ZIA YÃ 19

Pↄnnakɛna ludambɛ

1 Abire gbɛra ma kòto gbãna mà ludambɛ lán pari yã'onaa bà à pì:

Aleluya! Ó Luda mɛ́ à zĩ̀i blè!

Àkũ mɛ́ à gakuri kũ gbãnao vĩ ado,

2 zaakũ àdi yãkpatɛ kɛ kũńwo

a zɛa kũ yãpuraomɛ.

À yãkpatɛ kɛ̀ kũ karua zↄ̃kↄ̃

kũ à andunia yàka kũ a pãpãkɛnaao.

À a zↄ̀blerinↄ dɛdɛna fĩna bòa.

3 Ò pì dↄ:

Aleluya!

A túsukpɛ nigↄ̃ dↄ gↄrↄ sĩnda pínkimɛ.

4 Gbɛ̃ zↄ̃kↄ̃ gbɛ̃nↄn baro awɛɛsiikↄ̃nↄ kũ pↄ́ bɛ̃nɛ mɛ̀n siikↄ̃nↄ wùtɛwutɛ ò donyĩ kɛ̀ Luda kũ à vutɛna a gbàaanɛ ò pì:

Aami! Aleluya!

Sãnɛ Bↄ̀rↄ nↄsɛpↄble

5 Akũ ma kòtoo mà bona gbàa pì kĩnaa à pì:

À ó Luda tↄ́ kpá a zↄ̀blerinↄ á pínki,

ákↄ̃nↄ kũ á a vĩna vĩnↄ,

nɛ́ fíti gbɛ̃ zↄ̃kↄ̃.

6 Akũ ma kòtoo mà lán pari yã'onaa bà, lán ísↄ̃kɛna kĩni bà, lán legũpũtãna gbãna bà à pì:

Aleluya!

Dikiri ó Luda Gbãnasĩndapinkide nà kíblenaaa.

7 Ò pↄnna kɛ, ò yáa dↄ, ò a tↄ́ kpá,

zaakũ Sãnɛ Bↄ̀rↄ nↄsɛgↄrↄ kà, a nↄ sorumii mà.

8 Ò táaru biza pura táitai kũ àtɛn tɛ́ kɛ kpàa à yĩ.

Táaru biza pì bi Luda gbɛ̃nↄ yãmanakɛnanↄmɛ.

9 Malaikaa òmɛnɛ: Ǹ kɛ̃. Arubarikadenↄn gbɛ̃ kũ ò ń sísi Sãnɛ Bↄ̀rↄↄ pìi nↄsɛpↄbleanↄ ũ. À òmɛnɛ dↄ: Luda yã yãpuran gwe. 10 Ma wutɛ a arɛ de mà donyĩ kɛnɛ, akũ à òmɛnɛ: Ǹ abire tó. Ǹ donyĩ kɛ Ludanɛ. N zↄ̀bleri daken ma ũ kũ n gbɛ̃ kũ ò yã kũ Yesu de a sèedade ũ kũnanↄ. Zaakũ yã kũ Yesu de a sèedade ũmɛ annabikɛyã'ona mì ũ.

Kirisi suna dina sↄ̃ puraa

11 Akũ ma ludambɛ è wɛ̃kↄ̃ana, akũsↄ̃ pura bò, gbɛ̃ kũ à dia tↄ́n Náanide Yãpurade. Àdi yãkpatɛ kɛ kũńwo, àdi zĩ̀ ká kũńwo a zɛ́a. 12 A wɛ́ de lán tɛ́vuraa bà, à kífura kúkuna dasi. Tↄ́ ke kɛ̃na a mì'arɛa, gbɛ̃ke tↄ́ pì yáasi dↄ̃ro, akãa baasiro. 13 À uta kũ ò dà aru gũn dana. À tↄ́n Luda Yã. 14 Ludambɛ zĩ̀karinↄn tɛ́i, ò didi sↄ̃ puranↄa kũ táaru biza pú táitaio dadana. 15 Fɛ̃nɛda lɛ́nna tɛn bo a lɛ́n, de à burinↄ lɛ́o. Ani kí bleḿma kũ mↄ̀ gòoo, ani gɛ̀sɛ pɛ́tɛ geepi nɛ́nↄa geepi'ifɛ̃ki gũn, àkũmɛ Luda Gbãnasĩndapinkide pↄfɛ̃ pãsĩ ũ. 16 Ò tↄ́ díkĩna kɛ̃̀ a utaa kũ a gbádao:

Kínanↄ Kína, dikirinↄ Dikiri.

17 Akũ ma malaikaa è à zɛna ifãntɛ̃n. À lɛ́ gbãna zù bã kũ òtɛn vura musumusunↄi pínki à pì: À mↄ́ à kakara à pↄ́ble zↄ̃kↄ̃ kũ Luda kɛ̀árɛ ble, 18 de à le à kínanↄ gɛ̀ só kũ soza gbɛ̃ zↄ̃kↄ̃nↄ kũ gbãnadenↄ kũ sↄ̃nↄ kũ ń dìrinↄ kũ gbɛ̃ sĩnda pínkinↄ, zĩdadenↄ kũ zↄ̀nↄ, nɛ́ fíti gbɛ̃ zↄ̃kↄ̃. 19 Akũ ma nↄ̀bↄ pãsĩ è kũ andunia kínanↄ kũ ń zĩ̀karinↄ, ò kↄ̃ kàkara ò zĩ̀ ká kũ gbɛ̃ kũ à di sↄ̃a pìio kũ a zĩ̀karinↄ. 20 Ò nↄ̀bↄ pãsĩ pìi kũ̀ lɛɛlɛ kũ annabi ɛ́kɛ kũ à daboyãnↄ kɛ̀ a arɛo. Daboyã pìnↄn à gbɛ̃ kũ ò nↄ̀bↄ pãsĩ sèeda vĩ, ò kùtɛ a takanɛnↄ sã̀tɛo. Ò ń zú tɛ́ sɛ̀bɛ kũ àtɛn kũ kũ ifãntɛ̃gbↄ̃ↄo gũn bɛ̃nɛ ń pla ń pínki. 21 Gbɛ̃ kũ à di sↄ̃a gbɛ̃ kparanↄ dɛ̀dɛ kũ fɛ̃nɛda kũ à bò a lɛ́ gũnwo, akũ bãnↄ ń gɛ̀nↄ blè ò kã̀ pínki.

<- ZIA YÃ 18 ZIA YÃ 20 ->