149
Dikiri gbɛ̃nↄ yãkpatɛkɛna kũ burinↄo
1 Aleluya!
À lɛ̀ dufu sí Dikirinɛ,
à a táaki lɛ́ a gbɛ̃nↄ kↄ̃kakaranaa gũn.
2 Isarailanↄ pↄ kɛ nna ń Kɛ̀riia,
Zaiↄ̃denↄ pↄnna kɛ kũ ń kínao.
3 Ò ũ wã ò a tↄ́ bo,
ò a táaki lɛ́ kũ mↄrↄↄo kũ sɛ̃gɛ̃sɛ̃gɛ̃o.
4 Zaakũ Dikiri gbɛ̃nↄ yã dì káagu,
àdi surabana fùra kú zĩdabusarinↄnɛ.
5 Dikiri yãmarinↄ pↄnna wiki lɛ́ ń zĩ̀blena yãi,
ò ayuwii kɛ ń wutɛbↄↄ musu.
6 Luda táakilɛna gↄ̃ da ń lɛ́n,
fɛ̃nɛda lɛ́kpaplade gↄ̃ na ń ↄĩ,
7 de ò mↄra káo burinↄa,
ò bùsu sĩnda pínki gbɛ̃nↄ wɛ́ tão,
8 de ò ń kínanↄ yĩyĩ kũ mↄ̀kakↄ̃ananↄ,
ò mↄ̀ ká ń kínɛnↄa,
9 de ò yã dańla lákũ à kɛ̃na takada gũn nà.
Gakuri kũ Dikiri yãmarinↄ ni len gwe.