Yobu 4

4

Gbɛ̃́ pↄ́ Lua ì aà toto mɛ́ báaa vĩ

1 Ɔ̃ Temani gbɛ̃́ Ɛlifaza yã́zãsìwà à mɛ̀:

2 Tó gbɛ̃́ wↄ́ↄ fↄ̃̀ yã'ònɛ, ńyↄ̃ mɛnaòoa?

Asa ma lɛ́ a fↄ̃ àↄ kpaaũao.

3 Gwa, n lɛdà gbɛ̃́ↄwa dasi,

n gbɛ̃́ pↄ́ an yɛ̃̀ɛɛ làaↄ gbà sↄ̃.

4 N yã́ gbɛ̃́ pↄ́ lɛ́ fuↄ sɛ̀ lɛsĩ,

n gbɛ̃́ pↄ́ naalɛaↄ gbà gbãa.

5 Kɛ́ yã́ n le sa sↄ̃, ńlɛ fu,

kɛ́ à n le, ↄ̃ bíli n kũ.

6 N vĩakɛa Luaɛ lí tó n mi àↄ daa íao lé?

N kua tàaesai lí tó n nↄ̀sɛ àↄ daa doũo lé?

7 Làasookɛ!

Démɛ i yãe kɛo, ↄ̃ à mìdɛi?

Gbɛ̃maa ku má ↄ̃ wà aà suumpai?

8 Gbɛ̃́ pↄ́ vãi sa pà à yãkele tↄ̃̀wà,

málɛ e bee mɛ́ ì bↄlɛɛ̀.

9 Lua lɛ́'ĩana ì aà midɛ,

aà pↄbↄa a níu ì aà tↄ̀lↄzↄ̃.

10 Aà kãaa lán nↄ̀ↄmusuwa lɛ́ ì ká,

Lua ì aà swaa ɛ́'ɛɛ̀.

11 Ì ga lán nↄ̀ↄmusu pↄ́ nↄ̀ↄ wɛ̀ɛlɛ kùawàwa,

aà nɛ́ↄ i fãaa.

12 Yã́kpãina mↄ̀a ĩ́ana guu,

yã́pi feena gɛ̃̀ ma swã́u,

13 gↄↄ pↄ́ málɛ nana yàaa o gwãasĩna,

gↄↄ pↄ́ izↄ̃ↄ daa gbɛ̃́ↄla.

14 Vĩa ma kũ, málɛ lualua,

ma mɛ̀ bṹu lɛ́ dee.

15 Ĩana ma oa pà,

ma mɛkã fɛ̀lɛ sĩ̀.

16 À zɛ̀, mi a taa dↄ̃o,

pↄ́pi ku ma aɛ,

ↄ̃ ma aà lↄↄ kpã́ina mà à mɛ̀:

17 Gbɛ̃nazĩna yã́ aↄ na Luaɛe?

Démɛ a fↄ̃ àↄ zɛ̃a a Kɛna aɛi?

18 Lá Lua lí a malaikaↄ náaikɛo,

mɛ́ ì a zↄ̀blenapiↄ tàae e,

19 wa wá gbɛ̃́ pↄ́ wá mɛ dɛ gĩ̀ kpɛ́ ũ,

mɛ́ wá daalɛa dɛ bùsu giina ũ,[a]

wì wá suumpa lán kitolowa pↄ́ oa?

20 Za kↄↄ e oosi gbɛ̃́ↄ ì gaga,

aaì sãalɛ e gↄↄpii, wìli ń fãnkɛo.

21 Lua ì ń kpɛ́pi gbapɛlɛ wolɛnɛ́,

ↄ̃ aaì ga ↄ̃nↄkũsai.

<- Yobu 3 Yobu 5 ->