3
Dii náaikɛa ì ↄ̃nↄ inɛ́
1 Ma nɛ́, ńsu to ma yãdanɛ sãnguo,
ǹyↄ̃ yã́ pↄ́ má dìlɛnɛↄ kũa n sↄ̃u.
2 Asa a n ka wɛ̃ni gbã̀awa,
a aafia kã́fĩnɛ.
3 Gbɛ̃kɛ ń náaio su kɛ̃mao,
ǹyↄ̃ daa yàbaa ũ,
kɛ̃ n sↄ̃wa lá wì kɛ̃ lákɛ̃kĩiwawa,
4 n tↄ́ iↄ na,
níↄ maa Luaɛ ń gbɛ̃nazĩnaↄ.[a]
5 Dii náaikɛ ń nↄ̀sɛmɛndoo,
ńsu gbãa'e nzĩa ↄ̃nↄwao.
6 Ǹyↄ̃ aà dↄ̃ n yã́ píi kɛa guu,
i zɛpoonɛ.
7 Ńsu ǹ nzĩa gwa ↄ̃nↄna ũo,
ǹyↄ̃ Dii vĩa vĩ, ní kɛ̃́ vãiwa.[b]
8 Bee aↄ dɛ n mɛ aafia ɛsɛ ũ,
a n wá gba gbãa.
9 Dii kpɛla ń n àizɛɛo
ń n buapↄ́ káauↄ píi,
10 pↄ́wɛnaↄ i bi bↄ n dↄ̃u,
n selaↄ i pa yɛlɛlɛ ń vɛ̃ɛ dafuo.
11 Ma nɛ́, tó Dii n toto, ńsu dilɛ pão,
tó à n gba laai, ńsu to à kɛnɛ ĩ́io.[c]
12 Asa gbɛ̃́ pↄ́ Dii yei ↄ̃ ì dazɛwa,
lá mae ì kɛ a nɛ́ pↄ́ kɛ̀ɛ maaɛwawa.[d]
Ɔ̃nↄ ài
13 Báaaden gbɛ̃́ pↄ́ ↄ̃nↄ le kũ̀
mɛ́ dↄ̃a pàɛ̀ ũ.
14 Asa a ài vĩ dɛ ã́nusua,
ì kã́fĩakɛnɛ́ dɛ vuaa.
15 A bɛɛɛ vĩ dɛ òsoa,
pↄ́ pↄ́ a ni kumaↄ kee i kawào.
16 Wɛ̃ni gbã̀a ku aà ↄplaau,
àizɛɛ ń gawio ku aà ↄzɛɛu.
17 Aà yã́ↄ kɛkɛá na,
aà zɛ́ píi aafia vĩ.
18 A dɛ lí wɛ̃nide ũ gbɛ̃́ pↄ́ kũaↄnɛ,
báaadeↄn gbɛ̃́ pↄ́ sìↄ ũ.
19 Dii gↄ̃ikɛ guu à tↄↄlɛ kàlɛ,
aà ↄ̃nↄ guu à musu kɛ̀.
20 À ísia ɛ bↄ̀ a dↄ̃a guu,
a tò luabɛpuana mↄ̀sɛ vĩ.
21 Ma nɛ́, ǹyↄ̃ wɛzɛ̃ ń ↄ̃nↄo vĩ,
ńsu ǹ wɛvĩao.
22 Aↄ dɛ n nisĩna wɛ̃ni ũ,
aↄ dɛ yàbaa ũ n nↄɛ.
23 Ńyↄ̃ↄ bɛ n laaiwa,
pↄe a kpàlikpanɛo.
24 Tó n wulɛ, vĩa a n kũo,
ńyↄ̃ wúlɛ i'o na.
25 Ńyↄ̃ kai vĩakɛo,
ge músi pↄ́ ì vãikɛnaↄ le kã́ndo.
26 Asa Dii aↄ dɛ n mikpakĩi ũ,
a n gbá vĩ kaia.
27 Tó n ↄ lɛ́ n kpɛ le,
ńsu gí maakɛi gbɛ̃́ pↄ́ kũ̀ ǹ kɛɛ̀ɛo.
28 Tó n dↄnlɛ zɛ́ vĩ,
ńsu o n gbɛ̃́deeɛ aà gɛ́ e ziao.
29 N gbɛ̃́dee pↄ́ kú n saɛ dↄdↄa,
ńsu lɛkpaaĩaàzi ń gbɛ̃eoo.
30 Tó gbɛ̃́ i yãe kɛnɛo,
ńsu lɛkpaakɛaànↄ pão.
31 Ńsu gbãamↄnɛdeↄ kua nidɛo,
ńsu ǹ ń kɛae kɛo.
32 Asa Dii ye kↄ̃nideↄ gĩyãio,
nↄ̀sɛpuadeↄ ↄ̃ ì kɛ a kpàasiaↄ ũ.
33 Dii ì láaizĩ gbɛ̃vãiↄ uawa,
ì báaada gbɛ̃maaↄ bɛu.
34 Ì gbɛ̃́laanikɛnaↄ láanikɛ,
a gbɛ̃kɛ vĩ ń zĩabusanaↄ.[e]
35 Ɔ̃nↄde a bɛɛɛ e,