6
Fĩa ń màao ń gbɛ̃nazĩn pão yã́
1 Ma nɛ́, tó n n gbɛ̃do fĩa dì n miwa,
tó n kpɛ́gaausì gbɛ̃́ɛ,
2 tó n lɛ́ n kalikɛ̃̀,
tó n yã'oa n dayãu,
3 lá ńyↄ̃ kɛn la ma nɛ́: Lɛbↄ yã́piu,
asa n na n gbɛ̃do ↄzĩɛ.
Gɛ ǹyↄ̃ zɛzɛ n gbɛ̃dopizi,
awakpaɛ̀.
4 Ńsu to i gɛ̃ n wɛ́uo,
ńsu to n wɛ́baa gbiakũo,
5 ǹ nzĩa siwà
lá tue ì ń kɛ̃́wa,
lá bã ì bↄ fíikpana ↄuwa.
6 Zígbiade, gɛ́ bↄↄna gwai,
ní aà yãkɛa tàasika, ńyↄ̃ ↄ̃nↄkũ.
7 A dↄaana vĩo,
a gbɛ̃zↄ̃ↄ ge dii vĩo.
8 Ì blɛ kũ̀sũa di saɛ,
ì a pↄblea kãaa pↄkɛkɛgↄↄ.
9 Màade, ńyↄ̃ↄ wúlɛa e bↄɛ ni?
Bↄɛ ńyↄ̃ vu ń ioi?
10 Ni kã́mabo yↄↄ, ni i'o yↄↄ,
ni wúlɛ yↄↄ ↄkpaa n kùɛ.
11 Pↄ́ taasi a gɛ̃nzi lán kpã́iwɛliwɛwa,
nↄana a mↄma lán gbɛ̃́ pↄ́ gↄ̃kɛbↄ kũawa.
12 Gbɛ̃nazĩn pãá gbɛ̃vãiɛ,
ìↄ bɛbɛ ń ɛɛo dↄ a lɛ́u.
13 Ì yã'o ń wɛ́o ń ↄo,
ì seelakɛnɛ́ ń gbáo.
14 Mↄafili mɛ́ aà nↄ̀sɛ pà,
vãi wàai ↄ̃ ìↄ pa gↄↄpii.
15 Bee yã́i músi a mↄwà lɛzasai,
kaaũ a gɛ̃aàzi kã́ndo, aↄ fɛlɛa vĩo.
16 Yã́ mɛ̀n soolo ku kɛ́ Dii zau,
à kà se sopla kɛ́ a ye a gĩyãio.
17 Káakua, ɛɛtoa, yãesaidedɛa,
18 yãpãsĩ wàaipaa, wãa ń vãio,
19 seelade ɛɛtoa ń daɛↄ pɛãaao.
Laaikaa gbãsĩkɛai
20 Ma nɛ́, ǹyↄ̃ n mae yãdilɛaↄ kũa,
ńsu pãkpa n da yãdanɛio.
21 Ǹyↄ̃ kũa n sↄ̃u gↄↄpii,
ǹyↄ̃ daa yàbaa ũ.
22 A dↄaanɛ n táa'oa guu,
a n dↄ̃́a n wúlɛa guu.
Tó n vu, ali lɛdama.
23 Asa yãdilɛapiↄá filiaɛ,
yãdanɛpiá gupuaɛ,
lɛdama ń leleaoá zɛ́ wɛ̃nideɛ.
24 A n si nↄɛ vãiwa,
a n bↄ nↄɛ pãle yã́ nana oanɛu.
25 Ńsu ǹ aà kɛfɛnkɛ nidɛo,
ńsu to aà gↄ̃gwawɛ n kũo.
26 Káalua ì ń gↄ̃ gii,
gbɛ̃pãle nↄ yã́ sↄ̃ ì ń bɛɛɛ midɛ.
27 Tó gbɛ̃́ tɛsɛ dà a pↄlɛu,
aà pↄkasa a gí tɛ́kũie?
28 Tó gbɛ̃́ kɛ̀sɛpɛ̀lɛ tɛyↄ̃wa,
a na aà gbáwao lé?
29 Màaɛ ń gbɛ̃́ pↄ́ gɛ̃̀ a gbɛ̃́dee nↄ yã́uo,
asa tó à ↄnàwà, a bↄ pão.
30 Tó nↄa lɛ́ gbɛ̃dɛ, tó à kpã́i'ò,
wì a yã́ dilɛ pãe?
31 Tó wà aà kũ̀, a fĩabo lɛɛ sopla,
i pↄ́ pↄ́ a vĩ a ua kpa píi.
32 Gbɛ̃́ pↄ́ ì wúlɛ ń pãle nↄo làasoo vĩo,
gbɛ̃́ pↄ́ ì bee kɛ lɛ́ azĩa ↄ̃̀ↄkpaɛ.
33 Gbɛ̃a gbãa ń kpɛbↄao mɛ́ aà baa ũ,
aà tↄ́ ĩ́i a kɛ̃wào.
34 Asa íbɛlɛ a aà zã́ nↄ̀sɛ fɛlɛ,
i tↄsiwà aà wɛ̃nagwasai.
35 A awakpabↄe sio,