Ezekiɛli 24

Yelusalɛũ lɛɛũa ń mↄ̀ oo tã́nkpakɛao

1 Wá kua zĩ̀zↄↄ ũ wɛ̃̀ kɛ̃okwide, a mↄ kwide gↄↄ kwide zĩ́ Dii yã'òmɛɛ à mɛ̀: 2 Gbɛ̃nazĩn nɛ́, gↄↄɛ bee dalau, asa gbã Babɛli kía koezↄ̃̀ Yelusalɛũzi.[a] 3 Yãlɛɛũ ń bui swã́yãmansaidepiↄ ǹ onɛ́ ma Dii Lua ma mɛ̀:

À oo ditɛ, í íkau,

4 í nↄ̀ↄ kau,

nↄ̀ↄ maaↄ, a gbá ń a ↄo,

í wá nísideↄ ka à pai.

5 Iↄ dɛ kpàsa nↄ̀ↄ maa ũ,

í yàaka oopi zíɛ,

í disa à ma oopi guu ɛ́lɛ'ɛlɛ.

6 A yã́i ma Dii Lua ma mɛ̀,

waiyoo gbɛ̃dɛn wɛ̃́lɛ,

oo pↄ́ a gbãsĩ gì woloi pi!

À a nↄ̀ↄpiↄ bↄlɛu dodo píi,

kási ásu líkpa a yã́ musuo.

7 Aa gbɛ̃́ↄ dɛ̀dɛ wɛ̃́lɛpi guu,

aa ń au bↄ̀lɛ gbɛsɛɛnawa,

aai kↄ́lɛ tↄↄlɛwa aa bùsukàwào.

8 Má tò aupi gↄ̃̀ gbɛsɛɛnapiwa,

kɛ́ wasu e pↄ́ káwào yã́i,

gbɛ̃́ↄ pↄ i pańzi, aai tↄsimá.

9 A yã́i ma Dii Lua ma mɛ̀,

Waiyoo gbɛ̃dɛn wɛ̃́lɛ!

Mapi, má yàakau zↄ̃ↄzↄ̃ↄ sↄ̃ɛ.

10 À yàakau, í tɛ́ dau.

À nↄ̀ↄpi disa e a í ba,

a wápiↄ i tɛ́kũ.

11 À oo giipi di tɛyↄ̃wa,

kɛ́ à mↄ̀ e wãa kũ tã́utãu,

a gbãsĩ i wolowà,

a kpɛ sia i láa.

12 Oopi tò wà fùwa,

a gbãsĩ zↄ̃ↄ a gowà tɛ́ guuo.

13 N gbãsĩ mɛ́ n dↄ́ɛ'ĩi ũ.

Ńyↄ̃ↄ zɛ̃ao e ma pↄ gɛ́ weeò,

asa má wɛ̀ɛlɛ mà n gbãsĩ woloma,

kási ń ye à wolomao.

14 Ma Dii ma yã'ò, yã́pi lɛ́ mↄ́.

Má yã́pi kɛɛ, má gí kɛio,

má gbɛ̃e wɛgwao, má nↄ̀sɛlilɛo.

Má yã́kpalɛkɛánↄ á yãkɛawaɛ,

ma Dii Lua mámɛ má ò.

Ezekiɛli na gaa

15 Dii yã'òmɛɛ à mɛ̀: 16 Gbɛ̃nazĩn nɛ́, má pↄ́ pↄ́ n wɛ́ blè sima kã́ndo. Ńsu búbuapɛo, ńsu ↄ́ↄlↄo, ńsu to wɛ́'i bↄmao. 17 Aaukɛ kílikili, ńsu ǹ aà gɛ ↄ́ↄlↄo. Ǹyↄ̃ n fùa ń n kyaleↄ kpaa. Ńsu pↄ́ kú n lɛ́wao. Ńsu gɛ'ↄↄlↄnaↄ blɛ bleo.

18 Ma yã'ò gbɛ̃́ↄnɛ kↄↄ, a oosi ↄ̃ ma na gà. Kɛ́ gu dↄ̀, ↄ̃ má yã́ pↄ́ Dii òmɛɛ kɛ̀. 19 Ɔ̃ aa ma la aa mɛ̀: Yã́ pↄ́ ńlɛ kɛɛ beeↄ dɛ wá yã́ ũ yã̀? Ǹ a bↄↄlɛkɛwɛ̃ɛ. 20 Ɔ̃ má wèmá ma mɛ̀: Dii yã'òmɛɛ à mɛ̀ 21 mà o á Isailiↄnɛ á Dii Lua mɛ̀, álɛ a kpɛ́ gbãlɛ, á zɛgikĩi pↄ́ i ĩ́anadãò, ì kɛɛ́ maa, i a bɛɛkɛpi, á nɛgↄ̃ɛↄ ń á nɛnↄɛ pↄ́ a ń tó weↄ gaga zĩ guuɛ. 22 Í kɛ lá má kɛ̀wa. Á pↄ́ kú á lɛ́wao, á gɛ'ↄↄlↄnaↄ blɛ bleo. 23 Áↄ á fùaↄ ń á kyaleↄ kpaa. Á búbuapɛo, á ↄ́ↄlↄo. Á ibaba á duuna yã́i, í aaukɛkↄ̃ɛ. 24 Máↄ dɛɛ́ seela ũ. Lá má kɛ̀ píi, ápiↄ sↄ̃ á kɛɛ, íↄ dↄ̃ kɛ́ Dii mɛ́ Lua ũ.

25 Dii ɛ̀a mɛ̀: Gbɛ̃nazĩn nɛ́, gↄↄ pↄ́ ma ń zɛgikĩi sìmá, an ĩ́andãbↄ pↄ́ aaì pↄnakɛòpi, pↄ́ pↄ́ ń wɛ́ blè an pↄ́ dↄwàpi ń ń nɛgↄ̃ɛↄ ń ń nɛnↄɛↄ, 26 gbɛ̃́ pↄ́ bↄ̀ zĩ bee a mↄ n kĩ́i, i a bao kãnɛ n swã́wa. 27 Zĩ́ bee n lɛ́na a golɛ, ní yã'o ń gbɛ̃́ pↄ́ bↄ̀pio, n lɛ́na aↄ naalɛa lↄo. Ńyↄ̃ↄ dɛnɛ́ seela ũ, aai dↄ̃ kɛ́ mámɛmaa Dii.

<- Ezekiɛli 23 Ezekiɛli 25 ->