Naokɛa 24

1 Kɛ́ Balaaũ è samaa'oa Isailiↄnɛ kà Diigu, i gɛ́ màsokɛi lↄo, ↄ̃ à aɛdↄ̀ guwaiwaiwa. 2 Kɛ́ à wɛzù, ↄ̃ à Isailiↄ è kálɛa ń buiwa. Lua Nisĩna dìɛ̀, 3 ↄ̃ à yã́ pↄ́ á è ò à mɛ̀:

Bɛↄↄ nɛ́ Balaaũ yã́n kɛ,

ma gbɛ̃́ pↄ́ ma wɛ́ zɛ̃a, ma yã́n kɛ.

4 Ma gbɛ̃́ pↄ́ mi Lua yãma, ma yã́n kɛ:

Ma Gbãapiide wɛ́pungu è,

má kúlɛa, ma wɛ́ kɛ̃a.

5 Yakↄbuↄ bòokpaa maa fá!

Isaili zwã̀akpɛↄ kɛfɛũ!

6 Aa kálɛa lán swadↄↄↄwa,

lán swaluↄwa.

Aa dɛ lán zà lí pↄ́ Dii bàↄwa,

lán sɛdɛ lí pↄ́ kú í saɛↄwa.

7 Í ali ń olaↄ pa yɛlɛlɛɛ,

aali pↄ́tↄ̃ tↄↄlɛ mↄ̀sɛdewaɛ.

An kía gbãa aↄ dɛ Agagala,

an kpala a tↄbↄ.

8 Lua ń bↄ́lɛ Egipi,

aa gbãa vĩ lán zùsɛ̃lɛwa.

Aaì zĩble bui pↄ́ íbɛlɛsɛ̀ńnↄↄwa,

aaì ń wáↄ wíwi, aaì ń pápa ń kaↄ.

9 Aaì gaɛ, aaì wúlɛ lán nↄ̀ↄmusuwa,

démɛ a fↄ̃ ń vui?[a]

Lua báaada gbɛ̃́ pↄ́ aa samaa'onɛ́ↄgu,

aà gbɛ̃́ pↄ́ aa savãi'onɛ́ↄ ká.[b]

10 Balaki pↄ pà Balaaũzi, à ↄtona dↄ̀wà à mɛ̀: Ma ibɛɛↄ kaa yã́i ma n sisii, ↄ̃ n samaa'ònɛ́ gɛ̃n àaↄ̃a? 11 Ta n bɛ gↄ̃̀ↄ. Ma mɛ̀ yãa má n kpɛlaɛ, ↄ̃ Dii gìnɛ ǹ asea e. 12 Balaaũ òɛ̀: Má ò gbɛ̃́ pↄ́ n ń zĩ́aↄnɛɛ fá! 13 Ma mɛ̀, baa tó n ã́nusu ń vua pↄ́ kú n bɛo kpàa píi, má bↄ Dii yã́ kpɛ mà yãkɛ ń mazĩaoo, a maa ge a vãi. Yã́ pↄ́ Dii a omɛɛ ↄ̃ má o. 14 Málɛ tá ma gbɛ̃́ↄ kĩ́i sa. Mↄ mà onɛ lá gbɛ̃́piↄ kɛ n gbɛ̃́ↄnɛ zia.

Balaaũ yã́ síiↄ̃de pↄ́ a è oa

15 Ɔ̃ Balaaũ yã́ pↄ́ á è ò à mɛ̀:

Bɛↄↄ nɛ́ Balaaũ yã́n kɛ,

ma gbɛ̃́ pↄ́ ma wɛ́ zɛ̃a yã́n kɛ:

16 Ma gbɛ̃́ pↄ́ mi Lua yãma, ma yã́n kɛ:

Má Lua Musude pↄeã dↄ̃.

Ma Gbãapiide wɛ́pungu è,

má kúlɛa, ma wɛ́ kɛ̃a.

17 Málɛ Isailiↄ e, i kɛ tia no,

málɛ ń gwa, a gↄↄ i ka gĩao.

Saana a bↄ Yakↄbu buiↄ guu,

kpalablena a bↄ Isailiↄ guu,

i Mↄabuↄ mi wíwi,

i zↄakanapiↄ dↄ́ fↄ̃́fↄ̃.

18 Ɛdↄũ bùsu a gↄ̃ aà pↄ́ ũ,

aà ibɛɛ Sei bùsu a gↄ̃ aà pↄ́ ũ,

Isailiↄ gbãa iↄ kã́fĩɛ.

19 Yakↄbu buie a kiblemá,

a mɛɛwiade pↄ́ bↄ̀ↄ kaalɛ.

20 Balaaũ Amalɛki buiↄ è, ↄ̃ à yã́ pↄ́ á è ò à mɛ̀:

Amalɛki buiↄá buiↄ mideɛ,

kási aa kaalɛ zia.

21 Kɛ́ Balaaũ Keniↄ è, ↄ̃ à yã́ pↄ́ á è ò à mɛ̀:

Á kúkĩi gbãa gíũgiũ,

á sakpɛ kú gbɛ musu.

22 Ń beeo wa á kaalɛɛ,

Asiliↄ mɛ́ aa á kṹkũ zĩ̀zↄↄ ũ.

23 Balaaũ yã́ pↄ́ á è ò lↄ à mɛ̀:

Wàlɛ kↄ̃ kãaa gugbãntoo oi,

24 gó'ilɛnaↄ lɛ́ bↄ Sipi bùsuu,

aa zĩble Asiliↄ ń Ɛbɛluↄwa,

kási ampiↄ kaalɛ sↄ̃ɛ.

25 Balaaũ fɛ̀lɛ tà a bɛ, ↄ̃ Balaki dàzɛu sↄ̃.

<- Naokɛa 23 Naokɛa 25 ->