Sɑkɑri 12

Yinni Gusunɔ

u koo Yerusɑlɛmu yɑkiɑ

1 Gɑri yi Yinni Gusunɔ u geruɑ Isirelibɑn sɔ̃ wee.

Wi, wi u wɔllu kɑ tem mɔmɑ,

mɑ u mɑɑ tɔnu hunde dokeɑ

2 u nɛɛ, nɑ Yerusɑlɛmu kuɑ nge nɔrɑ ye yɑ nɛn mɔru yibɑ nge tɑm. Yɑ koo bwese ni nu kɑ ye sikerenɛ woo tiro kpɛ̃ɛ. Woo tiro ge, gɑ koo Yudɑbɑ kpuro nɛnɛ bɑ̀ n Yerusɑlɛmu tɑrusi. 3 Tɔ̃ɔ te sɔɔ, kon ye gɔsiɑ nge kpee bɑkɑru. Be bɑ kĩ bu tu suɑ bɑ koo mɛɛrɑ wɑ. Hɑnduniɑn bwesenu kpuro nu koo mɛnnɑ nu tu wɔri. 4 Yen tɔ̃ɔ te, Yinni Gusunɔ u nɛɛ, kon ben dumi woo tiro kpɛ̃ɛ kpɑ n yin mɑɑsɔbu nɔni swɑ̃ɑru kpɛ̃ɛ, kpɑ n bwese tukunun dumi wɔ̃koru kpɛ̃ɛ. Adɑmɑ kon Yudɑbɑ kɔ̃su. 5 Yudɑn wirugibu bɑ koo nɛɛ, Yerusɑlɛmugibɑ bɑ sɑ̃ɑ ben dɑm nɛ, Gusunɔ ben Yinnin sɔ̃, nɛ wi nɑ wɔllu kɑ tem mɔ. 6 Yen tɔ̃ɔ te sɔɔ, kon Yudɑbɑn wirugibu kowɑ nge dɔ̃ɔ boko dɑ̃ɑ sɔ̃ɔwɔ, ǹ kun mɛ nge wii bɔn tèn dɔ̃ɔ bɑ sɔkɑ dĩɑ bɔkunu sɔɔ. Bɑ koo bwese ni nu kɑ bu sikerenɛ kɑmiɑwɑ mɑm mɑm. Adɑmɑ Yerusɑlɛmugibu bɑ ko n sɔ̃wɑ ben temɔ.

7 Nɛ, Yinni Gusunɔ kon Yudɑbɑn yɛnusu fɑɑbɑ ko, kpɑ Dɑfidin yɛnun bɛɛrɛ kɑ Yerusɑlɛmugibun bɛɛrɛ yu ku rɑɑ Yudɑ be bɑ tiegiɑ kerɑ. 8 Yen tɔ̃ɔ te, kon Yerusɑlɛmugibu kɔ̃su. Be sɔɔ, wi u kun dɑɑ dɑm mɔ, u koo dɑm kowɑ nge Dɑfidi. Kpɑ Dɑfidin yɛnugibu bɑ n sɑ̃ɑ nge Gusunɔn gɔrɑdo wi u yɔ̃ ben wuswɑɑɔ.

Bɑ gɔɔ wooru sɔ̃

tem mɛ kpuro sɔɔ

9 Yen tɔ̃ɔ te, kon kookɑri ko n bwese ni kpuro go ni nu Yerusɑlɛmu wɔrim wee. 10 Kon de Dɑfidin yɛnugibu kɑ Yerusɑlɛmugibu bɑ n wɔnwɔndu mɔ kpɑ bɑ n dɑ kɑnɑru ko, kpɑ bu gɔsirɑmɑ nɛn mi, nɛ wi bɑ yɑɑsɑ sɔkɑ. Bɑ koo mɑn swĩisi nge wìn bii teereru tɑ gu. Bɑ koo swĩwɑ kɑ nuku sɑnkirɑ bɑkɑnu nge wìn bii gbiikoo u gu. 11 Yen tɔ̃ɔ te, nuku sɑnkirɑru tɑ ko n kpɑ̃ Yerusɑlɛmuɔ nge te bɑ kuɑ Hɑdɑdirimɔɔn sɔ̃ Mɛgidon wɔwɑɔ. 12 Tem mɛ kpuro sɔɔ, bɑ ko n gɔɔ wooru sɔ̃wɑ yɛnu kɑ yɛnu. Dɑfidin yɛnugibu, kurɔbu kɑ durɔbu nɛnɛm. Nɑtɑnin yɛnugibu, kurɔbu kɑ durɔbu nɛnɛm. 13 Lefin yɛnugibu, kurɔbu kɑ durɔbu nɛnɛm. Simɛin yɛnugibu, kurɔbu kɑ durɔbu nɛnɛm. 14 Nge mɛyɑ yɛnu si su mɑɑ tien tɔmbu bɑ ko n gɔɔ wooru sɔ̃ nɛnnɛnkɑ, kurɔbu kɑ durɔbu nɛnɛm.

<- Sɑkɑri 11 Sɑkɑri 13 ->