Dɑniɛli 4

1 Nɛ, Nɛbukɑnɛsɑɑ, nɑ wɑ̃ɑ nɛn sinɑ kpɑɑrɔ kɑ bɔri yɛndu kɑ nuku dobu. 2 Yerɑ wɔ̃kuru gɑru sɔɔ, nɑ dosu gɑgu kuɑ ge gɑ mɑn bɛrum mwɑ. Kɑ̃si ni nɑ wɑ sɑnɑm mɛ nɑ kpĩ, nu mɑn nɑnum mwɑ. 3 Yen sɔ̃nɑ nɑ woodɑ yɑrɑ nɑ nɛɛ, Bɑbilonin bwisigibu kpuro bu mɛnnɑmɑ nɛn mi kpɑ bu mɑn dosu ge tubusiɑ. 4 Yerɑ dobo dobogibu kɑ sɔrobu kɑ bũu sinɑmbu kɑ Bɑbilonin bwisigibu bɑ nɑ. Nɑ bu dosu ge sɔ̃ɔwɑ, ɑdɑmɑ bɑ kpɑnɑ bu mɑn gu tubusiɑ. 5 Yen biru, Dɑniɛli wi bɑ sokumɔ kɑ nɛn bũun yĩsiru Bɛlitɑsɑɑ u nɑ. N deemɑ bũu geebɑ[a] kɑ nùn wɑ̃ɑ. Mɑ nɑ nùn nɛn dosu ge sɔ̃ɔwɑ. 6 Nɑ nɛɛ, wi, wi u sɑ̃ɑ bwisigibu kpuron wirugii, nɑ yɛ̃ mɑ bũu geebun hunde yɑ nùn wɑ̃ɑsi. Yen sɔ̃, ɑsiri gɑɑ sɑri ye yɑ kɑ nùn sɛ̃. Nɛn dosu ge wee. U mɑn gu tubusio. 7 Sɑnɑm mɛ nɑ kpĩ, ye nɑ dosɑ wee.

Dɑ̃ru gɑrɑ nɑ wɑ tɑ yɔ̃ hɑnduniɑn suunu sɔɔ.

Dɑ̃ɑ te, tɑ gunu too.

8 Mɑ tɑ dɑm mɔ.

Ten gunum mu sosi sere mu wɔllu girɑri.

Hɑnduniɑn goonu nnɛgibu kpuro bɑ tu wɑɑmɔwɑ.

9 Ten wurusu wɑ̃

mɑ tɑ mɑrɑ siki siki nge gɑndiɑ.

Te sɔɔrɑ hɑnduniɑgibu kpuro bɑ rɑ ben dĩɑnu wɑ.

Ten sɑɑrɔwɑ gbeeku yɛɛ yi rɑ sɔ̃ɔ sure.

Ten kɑ̃ɑsi wɔllɔwɑ gunɔsu su sokunu sɑ̃ɑ.

Te sɔɔrɑ hunde koni bɑɑyere yɑ rɑ yen dĩɑnu wɑ.

10 Mɑ nɑ Gusunɔn gɔrɑdo goo wɑ u sɑrɑmɑ wɔllun di. 11 U nɔɔgiru suɑ u nɛɛ,

i dɑ̃ɑ te kĩiyɔ i surɑ

kpɑ i ten kɑ̃ɑsi bɔɔri bɔɔri.

I ten wurusu wɔko

kpɑ i ten mɑrum sɔri i yɑri.

Kpɑ gbeeku yɛɛ yi duki su sɑɑ ten sɑɑrun di.

Kpɑ gunɔsu su se sɑɑ ten kɑ̃ɑsin di.

12 Adɑmɑ i ten koo kpiriru derio tem sɔɔ

kɑ ten gbini yɑkɑsɔ

tɑ n bɔkuɑ kɑ sisu kɑ sii gɑndun yɔni.

Kpɑ tɑ n dirum soore

tɑ n yɑkɑsu dimɔ nge gbeeku yɛɛ.

13 Bu tu tɔnun bwisikunu wunɑrio.

Kpɑ bu tu gbeeku yɑɑn bwisikunu dokeɑ.

Kpɑ tɑ n sɑ̃ɑ mɛ wɔ̃ɔ nɔɔbɑ yiru.

14 Woodɑ ye, yɑ weewɑ sɑɑ Gusunɔn gɔrɑdobɑn min di kpɑ tɔmbu kpuro bu kɑ giɑ mɑ Wɔrukoowɑ u bɑnnu kpuro nɛni. Wi u kĩwɑ u rɑ nu wɛ̃. U rɑ wi bɑ ǹ mɑm gɑrisi gɑ̃ɑnu wɔlle sue.

15 Dosu gerɑ mi, ge nɛ, Nɛbukɑnɛsɑɑ nɑ dosɑ. Tɛ̃, wunɛ Bɛlitɑsɑɑ, ɑ mɑn gu tubusio domi bwisigii be bɑ wɑ̃ɑ nɛn tem mɛ sɔɔ kpuro bɑ kpɑnɑ bu mɑn gu tubusiɑ. Adɑmɑ wunɛ, kɑɑ kpĩ yèn sɔ̃ bũu geebɑ kɑ nun wɑ̃ɑ.

Dɑniɛli u dosu ge tubusiɑ

16 Yerɑ Dɑniɛli wi bɑ mɑɑ sokumɔ Bɛlitɑsɑɑ u nɑndɑ. Mɑ u biti soorɑ sɑɑ fiiko. Mɑ Nɛbukɑnɛsɑɑ u nɛɛ, Bɛlitɑsɑɑ, ɑ ku de dosu ge, kɑ gen tubusiɑnu nu nun biti ko.

Dɑniɛli u wisɑ u nɛɛ, yinni, dosu gen tubusiɑnu nu kɑ wunɛn yibɛrɛbɑ nɛrɑ. 17 A dɑ̃ru wɑ tɑ kpɑ̃. Mɑ tɑ dɑm mɔ. Ten gunum mu girɑri wɔllɔ. Mɑ bɑ tu wɑɑmɔ hɑnduniɑ girɑ kpuro. 18 Ten wurusu wɑ̃. Mɑ tɑ binu mɑrɑ siki siki. Mɑ hɑnduniɑgibu kpuro bɑ ben dĩɑnu wɑɑmɔ te sɔɔ. Gbeeku yɛɛ yi rɑ n wɑ̃ɑ ten sɑɑrɔ. Gunɔsu su mɑɑ sin sokunu mɔ ten kɑ̃ɑsi wɔllɔ. 19 Dɑ̃ɑ te, tɑ sɑ̃ɑwɑ wunɛ sinɑ boko. Domi ɑ kpɛ̃ɑ ɑ dɑm kuɑ mɑ mu wɔllu girɑri. Mɑ wunɛn bɑndun dɑm mu sɔ̃ɔsirɑ hɑnduniɑn goonu nnɛ sɔɔ. 20 Yen biru, ɑ Gusunɔn gɔrɑdo goo wɑ u sɑrɑmɑ wɔllun di mɑ u nɛɛ, i dɑ̃ɑ te kĩiyɔ i surɑ tu kɑm ko. Adɑmɑ i ten koo kpiriru derio tem sɔɔ mi, kɑ ten gbini tɑ n bɔkuɑ kɑ sisu, kɑ sii gɑndun yɔni yɑkɑsu mi. Kpɑ tɑ n dirum soore tɑ n yɑkɑsu dimɔ nge gbeeku yɛɛ sere wɔ̃ɔ nɔɔbɑ yiru. 21 Nɛn yinni, dosu gen tubusiɑnu wee. Wɔrukoowɑ u nun win himbɑ sɔ̃ɔsi ye u kuɑ wunɛn sɔ̃. 22 Bɑ koo nun girɑ tɔmbun suunu sɔɔn di. Kpɑ ɑ n wɑ̃ɑ kɑ gbeeku yɛɛ sɑnnu. Kpɑ ɑ yɑkɑsu di nge nɑɑ, ɑ n dirum soore sere wɔ̃ɔ nɔɔbɑ yiru sere ɑ kɑ giɑ mɑ Wɔrukoowɑ u bɑnnu kpuro nɛni. Wi u kĩwɑ u rɑ mɑɑ nu wɛ̃. 23 Woodɑ ye bɑ wɛ̃ bɑ nɛɛ, bu dɑ̃ɑ ten koo kpiriru kɑ ten gbini derio mi, yen tubusiɑnɑ bɑ koo nun wunɛn bɑndu wesiɑ sɑɑ ye ɑ wurɑ mɑ Wɔrukoowɑ u bɑnnu kpuro nɛni. 24 Yen sɔ̃, sinɑ boko, ɑ de ɑ nɛn gere wurɑ. A de ɑ geɑ ko ɑ kɑ wunɛn durum wunɑ. A dɑɑ kɔ̃sɑ kpuro derio kpɑ ɑ sɑ̃ɑrobu wɔnwɔndu kuɑ. Sɑɑ yerɑ wunɛn ɑlɑfiɑ yɑ koo dɑkɑɑ dɑ.

Dosu gen gɑri yi koorɑ

25 Yenibɑ kpuro yɑ sinɑ boko Nɛbukɑnɛsɑɑ deemɑ. 26 Ye n kuɑ suru wɔkurɑ yirun biru, sɔ̃ɔ teeru yerɑ u sĩimɔ win dii tɛɛrɑ wɔllɔ Bɑbiloniɔ. 27 Mɑ u nɛɛ, Bɑbiloni wee, wuu bɔkɔ ge nɑ bɑnɑ kɑ nɛn tiin dɑm gɑ n kɑ sɑ̃ɑ nɛn sinɑ kpɑɑru. Gɑ mɑɑ nɛn yiiko kɑ nɛn bɛɛrɛ sɔ̃ɔsimɔ.

28 Sɑnɑm mɛ sinɑ boko u gɑri yi gerumɔ u ǹ kpɑ, yerɑ nɔɔ gɑgɑ nɔɔrɑ wɔllun di gɑ nɛɛ, sinɑ boko Nɛbukɑnɛsɑɑ, ɑ swɑɑ dɑkio ɑ nɔ. Bɑ nun bɑndu yɑrɑ. 29 Bɑ koo nun girɑ tɔmbun suunu sɔɔn di. Kpɑ ɑ n wɑ̃ɑ kɑ gbeeku yɛɛ sɑnnu kpɑ ɑ n yɑkɑsu dimɔ nge nɑɑ sere wɔ̃ɔ nɔɔbɑ yiru sere ɑ kɑ wurɑ mɑ Wɔrukoowɑ u bɑnnu kpuro nɛni. Wi u kĩwɑ u rɑ mɑɑ nu wɛ̃.

30 Yɑnde gɑri yi, yi Nɛbukɑnɛsɑɑ deemɑ. Bɑ nùn girɑ tɔmbun suunu sɔɔn di. Mɑ u yɑkɑsu dim wɔri nge nɑɑ u dirum soore. Mɑ win seri dɛnyɑ nge gunɔ bɑkerun sɑnsu. Mɑ win nii kɔkɔsu su dɛnyɑ nge gunɔgisu.

Nɛbukɑnɛsɑɑ

u mɑɑ wure u kuɑ tɔnu

31 Mɑ Nɛbukɑnɛsɑɑ u nɛɛ, ye sɑɑ ye, yɑ doonɑ, yerɑ nɑ nɔni seeyɑ wɔllɔ. Mɑ nɛn bwisikunu wure nu kuɑ tɔnuginu. Mɑ nɑ Wɔrukoo siɑrɑ kɑ bɛɛrɛ wi u wɑ̃ɑ sere kɑ bɑɑdommɑɔ. Wiyɑ u yiiko kpuro mɔ. Win sinɑndɑ kun nɔru mɔ. Win bɑndu tɑ ko n wɑ̃ɑwɑ sere kɑ bɑɑdommɑɔ. 32 Bɑɑ hɑnduniɑn tɔmbu kpuro bɑ̀ n mɛnnɑ, ben dɑm kun sɑ̃ɑ gɑ̃ɑnu win nɔni sɔɔ. U rɑ ko nge mɛ u kĩ win gɔrɑdobɑn suunu sɔɔ kɑ tɔmbun suunu sɔɔ. Goo sɑri wi u koo kpĩ u win nɔmu dɛbɑ ǹ kun mɛ u nùn sɔ̃ u nɛɛ, mbɑ u mɔ̀ mɛ.

33 Sɑnɑm mɛ nɛn lɑɑkɑri yɑ wurɑmɑ, yerɑ bɑ mɑɑ mɑn nɛn bɛɛrɛ kɑ nɛn girimɑ kɑ nɛn bɑndun yiiko kpuro wesiɑ. Nɛn bwisi kɛ̃ɔbu kɑ nɛn sinɑ ɑsɑkpɔbu kpuro bɑ nɑ nɛn mi bɑ mɑn nɛn bɑndu wesiɑ. Mɑ ten dɑm mu sosi mu kerɑ yellu. 34 Tɛ̃, nɛ Nɛbukɑnɛsɑɑ, nɑ wɔllun sinɑ boko siɑrɑ kɑ bɛɛrɛ. Nɑ nùn wɔlle suɑ. Domi ye u mɔ̀ kpuro yɑ sɑ̃ɑwɑ geɑ. Win swɛɛ kpuro yi sɑ̃ɑwɑ dee dee. U koo mɑm kpĩ u be bɑ tii suɑmɔ kɑwɑ.

<- Dɑniɛli 3 Dɑniɛli 5 ->