Ezekiɛli 18

Gbɛ̃́ pↄ́ duunakɛ̀ mɛ́ a ga

1 Dii yã'òmɛɛ à mɛ̀: 2 Bↄ́yãi á Isailiↄ ì yáasiɛ bee kɛ á bùsu yã́ musui? I mɛ:

Maeↄ vɛ̃ɛbɛ kũ̀ma blè,

ↄ̃ nɛ́ↄ swaa fɛ̃́nkpà.[a]

3 Ma Dii Lua ma mɛ̀, ń ma kuao á yáasi bee kɛ á bùsuu lↄo. 4 Gwa, gbɛ̃́piiá ma pↄ́ɛ. Maeↄ ń nɛ́ↄ píi, yã́ doũɛ. Gbɛ̃́ pↄ́ duunakɛ̀ mɛ́ a ga. 5 Gbɛ̃maa pↄ́ lɛ́ yãmaakɛ a zɛ́wa yã́ gwa.

6 Ìli gɛ́ pↄblei tã́aↄ kùɛo,

ìli wɛ́malɛ Isailiↄ diipiↄzio.

Ìli a gbɛ̃́dee nↄ wɛɛlɛo,

ìli wúlɛ ń nↄɛo gↄↄ pↄ́ a ↄkũao.

7 Ìli gbãamↄ gbɛ̃eɛo,

ì gbɛ̃́ pↄ́ a fĩa sɛa tↄ̀ↄma sↄaaɛ̀ɛ.

Ìli pↄ́ símáo,

ì nↄandɛna gba blɛ,

ì pↄ́ na gbɛ̃́ pↄ́ kú bṹuzi.

8 Ìli ↄ̃a sɛ̃anɛ́ à a igbao,

ìli ài zↄ̃ↄ wɛɛlɛo,

ì azĩa bↄ yãvãiuɛ,

ì yã́gↄ̃gↄ̃nɛ́ a zɛ́wa.

9 Ìↄ ma ↄtondↄkĩi gwa,

ìↄ ma ikoyãↄ kũa,

ìↄ zĩkɛwà ń náaio.

Ma Dii Lua ma mɛ̀,

gbɛ̃́ bee mɛ́ maa, aↄ kuɛ.[b]

10 Tó gbɛ̃maapi nɛ́ vãi ì sↄ̃ bɛ? Ì gbɛ̃dɛ, ge ì yã́piↄ kɛ a gbɛ̃́deeɛ. 11 Baa kɛ́ aàpi i a kee kɛo,

nɛ́pi ì pↄble tã́a kùɛ,

ì a gbɛ̃́dee nↄ wɛɛlɛ,

12 ì gbãamↄ taasideↄnɛ ń wɛ̃nadeↄ,

ì pↄ́ símá,

ìli tↄ̀ↄma pↄ́ á kũa sↄaanɛ́o,

ì wɛ́malɛ tã́aↄzi, ì yãbɛ̃ɛkɛ,

13 ì ↄ̃a sɛ̃anɛ́ à a igba,

ì ài zↄ̃ↄ wɛɛlɛ.

Gbɛ̃́ bee taa aↄ kua? Aawo, aↄ kuo. A ga yãbɛ̃ɛ pↄ́ a kɛ̀ píi yã́iɛ. Aà tàae a wi aàzĩa musuɛ.

14 Tó nɛ́ vãipi nɛ'ì, ↄ̃ aà nɛ́ duuna pↄ́ a mae lɛ́ kɛↄ è, mɛ́ i a kee kɛo sↄ̃ bɛ?

15 Ìli pↄble tã́a kùɛo,

ìli wɛ́malɛ Isailiↄ diipiↄzio,

ìli a gbɛ̃́dee nↄ wɛɛlɛo,

16 ìli gbãamↄ gbɛ̃eɛo,

ìli tↄ̀ↄma gbɛao,

ìli pↄ́ símáo,

ì nↄandɛna gba blɛ,

ì pↄ́ na gbɛ̃́ pↄ́ kú bṹuzi,

17 ì azĩa bↄ yãvãiu,

ìli ↄ̃a sɛ̃anɛ́ à a igbao,

ìli ài zↄ̃ↄ wɛɛlɛo,

ìↄ ma ikoyãↄ kũa,

ì ma ↄtondↄkĩi gwa.

A ga a mae duuna yã́io, aↄ kuɛ. 18 Aà mae a ga azĩa duuna yã́iɛ, asa à gbɛ̃́ↄ bↄ́ↄ'i mì, à a gbɛ̃do pↄ́ sìwà, à yã́ pↄ́ maao kɛ̀ a gbɛ̃́ↄ guuɛ.

19 Ɔ̃ i mɛ: Bↄ́yãi maepi tàae lí wí a nɛ́ musuo ni? Lá nɛ́pi yãmaakɛ̀ a zɛ́wa, à ma ↄtondↄkĩi gwà ń laaio, aↄ kuɛ. 20 Gbɛ̃́ pↄ́ duunakɛ̀ mɛ́ a ga. Mae tàae a wi a nɛ́ musuo, nɛ́ tàae a wi a mae musuo.[c] Gbɛ̃maa maakɛaá aàzĩa yã́ɛ, mɛ́ gbɛ̃vãi vãikɛaá aàzĩa yã́ɛ.

21 Tó gbɛ̃vãi mikɛ̃̀ a duunaↄwa sↄ̃, mɛ́ à ma ↄtondↄkĩi gwà, àlɛ yãmaakɛ a zɛ́wa, a gao, aↄ kuɛ. 22 Wa aà tàae pↄ́ a kɛ̀piↄ kee dao, aↄ ku yãmaa pↄ́ á kɛ̀pi yã́iɛ. 23 Ma Dii Lua ma mɛ̀, vãikɛna gaa ì kamagu nɛe? Tó à mikɛ̃̀ a yãkɛaↄwa, aↄ kuɛ, bee mɛ́ ì kamagu.

24 Tó gbɛ̃maa mikɛ̃̀ a maakɛawa, àlɛ duunakɛ, àlɛ yãbɛ̃ɛ pↄ́ gbɛ̃vãi ìↄ kɛↄ kɛ, aↄ kue? Wa yãmaa pↄ́ a kɛ̀piↄ kee dao. A ga a náaisaikɛ ń duuna pↄ́ a kɛ̀o yã́iɛ.

25 Á Isailiↄ i mɛ ma yãkɛa dↄ̀ↄ vĩo. À swã́kpa sa. Ma yãkɛa dↄ̀ↄ vĩo ló? Ge á yãkɛa mɛ́ dↄ̀ↄ vĩo kai! 26 Tó gbɛ̃maa mikɛ̃̀ a maakɛawa, àlɛ duunakɛ, a yã́i a gai. A ga duuna pↄ́ a kɛ̀pi yã́iɛ. 27 Tó gbɛ̃vãi mikɛ̃̀ a vãikɛawa, àlɛ yãmaakɛ a zɛ́wa sↄ̃, a azĩa misiɛ. 28 Tó à tàae pↄ́ a kɛ̀ↄ è mɛ́ à mikɛ̃̀wà píi, a gao, aↄ kuɛ. 29 Á Isailiↄ sↄ̃ i mɛ ma yãkɛa dↄ̀ↄ vĩo. Á Isailiↄ, ma yãkɛa dↄ̀ↄ vĩo ló? Ge á yãkɛa mɛ́ dↄ̀ↄ vĩo kai!

30 A yã́i má yã́kpalɛkɛ ń á Isailiↄ, baade a yãkɛawa. Ma Dii Lua mámɛ má ò. À nↄ̀sɛlilɛ à mikɛ̃ á tàaeↄwa píi, kɛ́ á duuna su á ásookɛo yã́i. 31 Isailiↄ, à ↄzↄ̃ á tàaeↄzi píi, í á sↄ̃ ń á nisĩnao kɛkɛ dafu. Bↄ́yãi álɛ ázĩa kpa gaii? 32 Ma Dii Lua ma mɛ̀, gbɛ̃e gaa lí kamaguo. À nↄ̀sɛlilɛ, í e àↄ ku.

<- Ezekiɛli 17 Ezekiɛli 19 ->