Soũↄ 40

40

Dii sáaukpaa

1 Davidi lɛ.

2 Ma wɛdↄ̀ Diizi maamaa,

ↄ̃ à ma wɛgwà à ma wiilɛa mà.

3 À ma bↄ gbã́o kↄ̃fĩde guu,

à ma si dɛɛwa.

À ma gbá pɛ̀lɛ gbɛsi musu,

à ma zɛ we gíũgiũ.

4 À lɛ̀ dafu dà ma lɛ́u,

wá Lua táasilɛa pↄ́ ũ.

Gbɛ̃́ↄ e dasi, vĩa i ń kṹ,

aai Dii náaikɛ.

5 Báaaden gbɛ̃́ pↄ́ Dii náai vĩ

mɛ́ ìli zɛ ń waladeↄ ń tã́agbagbanaↄo ũ.

6 Dii ma Lua, n yãbↄnsaɛkɛaↄ dasi,

wa fↄ̃ yã́ pↄ́ ńlɛ yáwanↄↄ dↄdↄo.

Tó má dàu lɛ́ siunɛ́,

a lɛ́ vĩo, má fↄ̃ o píio.

7 Ń ye sa'obↄ ge gbaio,

ↄ̃ ń tò ma swã́ mà.

Ni sa pↄ́ wì a pↄ́ kátɛu à tɛ́kũ

ge duun awakpabↄ gbɛao.

8 Ɔ̃ ma mɛ̀: Má kɛ́!

Lá a ku lá guu ma yã́ musuwa.

9 Má ye n pↄeã kɛaiɛ, ma Lua,

n ikoyã ku ma sↄ̃ guu.[a]

10 Má yã́zɛde baokpa balu guu,

má a lɛ́ kpaaũo lá ń dↄ̃wà Dii.

11 Lá ni yãnakpámá, má nílɛo,

má n náai ń n gbɛ̃suabaao yã'o.

Má gí n gbɛ̃kɛ ń n sĩandekɛo oi balu guuo.

12 Dii, ńsu gí ma wɛ̃nagwaio,

to n gbɛ̃kɛ ń n sĩandekɛo ma dↄ̃́a.

13 Asa vãi pↄ́ liaamazi lɛ́ vĩo,

ma tàaeↄ dàmala, má fↄ̃ gu'eo,

a dasi dɛ ma mikãa, sↄ̃ kɛ̃̀magu.

14 Dii, suɛ, ma misi,

Dii, kɛ kpakpa, mↄ dↄmalɛ.

15 To wí ma wɛnaↄ kṹ,

aa ń mi pɛlɛ.

To gbɛ̃́ pↄ́ ye mà yã'eↄ kpɛkpa,

an gɛɛ gↄ̃ kpá ń wɛ́i.

16 Gbɛ̃́ pↄ́ aaì omɛɛ, tàalɛ, tàalɛↄ,

to wí gↄ̃ ń ú ũ.

17 Gbɛ̃́ pↄ́ aalɛ n kĩ́i wɛɛlɛↄ,

to an pↄ kɛma na aa yáalↄ.

Gbɛ̃́ pↄ́ an wɛ́ dↄi ǹ ń suabaↄ,

aaↄ o láasai Dii zↄ̃ↄ.

18 Taaside wɛ̃naden ma ũ,

làasookɛ ma yã́wa, Dii.

Ḿmɛ ń ma Dↄnlɛde ũ,

ma Mìsina ũ.

Ma Lua, ńsu gɛ̃gɛ̃o.

<- Soũↄ 39 Soũↄ 41 ->