Yáasiↄ 28

1 Vãikɛna ì bàalɛɛ, baa tó wàlɛ aà yao,

gbɛ̃maa ìↄ wↄ́ↄ vĩ lán nↄ̀ↄmusuwa.

2 Tó duuna kↄ̃̀ bùsuu, a kíaↄ ìↄ dasiɛ.

Gbɛ̃́ pↄ́ wɛzɛ̃ ń dↄ̃ao vĩ ì to yã́zɛde àↄ ku.

3 Kía pↄ́ ì ĩada yɛ̃̀ɛɛsaideↄwa

dɛ lán lou pↄ́ ì kwɛ à blɛ ↄ̃̀ↄkpawaɛ.

4 Ikoyãdansaiↄ ì gãga vãikɛnaↄnɛ,

ikoyãdanaↄ sↄ̃ aaì bↄ ń kpɛɛ.

5 Gbɛ̃vãiↄ yã́zɛde gbadↄ̃o,

gbɛ̃́ pↄ́ lɛ́ Dii aɛyaↄ dↄ̃ wásawasa.[a]

6 Taaside tàaesaide maa

dɛ ↄde yãkpaanlakɛnala.

7 Nɛ́ ikoyãdana wɛ́ kɛ̃a,

lalasideↄ gbɛ̃na ì wida a maewaɛ.

8 Gbɛ̃́ pↄ́ ì a àizɛɛ kã́fĩ ↄ'igbaa ń àiwɛɛlɛa zↄ̃ↄo guu

lɛ́ pↄ́ kãaa gbɛ̃́ pↄ́ ì taasideↄ wɛgwaɛɛ.

9 Gbɛ̃́ pↄ́ ì ikoyã kpá swã́a,

Lua líↄ ye aà wabikɛawa gĩyãio.

10 Gbɛ̃́ pↄ́ ì gbɛ̃maaↄ da zɛ́ vãiwa,

a lɛ́lɛ da azĩa baiuɛ,

tàaesaideↄ sↄ̃ aa bↄ maa.

11 Ɔde ì azĩa dilɛ ↄ̃nↄna ũɛ,

kási taaside wɛzɛ̃na ì aà ↄ̃nↄ dↄ̃wàɛ.

12 Tó gbɛ̃maaↄ kúkua dↄ, gbɛ̃́pii ìↄ ĩ́anadãɛ,

tó vãikɛnaↄ gbãakũ̀, baade ìↄ mikpaguiɛ.

13 Tó n n tàaeↄ ùlɛ, ńyↄ̃ gɛ́ aɛo,

tó ń ò mɛ́ ń tò, Lua a n wɛ̃nagwa.[b]

14 Báaaden gbɛ̃́ pↄ́ Dii vĩa vĩ ũ.

Swã́gbãade sↄ̃ ì lɛ́lɛ da taasiu.

15 Gbɛ̃vãi pↄ́ ì kible yɛ̃̀ɛɛsaideↄwa

dɛ lán nↄ̀ↄmusu pũnaawaɛ,

lán gbɛaana kusiamáwa.

16 Dↄaana pↄ́ ì gbɛ̃́ wɛtã wɛ́ kɛ̃ao,

gbɛ̃́ pↄ́ za ↄvãi'eau wɛ̃ni ìↄ gbã̀a.

17 Gbɛ̃dɛna pↄ́ a làasoo lɛ́ ĩadawa

aↄ bàalɛ e a gɛ gaòɛ.

Gbɛ̃e su kpaɛ̀o.

18 Gbɛ̃́ pↄ́ ì yãkɛ a zɛ́wa aↄ aafiaɛ,

yãdↄↄsaikɛna sↄ̃ a ɛɛ kã́ndoɛ.

19 Gbɛ̃́ pↄ́ ì laaidↄ a buazĩwa ìↄ kãa,

gugiiyana sↄ̃ ìↄ ku pↄ́kɛ̃sãma guuɛ.

20 Lua a báaada náaidegu maamaaɛ,

gbɛ̃́ pↄ́ lɛ́ wã à kɛ ↄde ũ a bↄ pão.

21 Gbɛ̃bↄbↄa'ↄsi maao,

kási gbɛ̃́ a tàaekɛ pɛ̃ɛ miↄna yã́i.

22 Bĩide mɛ́ ì wã ń àizɛɛ'eao,

ìliↄ dↄ̃ kɛ́ taasi a a leo.

23 Gbɛ̃́ pↄ́ gbɛ̃́ gbà laai ìↄ naaànↄ

dɛ gbɛ̃́ pↄ́ aà tↄnasìla.

24 Gbɛ̃́ pↄ́ a de ń a dao kpã́i'ò,

mɛ́ àlɛ mɛ tàae no,

ade doũ ń kpã́iwɛliwɛoɛ.

25 Gbɛ̃́ pↄ́ wɛ́kaka vĩ ì sòle daɛ,

gbɛ̃́ pↄ́ Dii náai vĩ mɛ́ a mɛkpa.

26 Gbɛ̃́ pↄ́ lɛ́ azĩa náaikɛá sↄũɛ,

gbɛ̃́ pↄ́ kú ↄ̃nↄ'ↄ̃nↄ mɛ́ a bↄ maa.

27 Pↄ́ lí kɛ̃́sã gbɛ̃́ pↄ́ ì taasideↄ gba pↄ́wao,

wì gbɛ̃́ pↄ́ ì wɛvĩńla kaɛ.

28 Tó vãikɛnaↄ gbãakũ̀,

baade ìↄ mikpaguiɛ.

Tó aa gàga, gbɛ̃maaↄ ì liguaɛ.

<- Yáasiↄ 27 Yáasiↄ 29 ->