YÃGƆ̃GƆ̃RINƆ 14

Samusi nↄsɛna Filisitininↄ tɛ́

1 Samusi gɛ̀ɛ Timina, akũ à Filisitini nɛ́nↄkpare ke è gwe. 2 Kũ à sù, akũ à pì a de kũ a daonɛ: Ma Filisitini nɛ́nↄkpare ke è zaa Timina. À gɛ́ à a wɛtɛmɛnɛ mà sɛ́ nↄ ũ. 3 Akũ a de kũ a dao pìnɛ: Nↄ kú n danɛnↄ ke n burinↄ tɛ́nloo? Akũ ĩni gɛ́ ǹ nↄ sɛ́ Filisitini gyↄfↄrↄdenↄ tɛ́ yá? Akũ Samusi pì a denɛ: Ǹ gɛ́ ǹ a wɛtɛmɛnɛ dé, zaakũ nↄkpare pìn má yei. 4 A de kũ a dao dí dↄ̃ kũ yã pìi bò Dikiri kĩnaanlo, zaakũ Dikiri tɛn zɛ́ wɛtɛ à yã mↄ Filisitininↄnɛmɛ. Gↄrↄ birea Filisitininↄ mɛ́ òtɛn kí ble Isarailanↄa.

5 Akũ Samusi tɛn gɛ́ Timina kũ a deo kũ a dao. Kũ ò kà Timina geepi bura, músunɛ bↄ̀rↄↄ bò Samusii àtɛn pũtã. 6 Dikiri Nini sùa, akũ à músuu pìi kũ̀ à kɛ̃̀kↄ̃rɛ lákũ blènɛ bↄ̀rↄↄn à kɛ̃̀kↄ̃rɛ bà. À pↄ́ke kũna a ↄĩ sↄ̃ro. Adi yã kũ à kɛ̀ɛ pì o a de ke a danɛro. 7 Akũ à gɛ̀ɛ à yã ò kũ nↄkpare pìio, nↄkpare pì sↄ̃ à kɛ̀nɛ mana.

8 Kũ à gↄrↄ pla kɛ̀, à fùtɛ àtɛn gɛ́ nↄ pì sɛ́, akũ à lìtɛ à gɛ̀ɛ músu gɛ̀ɛ pì gwa. Akũ à è zↄ́nↄ sàa dↄ̀ a gɛ̀ɛa ari ò í kɛ̀. 9 Akũ à ↄ dàn à a sàa gà à wòto àtɛn ble, akũ àtɛn táo. Kũ à kà a de kũ a dao kĩnaa, à lìńnɛ ò blè, ama adi ońnɛ kũ a bò músu gɛ̀ɛ gũmmɛro.

Samusi gara kutu dana Filisitininↄnɛ

10 A de gɛ̀ɛ nↄkpare pì kĩnaa, akũ Samusi pↄnna pↄ́ble kɛ̀ńnɛ lákũ nↄsɛrii dì kɛ nà. 11 Kũ à sù, ò kɛfɛnnanↄ sìsi gbɛ̃nↄn baraakuri ògↄ̃ kú kãao. 12 Akũ Samusi pìńnɛ: Má gara kutu ke vĩ mà daárɛ. Ari pↄ́blena gↄrↄ suppla dí gɛ́ papao, tó a fↄ̃ à gara pìi bòmɛnɛ, mani biza kpááwa pi baraakuri kũ utao waka baraakuri. 13 Tó ádi fↄ̃ à bòmɛnɛ sↄ̃ro, ákↄ̃nↄ mɛ́ áni biza pi baraakuri kũ uta waka baraakuriio kpáma. Akũ ò pìnɛ: Ǹ ǹ gara pì dawɛrɛ ò ma. 14 À pìńnɛ:

Pↄ́ble bò pↄ́sorii gũn,

pↄ́ nna bò pↄ́ gbãna gũn.

Akũ odi fↄ̃ ò gara pìi bòro ari gↄrↄ aakↄ̃. 15 A gↄrↄ siikↄ̃dea ò pì Samusi nanↄnɛ: Ǹ ↄ̃ndↄ̃ kɛ n zãnɛ à gara pì bowɛrɛ. Tó lɛnlo, óni n kpata kũ n de bedenↄo. Ase a ó sísi de à ó pↄ́nↄ síwámɛɛ? 16 Akũ Samusi nanↄ tɛn ↄ́ↄ dↄnɛ à pì: N zãmagu! Ń yemairo! N gara ke dà ma gbɛ̃nↄnɛ, akũsↄ̃ ńdi a bona omɛnɛro. Akũ à pìnɛ: Mádi o ma de ke ma danɛro. Bↄ́ mɛ́ à tò mani onnɛɛ? 17 Àtɛn ↄ́ↄ dↄnɛ ari gↄrↄ suppla pìi gɛ̀ɛ à pàpao. A gↄrↄ supplade pìn akũ Samusi gara pìi bònɛ kũ à nàkaraa yãi, akũ a nↄ pìi gɛ̀ɛ à ò a gbɛ̃nↄnɛ. 18 A gↄrↄ suppladea ari ifãntɛ̃ gↄ̃ gɛ́ gɛ̃ kpɛ́n wɛ̃tɛ pìi kɛfɛnnanↄ pìnɛ:

Bↄ́ nna mɛ́ à de zↄ́laa?

Bↄ́ gbãna mɛ́ à de músulaa?

Akũ Samusi pìńnɛ: Tó adi kɛ a bú wì kũ ma zùnunuoro, de ádi fↄ̃ a ma gara pì bòro. 19 Dikiri Nini sùa, akũ à gɛ̀ɛ Asakɛlↄni à gↄ̃gbɛ̃nↄ dɛ̀dɛ gbɛ̃nↄn baraakuri à ń pↄ́kasanↄ bòboḿma, akũ à gɛ̀ɛ à kpà gbɛ̃ kũ ò a gara pì bònɛnↄa. Akũ à pↄ fɛ̃̀ à tà a de bɛa. 20 Akũ ò Samusi nↄ pìi kũ̀ ò kpà a gbɛ̃nna kũ à zɛ̀ a sarɛa nↄ pì sɛ́gↄrↄa.

<- YÃGƆ̃GƆ̃RINƆ 13 YÃGƆ̃GƆ̃RINƆ 15 ->