Esekiɛli 41

1 Durɔ wi, u kɑ mɑɑ mɑn dɑ sɑ̃ɑ yerun suunu sɔɔ. Mɑ u ye kpuro yĩirɑ. Adɛrɔ gen gɑnin sinum mu sɑ̃ɑwɑ gɔm soonu nɔɔbɑ tiɑ. 2 Kɔnnɔ gen yɑsum mɑɑ sɑ̃ɑwɑ gɔm soonu wɔkuru, gen beri berikɑ nɔɔbu nɔɔbu. Mɑ u sɑ̃ɑ yee ten tii yĩirɑ. Ten dɛ̃ɛbu sɑ̃ɑwɑ gɔm soonu weeru. Mɑ ten yɑsum mɑɑ sɑ̃ɑ gɔm soonu yɛndu. 3 Yen biru u duɑ dii ten sɔɔwɔ u ten kɔnnɔn dɑ̃ɑ yĩirɑ, yɑ kuɑwɑ gɔm soonu yiru. Mɑ kɔnnɔ gen tiin yɑsum sɑ̃ɑ gɔm soonu nɔɔbɑ tiɑ. Mɑ gen gɑnin yɑsum beri berikɑɔ mu sɑ̃ɑ gɔm soonu nɔɔbɑ yiru yiru. 4 Mɑ u dii sɔɔ gen tii yĩirɑ, gen dɛ̃ɛbu kɑ gen yɑsum mu nɛwɑ. Yɑ sɑ̃ɑwɑ gɔm soonu yɛndu. Mɑ u mɑn sɔ̃ɔwɑ u nɛɛ, gɑ sɑ̃ɑwɑ dii te tɑ dɛɛre gem gem.

Diɑ ye bɑ gɔri gɔri

5 Sɑ̃ɑ yee te, tɑ gɑni yiru mɔ, tiɑ sɔɔwɔ, tiɑ mɑɑ tɔɔwɔ. Mɑ durɔ wi, u ten gɑnɑ sɔɔkɑɑ yĩirɑ mɑ yen sinum mu kuɑ gɔm soonu nɔɔbɑ tiɑ. Mɑ bɑ dinu gɔri gɔri gɑni yiru yen bɑɑ sɔɔ bɑ kɑ sikerenɑ. 6 Dii ni, nu swɛɛnɛwɑ gidɑmbisɑ itɑ itɑ beri berikɑ. Gidɑmbisɑ bɑɑyeren diɑn geerɑ sɑ̃ɑwɑ tɛnɑ. Dii nin gɑni yi kɑ tɔɔkɑɑginu mɑninɛ ɑdɑmɑ yi ǹ kɑ sɔɔkɑɑginu mɑninɛ. 7 Gidɑmbisɑ ye, yɑ yɑsum kerɑnɛ wɔllu giɑ. Domi yen gɑnɑ tɔɔkɑɑ yɑ sinum kɑɑrɑ. Mɛyɑ n sɑ̃ɑ yɑ kɑ sɑ̃ɑ yee te sikerenɑ. Yen sɔ̃nɑ wɔllu giɑ bɑtumɑ yɑ kpɑ̃ɑru bo yen sɔɔwɔ. Sɑɑ gidɑmbisɑ ye yɑ wɑ̃ɑ temɔn di, tɔnu koo kpĩ u yɔ u dɑ sere ye yɑ wɑ̃ɑ wɔllɔ u kun kpɑ kɑ swɑɑ gɑɑ. 8 Mɑ nɑ diɑ ye kpuron gunum mɛɛrɑ nɑ deemɑ ye bɑ gɔri gɔri mi, sɑɑ yen kpɛɛkpɛɛkun di, yen gunum mu sɑ̃ɑwɑ dɛkɑ nɔɔbɑ tiɑ tiɑ. 9 Diɑ yen gɑnɑ tɔɔkɑɑn sinum mu sɑ̃ɑwɑ gɔm soonu nɔɔbu. Diɑ ye bɑ gɔri gɔri sɑ̃ɑ yee ten yɛ̃si yɛ̃sikɑɔ, 10 kɑ yɑ̃ku kowobun diɑn bɑɑ sɔɔ, bɑ bɑtumɑ deri yèn yɑsum mu sɑ̃ɑ gɔm soonu yɛndu. 11 Diɑ ye bɑ gɔri gɔri mi, yɑ nɔɔ tĩiwɑ bɑtumɑ ye bɑ derin berɑ giɑ. Kɔnnɔsu yiruwɑ yɑ wɑ̃ɑ mi. Teu sɔ̃ɔ yɛ̃sɑn nɔm geu giɑ, teu mɑɑ sɔ̃ɔ yɛ̃sɑn nɔm dwɑru giɑ. Gɑnɑ ye yɑ bɑtumɑ ye sikerenɛ, yen sinum mu sɑ̃ɑwɑ gɔm soonu nɔɔbu. 12 Sɑ̃ɑ yee ten sɔ̃ɔ duu yeru giɑ, diru gɑrɑ wɑ̃ɑ tɑ bɑtumɑ ye bɑ deri mi nɔɔ tĩi. Dii ten dɛ̃ɛbu bu sɑ̃ɑwɑ gɔm soonu wɛnɛ kɑ wɔkuru. Mɑ ten yɑsum mu sɑ̃ɑ gɔm soonu wɑtɑ kɑ wɔkuru. Ten gɑnɑn sinum mɑɑ sɑ̃ɑ gɔm soonu nɔɔbu. 13 Durɔ wi, u sɑ̃ɑ yee te yĩirɑ mɑ ten dɛ̃ɛbu kuɑ gɔm soonu wunɔbu (100). Bɑtumɑ ye bɑ mɑɑ deri mi, kɑ dii te bɑ bɑnɑ sɔ̃ɔ duu yeru giɑ mi, ye kpuro yɑ mɑɑ kuɑ gɔm soonu wunɔbu. 14 Sɔ̃ɔ yɑri yeru giɑ, sɑ̃ɑ yee ten dɛ̃ɛbu kɑ bɑtumɑ ye bɑ deri min yɑsum mu sɑ̃ɑwɑ gɔm soonu wunɔbu. 15 Mɑ u mɑɑ dii te tɑ wɑ̃ɑ sɑ̃ɑ yerun biruɔ yĩirɑ kɑ bɑtumɑ ye bɑ deri mɑ ye kpuro yɑ mɑɑ kuɑ gɔm soonu wunɔbu.

Sɑ̃ɑ yee ten sɔɔwɔ

Sɑ̃ɑ yee ten duu yeru kɑ dii dɛɛrɑru kɑ dii te tɑ dɛɛre gem gem mi, 16 bɑ ye kpuron gɑni kɑ fɛnɛntibɑn kɑdiribɑ dɑ̃ɑ bɛsi mɑniwɑ. Mɛyɑ bɑ mɑɑ kuɑ gidɑmbisɑ yebɑ sɔɔ. 17 Sɑ̃ɑ yee ten tɔɔwɔ kɑ ten sɔɔwɔ sɑɑ ten kɔnnɔn di sere kɑ dii te tɑ dɛɛre gem gem mi, bɑ ye kpuron gɑni burɑru koosiwɑ 18 kɑ wɔllun kɔ̃sobun weenɑsibu kɑ mɑɑ kpɑkpɑ wurusun weenɑsisu. Kpɑkpɑ wurusun weenɑsii si, kɑ wɔllun kɔ̃sobun weenɑsii be, bɑ yɔwenɛwɑ. 19 Wɔllun kɔ̃sobun weenɑsii ben bɑɑwure u wuswɑɑ mɔwɑ yiru. Wuswɛɛ yin tiɑ yɑ kɑ tɔnugiɑ weenɛ yɑ kpɑkpɑ wuru sin weenɑsi teu wuswɑɑ kisi. Wuswɑɑ tiɑ yɑ mɑɑ kɑ gbee sunɔgiɑ weenɛ mɑ yɑ mɑɑ kpɑkpɑ wuru sin weenɑsi teu wuswɑɑ kisi. Nge mɛyɑ bɑ kɑ dii te kpuron gɑni burɑru kuɑ. 20 Bɑ wɔllun kɔ̃sobun weenɑsii be kɑ kpɑkpɑ wurusun weenɑsii si kuɑwɑ ten temɔ kɑ ten gɑniɔ kɑ ten kɔnnɔsun wɔllɔ. 21 Sɑ̃ɑ yee ten kɔnnɔn kɑdirin dɑ̃nu nu nɛwɑ.

Dii te tɑ dɛɛre gem gem wuswɑɑɔ, gɑ̃ɑnu wɑ̃ɑ mi. 22 Nu sɑ̃ɑre nge yɑ̃ku yeru te bɑ kuɑ kɑ dɑ̃ɑ. Ten gunum mu sɑ̃ɑ gɔm soonu itɑ. Ten dɛ̃ɛbu mɑɑ gɔm soonu yiru. Bɑ tu nɔɔ bɔkɑ kuɑwɑ kɑ dɑ̃ɑ. Yerɑ durɔ wi, u mɑn sɔ̃ɔwɑ u nɛɛ, tɑbulu ye bɑ rɑ n yii Yinni Gusunɔn wuswɑɑɔ yerɑ mi.

23 Dii dɛɛrɑru kɑ dii te tɑ dɛɛre gem gem nu mɔwɑ kɔnnɔsu yiru. 24 Gɑmbo sikɑnɛ yiruwɑ kɔnnɔ si, su mɔ. Ye kpuro yɑ rɑ n kɛniɑrewɑ. 25 Bɑ gɑmbo yen wɔllɔ wɔllun kɔ̃sobun weenɑsibu kɑ kpɑkpɑ wurusun weenɑsisu kuɑ nge mɛ bɑ kuɑ gɑni yi sɔɔ. Mɑ bɑ kɔbɛ kuɑ ten tɔɔwɔ dii dɛɛrɑ ten kɔnnɔwɔ. 26 Dii ten yɛ̃si yɛ̃sikɑɔ kɑ sere dii ni bɑ gɔri gɔri mi kɑ mɑɑ yen kɔbɛɔ, bɑ yen fɛnɛntibɑ kɔkɔrɔ dokeɑwɑ kɑ kpɑkpɑ wurusun weenɑsisu.

<- Esekiɛli 40 Esekiɛli 42 ->