nɛn tii nɑ ǹ mɑɑ bu wisɑ

sɑnɑm mɛ bɑ mɑn somiru kɑnɑ.

14 Yen sɔ̃nɑ nɑ bu yɑrinɑsiɑ bwesenu kpuron suunu sɔɔ ni bɑ ǹ dɑɑ yɛ̃.

Mɑ bɑ ben tem deri dirum

goo ku rɑ mɑɑ sɑre mi.

Mɑ tem gem mɛ, mu kuɑ bɑnsu.

Nɛ, Gusunɔ wɔllu kɑ tem Yinniwɑ nɑ yeni geruɑ.

<- Sɑkɑri 6 Sɑkɑri 8 ->