Sofoni 3

3

Yelusalɛũ

1 Waiyoo mɛɛwia gbãamↄnɛdeↄ!

A gbɛ̃́ↄ swã́ gbãa mɛ́ aa gbãlɛa.

2 Aali gbɛ̃e yã́ sio,

aali lɛdama mao.

Aa Dii náai vĩo,

aali sↄ̃ ń Luazio.

3 Mɛɛwiapi kíaↄ dɛ

lán nↄ̀ↄmusu fɛ̃awa,

a yãgↄ̃gↄ̃naↄ dɛ lán àwalɛwan

oosiɛlɛ pↄ́ aali pↄe to gu dↄ̀wàoↄwa.

4 A ãnabiↄá yãbↄlɛnaↄnɛ,

náaisaideↄnɛ.

A sa'onaↄ ì Dii pↄ́ↄ gbãlɛ,

aaì aà ikoyã ↄ̃̀ↄkpa.

5 Dii ku wɛ̃́lɛpi guu,

a maa, ìli vãikɛo.

Lá gu lɛ́ dↄ ìↄ yã́zɛde danɛ́,

ìli fu bauo.

Ń beeo dↄ̀ↄsaideↄ líↄ wí dↄ̃o.

6 Ma buieↄ bãdɛ̀,

ma ń bĩ́i gulɛsĩↄ dɛɛlɛmpà.

Má tò an wɛ̃́lɛↄ gↄ̃̀ bɛziaↄ ũ,

wìli a zɛ́kpaaↄ sɛ lↄo.

Wa ku we lↄo, baa do.

7 Ma mɛ̀ Yelusalɛũdeↄ ma vĩa vĩ,

aa ma lɛdama sio lé?

Tó màa no, má ń mɛɛwia dúuzↄ̃

ń yã́ pↄ́ má dìlɛ mà mↄɛ̀ↄ píiɛ.

Ń beeo an mɛ wã̀ ń yãdↄↄsaikɛao.

8 Ma Dii ma mɛ̀, à sↄ̃́amazi

e gↄↄ pↄ́ má fɛlɛ bↄbↄńnↄ.

Asa má dìlɛ mà buiↄ kãaa,

mà bùsu píi gbɛ̃́ↄ naaa,

mí a pↄkpɛ̃nɛ bↄbↄmá,

baa ma pↄkũma pãsĩ píi.

Ma zafɛ̃a tɛ́ i kũ dṹniawa píi.

9 Bee gbɛa má gbãbↄ gbɛ̃́ↄ lɛ́ɛ,

kɛ́ ampii aa ma sísi,

aai zↄblemɛɛ ń lɛdoũo.

10 Za Etiopi swaↄ baale

ma sìsina pↄ́ fãaaaↄ mↄmɛɛ ń gbaↄ.

11 Gↄↄ bee wí a á kṹ

tàae pↄ́ á kɛ̀mɛɛ yãaↄ yã́ musuo,

asa ĩ́andãna pↄ́ aaì ńzĩa sɛ lɛsĩↄ

ↄ̃ má ń bↄlɛ á wɛ̃́lɛɛ bee guu.

Á ázĩa sɛ lɛsĩ ma gbɛ̀sĩsĩ

pↄ́ a kua adoa musu lↄo.

12 Má taasideↄ ń wɛ̃nadeↄ to wɛ̃́lɛɛ bee guu,

gbɛ̃́ pↄ́ aaì namaziↄ.

13 Isaili kↄ̃napiↄ gbɛ̃́ↄ wɛtã lↄo,

aa gbɛ̃́ↄ sã́são,

mɛ́ wa ɛɛ ma dↄ ń lɛ́uo.[a]

Aali pↄble, aali wúlɛ,

gbɛ̃e yã́ a ń vĩakũo.

14 Siↄnadeↄ, à gulakɛ!

Isailiↄ, à kúkuakɛ!

Yelusalɛũdeↄ, à wiilɛ ń pↄnao!

15 Dii á bↄ́ yã́kpalɛu,

a tò á wɛ̀lɛↄ kpɛkpà.

Dii á Isailiↄ kía kú á guu,

áↄ yãe vĩa vĩ lↄo.

16 Gↄↄbeezĩ wa mɛ:

Yelusalɛũdeↄ, ásu to vĩa á kũo,

Siↄnadeↄ, á ↄ su gↄ̃ dↄ̀lↄlↄo.

17 Dii á Lua kú á guu

gↄ̃sa pↄ́ ì ń suaba ũ.

A koo pũna á yã́ musu ń pↄnao,

a á gba wɛ̃ni dafu a yeaázi guu.

A pↄnakɛ á yã́ musu ń gulakɛao,

18 lá wì kɛ dikpɛgↄↄwa.

Ma Dii ma mɛ̀, má á aso pilaɛ́,

má á bↄ sↄ̃́sↄ̃au.

19 Gↄↄ bee má yãkɛ

gbɛ̃́ pↄ́ gbãamↄ̀ɛ́ↄnɛ.

Má á gbɛ̃́ tↄ̃̀ↄlɛnaↄ misi,

má á gbɛ̃́ pↄ́ wà ń yáↄ kãaa.

Bùsu pↄ́ wà widàuwáↄ guu píi,

má á tↄbↄu, má á kpɛla.

20 Zĩbeezĩ má á kãaa,

gↄↄbeezĩ má suánↄ, mí á tↄbↄ.

Má á kpɛla dṹnia gbɛ̃́pii wáa,

má suánↄ á pá ziu, á wɛsiɛ.