Ezekiɛli 21

Gɛↄmidↄkĩi oi tɛ́

1 Dii yã'òmɛɛ à mɛ̀: 2 Gbɛ̃nazĩn nɛ́, wɛbiibii gɛↄmidↄkĩiwa ǹ yã'o'oɛ̀. Ãnabikɛkɛ Nɛgɛvɛ bùsu líkpɛpi yã́ musu, 3 ní oɛ̀ aà ma yãma. Ma Dii Lua ma mɛ̀ má tɛsↄ̃wàɛ. Tɛ́pi a kũ a lí ísiↄ ń a lí giiↄwa píi. Wa e a tɛ́pi dɛo. Tɛ́pi a to gbɛ̃́pii oa siakũ za gɛↄmidↄkĩi oi e gugbãntoo oi. 4 Gbɛ̃́pii iↄ dↄ̃ ma Dii mámɛ ma tɛ́pi sↄ̃̀wà, wa fↄ̃ dɛo.

5 Ɔ̃ ma mɛ̀: Á'a Dii Lua! Wàlɛ o ma yã́ musu wà mɛ̀, yáasikɛna nolo?

Dii fɛ̃nda

6 Dii yã'òmɛɛ à mɛ̀: 7 Gbɛ̃nazĩn nɛ́, wɛbiibii Yelusalɛũ oi ǹ yã'o'o sa'okĩiↄnɛ. Ãnabikɛkɛ Isaili bùsu yã́ musu, 8 ní oɛ̀ ma Dii ma mɛ̀, má fɛlɛ ń bùsupideↄ. Má a fɛ̃nda wo a kpɛ́u, mí a gbɛ̃maaↄ ń a gbɛ̃vãiↄ dɛdɛò píi. 9 Lá málɛ a gbɛ̃maaↄ ń a gbɛ̃vãiↄ dɛdɛ píi, má a fɛ̃nda wo mà gbɛ̃́pii lɛ́ò za gɛↄmidↄkĩi oi e gugbãntoo oi. 10 Gbɛ̃́pii iↄ dↄ̃ kɛ́ ma Dii ma a fɛ̃nda wò a kpɛ́u, má sↄlↄu lↄo.

11 Gbɛ̃nazĩn nɛ́, aaukɛ! Aaukɛ ń wáa ń ɛ̀lɛ'ɛlɛboao ń pↄsiao. 12 Tó wà n la, bↄ́yãi ńlɛ aaukɛii, ní onɛ́ bao pↄ́ wa ma tia yã́iɛ. Sↄ̃ a kɛ̃ gbɛ̃́piigu, an ↄↄ i gↄ̃ dↄ̀lↄlↄ, an kã́ i ga, an gbá iↄ lua. Yã́ lɛ́ pila, mɛ́ a kɛɛ. Ma Dii Lua mámɛ má ò.

13 Dii yã'òmɛɛ à mɛ̀: 14 Gbɛ̃nazĩn nɛ́, ãnabikɛkɛ ǹ mɛ ma Dii ma mɛ̀:

Fɛ̃ndaɛ! Fɛ̃ndaɛ!

A lɛna, mɛ́ àlɛ tɛkɛ gɛ̃̀nɛgɛ̃nɛ!

15 Wà a lɛkɛ̀ gbɛ̃dɛdɛa yã́iɛ,

wa kɛ̀kɛ kɛ́ àↄ tɛkɛ lán loupilɛawaɛ.

Wa pↄnakɛ ń ma nɛ́ gopanao yã̀?

Fɛ̃nda bàa kú ń go bee taaeoo.

16 Wì fɛ̃nda kɛkɛ wàↄ kũaɛ,

wì a lɛkɛ, wì kɛkɛ,

wà na gbɛ̃dɛnaɛ a ↄzĩɛ.

17 Wii lɛ́ gbɛ̃nazĩn nɛ́,

ní waiyookɛnɛ́,

asa wa fɛlɛ ma gbɛ̃́ↄwa

ń fɛ̃ndapioɛ,

wa fɛlɛ ń Isaili kíaↄ píiɛ.

Wa ń dɛdɛ ń fɛ̃ndaoɛ

ń ma gbɛ̃́ↄ lↄ.

A yã́i tò ǹ nzĩa gbɛ̃gbɛ̃.

18 Wa ń gbãa lɛ gwa fá!

Tó gopana pↄ fɛ̃nda bàa kuo su ku lↄo sↄ̃ bɛ?

Ma Dii Lua mámɛ má ò.

19 Gbɛ̃nazĩn nɛ́, ãnabikɛkɛ, ní ↄtaalɛ.

To mà lɛ́lɛmá ń fɛ̃ndao gɛ̃n pla ge àaↄ̃.

Fɛ̃nda pↄ́ a gbɛ̃dɛdɛ dasidasiɛ,

wa koezↄ̃ńzi ń zĩpio,

20 sↄ̃ i kɛ̃́ńgu, gbɛ̃́ daside i fu.

Má tó gbɛ̃dɛdɛfɛ̃ndapi àↄ ku

an wɛ̃́lɛ bↄlɛↄ guu píiɛ.

Kúku, àlɛ tɛkɛ lán loupilɛawa,

gbɛ̃dɛdɛa yã́i wa kũai.

21 Fɛ̃nda, lɛ ↄplaa oi, gɛ́ zɛɛi.

Gu pↄ́ n lɛ́ yɛ̀ɛlɛu píi lé!

22 Mapi sↄ̃ má ↄtaalɛ, ma pↄ i wee.

Ma Dii mámɛ má ò.

Babɛli kía lɛ́lɛa Yelusalɛũwa seela

23 Dii yã'òmɛɛ à mɛ̀: 24 Gbɛ̃nazĩn nɛ́, iada lán zɛ́wa mɛ̀n pla, Babɛli kía i sɛ́ ń a fɛ̃ndao. Zɛ́piↄ bↄ bùsu doũ ḿpii. Seela pɛ́lɛ zɛ́piↄ daalɛkĩi, i wɛ̃́lɛ pↄ́ zɛ́pi lɛ́ gɛ́u ↄlↄnɛ́. 25 Ado iada, fɛ̃nda i sɛ gɛ lɛ́lɛ Amↄniↄ mɛɛwia Labawa. Ado iada, i sɛ gɛ lɛ́lɛ Yudaↄwa ń ń wɛ̃́lɛ bĩ́ide Yelusalɛũo. 26 Babɛli kía a zɛ zɛ́kpaau, gu pↄ́ zɛ́ mɛ̀n plapiↄ kɛ̃̀ukↄ̃wa, i màsokɛ we. A yãla ń kaↄ, i yãgbɛa tã́aↄwa, i pↄ́ↄ pↄa gwagwa. 27 Lí a Yelusalɛũ sɛ́, i gɛ́ bĩ́igboobↄↄ pɛ́lɛ a bↄlɛↄu, i bùsu kãaai, i gbà lɛsĩↄ da, i gbɛ̃dɛdɛyã dilɛ, i zĩ̀gãalɛ. 28 Yelusalɛũdeↄ aaↄ e lí pↄ́ a sɛ̀piá ɛɛɛ lɛ́ pↄ́ a gbɛ̃̀nɛ́ yã́i. Ãma a to aa ń tàae dↄ̃, i ń kṹkũ. 29 Ayãmɛto ma Dii Lua ma mɛ̀, lá á tò wà á vãikɛa dↄ̃, á tàaeↄ bↄ̀ gupuau mɛ́ á duuna pìsi á yãkɛaↄwa, lá á tò wa dↄ̃̀ màa, wa ↄpɛlɛwáɛ sa.

30 Mpi sↄ̃ Isailiↄ kía vãi bɛɛɛsaide, n gↄↄ pà, ĩa pↄ́ wàlɛ dama kà a wáwa sa. 31 Ma Dii Lua ma mɛ̀ wa aà tulu go, wi aà kíafua go. Yã́ a lilɛ, wa gbɛ̃́ pↄ́ ì azĩa busa kã́fĩ, wi gbɛ̃́ pↄ́ ì azĩa kã́fĩ busa. 32 Bɛzia! Bɛzia! Má tó à gↄ̃ bɛzia ũɛ. A ɛa su a gbɛuo e gbɛ̃́ pↄ́ àↄ a vĩa zɛ́ vĩ mↄ́,[a] mí kpawà.

33 Gbɛ̃nazĩn nɛ́, ãnabikɛkɛ ǹ mɛ, ma Dii Lua mámɛ ma yã́ɛ bee ò Amↄniↄ musu an yãzↄ̃zↄ̃a Isailiↄnɛ yã́i.

Fɛ̃ndaɛ! Fɛ̃ndaɛ!

Wa wò gbɛ̃dɛdɛa yã́iɛ,

àlɛ tɛkɛ à láa gbɛ̃́ↄnɛɛ,

àlɛ pipi lán loupilɛawa.

34 Wɛ́pungu gii wàlɛ e ń yã́ musu, wàlɛ màso pã kɛnɛ́. Fɛ̃ndapi sↄu mà à gbɛ̃vãipiↄ mi zↄ̃zↄ̃. An gↄↄ pà, ĩa pↄ́ wàlɛ damá kà a wáwa sa. 35 Aa ń fɛ̃nda sↄlↄ a kpɛ́u sa, mí yã́kpalɛkɛńnↄ gu pↄ́ wà ń íu, bùsu pↄ́ aa bↄ̀u. 36 Má pↄkũmabↄbↄmá ń tɛ́o, mí pↄbↄ ma níu, mí ń na gbɛ̃́ pãsĩↄnɛ ń ↄzĩ, gbɛ̃́piↄ pↄkaalɛa dↄ̃. 37 Aaↄ dɛ yàa ũ tɛ́ɛ, wa ń au fã́ndaiada ń bùsuu. An yã́ a dↄ gbɛ̃egu lↄo, asa ma Dii mámɛ má ò.

<- Ezekiɛli 20 Ezekiɛli 22 ->