Yáasiↄ 18

18

1 Zĩa pↄeã mɛ́ ì dↄaa gbɛ̃́ pↄ́ ì kɛ̃́máɛ,

ì fɛ̃́ńzi lɛdama píi musu.

2 Sↄũ lí pↄnakɛ wɛzɛ̃ yã́ musuo,

yã́ pↄ́ dɛ̀dɛwà ↄ̃ ì o.

3 Vãikɛa ì mↄ́ ń sakanguoɛ,

kpɛbↄyã ì láani inɛ́.

4 Gbɛ̃nazĩna lɛgbɛ dɛ lán ísiwaɛ,

lán swa'i bàalɛa ge ↄ̃nↄ lↄ̀ↄwa.

5 Kɛa vãikɛnaɛ kɛ̀kɛ

ge yãkɛkɛa yãesaideɛ ↄkpɛai maao.

6 Sↄũ lɛ́ ì aà da sòleu,

aà yã'oa ì aà kpa gbɛ̃ai.

7 Sↄũ lɛ́ ì aà ↄ̃̀ↄkpa,

aà yã'oa ì aà kũ lán baiwa.

8 Gbɛ̃pena yã́ ì kɛnɛ́ lán zↄ́wa,

ì gɛ̃ lɛ́u dↄ̃̀ↄ e nↄ̀sɛ kpɛau.

9 Gbɛ̃́ pↄ́ ì pãkpa a zĩiá músi dãunaɛ.

10 Dii tↄ́á ulɛkĩi lɛsĩɛ,

gbɛ̃maa ì bàalɛ à azĩa yeu.

11 Ɔde àizɛɛ ìↄ dɛɛ̀ wɛ̃́lɛ kàede ũ,

a dɛɛ̀ bĩ́i pↄ́ wa fↄ̃ dɛdɛwào ũ.

12 Zĩasɛa lɛsĩ ì mↄ́ gbɛ̃́ɛ ń lɛ́lɛaoɛ,

zĩabusaa ì mↄ́ ń bɛɛɛo.

13 Gbɛ̃́ pↄ́ ì yã́zãsi yãmasai,

mìsaikɛ ń kpɛbↄao mɛ́ ì gↄ̃ɛ̀.

14 Sↄ̃dilɛa ì gbɛ̃́ gba gbãa gyãpɛwa,

ãma démɛ a pↄsia fↄ̃i?

15 Wɛzɛ̃na ì yãdada a sↄ̃u,

ↄ̃nↄna swã́ ìↄ dↄ dↄ̃ai.

16 Gba pↄ́ gbɛ̃́ dà ì zɛkɛkɛɛ̀,

ì zɛwɛ̃ɛ̀ gbɛ̃zↄ̃ↄↄ kĩ́i.

17 Gbɛ̃́ pↄ́ dↄ̀aa a yã'ò, wì aà yã́zɛ e,

e aà ibɛɛ àↄ gɛ́ aà pↄ́ oi.

18 Yãkɛkɛa gbɛaa Diiwa ń gbɛo

ì sòle midɛ, ì gↄ̃gbãaↄ yoaa.

19 Daɛ pↄ́ wà tàaekɛ̀ɛ̀ yã́ ìↄ gbãa lán bĩ́iwaɛ,

aà sòle dɛ lán zɛ́kakaa ń lɛowaɛ.

20 Yã'oa ì gbɛ̃́ ká kãawa,

aà lɛgbɛ'i ì to pↄ́ mↄ́wà.

21 Ga ń wɛ̃nio ku lɛ́uɛ,

gbɛ̃́ pↄ́ ye yã'oai a a gbɛ'e.

22 Gbɛ̃́ pↄ́ nↄ è pↄmaa è,

báaa bee bↄ̀ Dii kĩ́iɛ.

23 Taaside ì yã'o wɛ̃nawɛ̃na,

ↄde ì yã́zãsi gbã́ugbãu.

24 Gbɛ̃na yàaa ì yãvãi inɛ́ɛ,

gbɛ̃naeↄ ku aaìↄ nańnↄ dɛ ua gbɛ̃́a.

<- Yáasiↄ 17 Yáasiↄ 19 ->